[نواف التركي]

اللي يبيك يدلّك
واللي يبي فرقاك
دلّه على فرقاك ..

هذا الطريق اللي يودّي للعدم ..
هذا الندم ..
هذا أوّل الدرب الطويل ..
هذا هو الفقد الجميل ..
والباب
والغيّاب
والأحباب
واللي راح واللي جاي ..
أمشي وأنا ويّاي ..
وأقول له :
ضيّعت من عمرك عمر ..
ويقول لي من قال لك تنحت ضلوعك ناي ..

وأمشي وأنا وياي ..
وأرمي الحجر لبعيد , وأعدّ خطواتي معي , وألقاني أتعدّى البعيد ..
مدري الزمن يركض ..
ولاّ أنا أركض ..
وحده من الثنتين ..
يـ الله ياهذا الطريق اللي بديت من أوّله ..
وللحيني أمشي بأوله ..
ماكنّ له آخر ..
وأمشي وأنا وياي ..
مرّه أحس بضيقته , مرّه يحسّ بضيقتي ..
وأزرع له ضلوعي قصب , وأهيّضه بغناي ..
ليت السنين الطين ..
وأشكّل سنيني على مشهاي ..
وارجعي معي لأوّل ..
الله يا أوّل ..
كانت ليالي غير ..
تذكر معاي شلون ..
أرواحنا بيضا ..
طعم القرى مغسول بكفوف المزن ..
وأنا تركت هناك ..
كلّ الأماني معلّقه بالمقبل من الوقت ..
وهذا أنا وياي ..
نمشي الطريق اللي يرجعنّا هناك ..
وهذا أوّله ..
وهذا آخري ..
خايف من اللي جاي , عايف من اللي راح ..
لو آخري بسّ يتجمل بي قليل ..
وأذوق طعم أوّل قليل ..
خايف وأنا وياي ..
هذا الطريق اللي يودّي للعدم ..
هذا الندم ..
هذا انا وياي ..