[فهد دوحان]

:

تجليات الرؤى في سجن العزيز

جراح :
وصدري بوصلة ..
بس الجِهات رْماح !
والشاعر الانسان اكثر من تورط باليباب
واكثر من عرف طعم الغياب
بهذي الغربة ،،
وأسرار الرياح !
وكل غيمة تترك الأرض الموشى وجهها بالجدب
من اصغر تجاعيد العطش لاقصى نهايات الدعاء
بلحظة استسقاء :
يا :
يارب :
يارب :
الحبايب والمطر والحلم والعمر اللي راح !!
يارب :
قلبي المستباح !!



فعلا عظيم انك تكون انسان في هذ الركام ..
اللي تنامى فوق جلدك / خارجك مثل الجذام ..
وكنت تبذر داخلك كل الوجوه الطيبة
وترد تحصدها كثير من البكا المر اللذيذ العذب
والحزن المباح !
أو قبل يدرك شهريار الحزن
في قلبك صباح ..
وتقوم مكسور الليالي والاحبة والجناح !!

البارحة :
كان الورق مطفي ومقدود القميص ..
جداً رخيص ..
بكل ماللرخص من معنى فقير ،،
بكل ماللرخص من معنى وفير ،،
بكل ماللرخص من معنى
هو الاول – بقلب الناس الاحيا الميتيين سنين-
والمعنى الاخير !!


البارحة :
حاولت اكون الصلح في حرب السلام ..
حاولت اكون الصبح ياهذا الظلام ..
اشعلت نار الذاكرة ,,
لو يحترق كل الفراش ..
أو يحترق بعضي ..
لو ( شاهد ٍ من أهلها )
يوقف على نبضي
فتـَحت الابواب وصرختك :
ياسنيني ( هيت لك ) !!
تعالي راوديني ..
علميني ليه اذا غنى الحمام بداخلي ،
وتزعفر المعنى هناك .. ولملم العش وترك به بيضتين .. تضيعيني ؟!
من متى أو لمتى وانتي على نفس الطريق تلــِّوحيني ؟
تزرعيني ومن قبـِل موسم حصادي .. تقطفيني ؟!!
ماكفاك انك على نفس المقام الصادح
بصوت الصـَـبا والكـرد والبيَّـات والرسـت الحزين
تدندنيني ؟!!


انا اختصار ( الجب ) في هذا المسا ،،
الدم المسكوب .. والذيب البري من حزن يوسف ،،
لحظة البوح الشجي بكل مابه من نشيج .. ومن اسى ..
ومن بـُـكى يعقوب الى سجن العزيز ..
الى ومضة ( عسى )
للي تركني داخل النسيان
واظن انه نسى !!


لكني ( اشكي بثي وحزني على ربي )
واداوي بعضي المليان في بعضي الوحيد !!

( ياصاحـِبـْي السجــن ) يا :
ياصاحِـبـْي الملح والعيش الزهيد ،،
والشعر المكبل بالحديد ،،
هذي الرؤى :
محاولة خروج من منفى بداخلنا :
الى الحلم البعيد ,,
هذي الرؤى :
ارواحنا المتكسرة على لوح الجليد ،،
هي فكرنا المتصادم المصلوب بجذوع العبيد ،،
هي لفظة انفاس الغيوم بزفرتين ٍ من مطر
يحيي اليباس اللي تدلى من ملامحنا
ويملاها بأوراق الجريد ..
هي كل تاريخ ٍ تنامى داخلي واستصرخه :
هل من مزيد !
قد انقضى الامر الذي تستفتياني فيه ....
لا تستفتياني من جديد !!

[poem="font="simplified arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]
وبرغـــم مافينــي جـــلد =ابمشي تحت الســــــاس
يمكن يجــي باكــــر ولــــد =ويعلـــــّق الاجـــــــراس
يضحك اذا مـــات بكمــــد =يكتب علــــى الكـــراس :
أن البلد ماهــــو بلــــــــــد =والناس ماهـــم نــــاس !! [/poem]

يرمي الشوارع في دروب الواقفين :
الميتين إحساس ..
الهاربين من النهار الخايفين :
الحابسين أنفاس !!
يمكن ترد الأرض تستوعب تعب شاعر حزين ..
وطيــّب ٍضاقت عليه ثياب كل الأمنيات ..
وعلـّقت بعيونه الأنهار ومات من الظما ..
اقصد تكون الأرض ارض بـْلا دُمــى
ويكون قابيل الليالي المقبلة

إنسان ثاني بـْـلا دِمــــا ..!!

( يا أيها الانسان ) :
ياثمن من المنفي .. لو قلبك الشبـاك ..
يـــا أجمل وأدفى .. من كل برد هناك ..
لو مر عمرك ما لقيت .. اللي عرف معناك ..
غن :

[poem="font="simplified arabic,4,black,bold,normal" bkcolor="transparent" bkimage="" border="none,4,gray" type=2 line=0 align=center use=ex num="0,black""]غن المهم إني أنا الإنســـان انا اللــي كل مــــا=طارت من عيوني العصافير ونفَضْت فراشهــــا
ارتــِّب الريـــش ال بقــى فيها وتــَّوه ما نمـــــا =واعيـــد ترتيب الدفـــا فيهـــا واجمـِّـع شاشهـــــا
هـــذا الالـــم بقلوبنـــا نجــــم يتدلـــى بالسمـــا=له ومضة ٍ مايـَعـْرف اروعها أحـــد مـاعـاشهـــا
هذي الرؤى هذي العصافير الصغيرة وقت ما=طاشت بروحي وْرجَعَت وقت المسا لاعشاشهــا !![/poem]