.
كلّ ماحاولت اغنّي على الطاروق
ـــــــــــــــــــــ عادت اوجاعي تراكم وقلبي ذاب
مابقى في طبع الايام ذرّة ذوق
ـــــــــــــــــــــ علّمتني وش يكون الهوى الغلّاب
ان ستر عِرْي الوله ثوبه المفتوق
ـــــــــــــــــــــ ماستر وقتٍ سرقني بضحكة ناب
راح كلّ العمْر اقول العمر ملحوق
ـــــــــــــــــــــ لين وجه الدرب من دون ما اشعر شاب
ليت لي فكرٍ يسجّ انبسط واروق
ـــــــــــــــــــــ كان مادوّرت خلف الشتات اسباب
اجمع ارقام وأسامي والمّ الشوق
ـــــــــــــــــــــ وارجع انثرها حنين وقلوب احباب
تمطر الذكرى وتلمع سماي بروق
ـــــــــــــــــــــ وافتح لصبْحي نوافذ على الغيّاب
افتكرهم ويتساقط صور من فوق
ـــــــــــــــــــــ واسمع اصوات ويطير الحمام اسراب
واكتشف بانّه وهم من عمر مسروق
ـــــــــــــــــــــ غربةٍ ماتجمع الا وجيه اغراب
ياخسارة حبي وقلبي المحروق
ـــــــــــــــــــــ من كثر ماذاق طعم المواجع ذاب
..