[نواف التركي]

ـ وشرايكم نسولف وربي مو جايني نوم وتغصبت لين ضرب مخي عجزت أنام , ومحمد الضويحي يدخل الماسنجر وحاط مشغول وأنا مسوي ذوق ماودي أقطع خلوته , وفيه أربعه حاطهم حضر مالي خلق عليهم بصراحه ..

عشان كذا قلت أفتح ( متصفح الغفله ) وأقعد أسولف لكم عن بطولاتي مدري نكباتي اللي هي ..

أها ..

ـ تخبرون طال عمركم يوم هبّت الناس بالأسهم ومدري وشو , قلت أنا ليه ما أدخل مثل خلق الله هذي , ولأني مفلّس كـ العاده , ولأني طموح بالحيل بالحيل ..

رحت لأبوي الله يطول عمره ..

قلت / يبه وش الأخبار ؟

نعم ..

أبد سلامتك أقول أنت وشلونك ..

طبعاً هو يعرف خشتي لاصرت أبغى شي ..

قال : من الأخر ؟

قلت أبد طال عمرك أنت وين عن هالناس اللي طايحه بالأسهم , خلق الله صارت تجار ..

قال : أسمع الخرابيط هذي فكنا منها , أنا خابرك وخابر علومك ( أفا ياذا العلم ) .

قعدت أحن على راسه وهو والله ماوده لكن خابره ما يروح نيّه ..

بعد ما أقنعته قال خلاص أبشر بعطيك فلوس , وأبي أعتبرهن ضاعن و أنسرقن ..

هنا أنا أنتفضت لا يبه أفا عليك بس , أعتبرهن سلف وكلها شهر شهرين وأبشر ..

مالكم بالطويله عطاني ..
وأنا أسنتر ما تشوفني إلا مقابل هالكمبيوتر , وأنواع الأرباح وكل ما مر وشافني , هاه بشر متى ترد الفلوس ..

أفا عليك قريّب
بس أنت أصبر

وعلى هالموال ..

لين جاء اليوم الأسود اللي كل واحد فقري يعرفه , وطاخ طيخ .. إلا وأنا على الحديده ..

وأقوم أجي متأخر وأحط راسي وأنام
وأقعد وحط رجلك ..
وعلى هالحال ..
مسوي يعني الشايب ما ينتبه

أثري الشايب داري
وسامع من خلق الله
إن الناس بالإنعاش ومدري وشو ..

وهاك اليوم وأنا توني أبي أفرك لها من البيت
إلا هذا هو ..

هلا هلا ..

تعال يا ولدي
أبشر طال عمرك بس بوصل البقاله وأجي

أقول تعال بس ..

أها طيب ..

أيوالله وهو يستفردبي
قلت أسمع فلوسك جايتك لا تشيل هم ..

بس أصبر علي شوي ..

طالع فيني كذا ..
وضحك ..

قال أنا ما قلت لك من يوم عطيتك الفلوس بأعتبرهن ضاعن ..

لالا ما ضاع شي ..

قال أسمع خل خرابيطك أنا أشوفك فاركلها أربع وعشرين ساعه ..
أركد بس وأقضب القاع , وفدوه ولا يهمك ..

أهم شي لا تروح تنجن مثل هاللي كل يوم نسمع سوالفهم ..

ياربي والله شال عني حمل ثقيل ..

قبل كم يوم صار عنده كم فلس وجيت أقترح عليه مشاريع ومدري وشو ..

( ألعن أم البياخه بعد لي عين أقترح )

قال ياولدي إنت داوم وفكني من مشاريعك
أهم شي لا يفصلونك من وظيفتك ..
وأن شفتني أشاور أخوانك بشي
أنت الله لا يهينك ( على شحم )

أبشر طال عمرك ..
أصب لك قهوه

لا بس أنجعم لين نخلص سالفتنا ..

قلت له مره يبه
أنا بدخل شاعر المليون
وبجيب المليون وأجيك

قال رح بس ترا لاني مصوت لك
وأبي أعلم الجماعه كلهم لا أحد يصوت

أفا ليش

أبد مشروعك خسران ..

من يسلفني يالربع
وأنا مستعد لا خذيت المليون أردهن

أحس أنعدمت الثقه بقدراتي عند الشايب

وإلا تدرون
وشرايكم
أبعاد أعضاءها حول الـ 4000

لو كل واحد منكم يقط ميّة ريال وأرجعها لكم متى ما تيسرت الأمور ..

قلبناها شحاذه
ولا
أقول الله لا يشكر لكم فضل
يالله عاد

كل واحد يشرفني برا خلصت السالفه ..