[محمد مهاوش الظفيري]

مساء خارج الزمن

يصهل الليل بكيان الأسئلة
ينفث الدّخان خلف النافذة شعر وسنين
بعثريني يا حروفي مزهريّة
واتركيني في هجير الأمكنة
أشرب نهايات الحنين
كنت جالس
خلف شباك السوالف
أنتظر شكل المسا لما يمر
في الشارع اللي ما غفى
من طنين الصمت , أو صمت الطنين
كان شارعنا سنابل
يسترق همس , وبلابل
كان سهران , يغني
ينفض غبار الكلام اللي علق في خاطرة
مثل الخيول النافرة
لما تروضها السنين
كان في الشارع بنات
رايحات ... وراجعات
والشباب ,
خلفهن مثل النذور
في سنين القحط لما الناس تستجدي الغياب
أرفع التوت , وأقول
وتختفي كل النهايات بخيول العاصفة
أنتظر طيفه يجول
في خيالي
في تفاصيل السنين اللي تناستها السنين
في فضاءات العمر
يا ليل يا ليل السهر
نامت عيون الناس إلا ساعتي
ما زال عقربها يدور
أنتظر...
أكتب قصايد
والليل مسترخي على كتف الظلام
سهران ما ودّه ينام
وتستثير الأسئلة فيني نهايات الحنين
أنتظرها , من ثقوب الأمس
تطوي الأزمنة شعر وأنين
طال انتظاري
والمسا سكران يترنح على جنب الرصيف
أشرب التوت ... وأقول
أشتعل شعر وأغاريد وضفاير
أتعب اجمعني , وأقول
ممكن تجول
في خيالي
في مسامات السنين اللي توطتها الخيول
... وأشعر الفجر , بشعاعه
يلسع عيوني من الشباك , وأستجدي رموشي
تحضن عيوني , وأغمض
أرتمي فوق السرير
والفجر والغرفة وشباك السوالف
تنغرس فيني ... وأغيييب
أحس راسي , ما هو راسي
والكون من حولي يطير
وأنا أحلم
بالفضاء المكتنز شعر ... وعصافير ... وحرير
وأسحب الشرشف على صدري , وانام
أتدلى ...
مثل خيوط الليل لما الشمس تمتص الظلام
وأتْجمّع بصمت , وانام
وأنااااااااااام

السبت
28 / 7 / 1428 هـ
11 / 8 / 2007 مـ

عمّان