[سُرَى]

-

تَطفُّل متواضع على شعر التّفعيلة :

يَسأل الشّعر بأناقة :
يا عزيزي مَنْ تكون ؟
قلت: أنا طفل الرّواقة..
والطَّفاقة .. والجنون
قول عنّي : كان عابر
يا كثر مادللّت رِجله طريقه
يعترف في كلّ شَيّ
إلّا المَنابر
واحتضار أفكاره وْلمعة بريقه
والتَّفاصيل الصغيرة
في عيون العابرين
بس مَعَه دايم تهاجر
والمدى
لو يفتح ايدينه على كلّ اتّجاه
من كثر ما هو عميق
يزمّ خطواته معاه
قول عنّي : شخص عادي
به ضجيج وْكلّ شيٍّ فيه هادي
سنبلته الشّمس لعيون الحصاد
ليّن أحيان وعنادي
وأكثر الأحيانِ يرجع
من بني عمّ الحياد
قال تدري : انت باهي
قلت ما تشد انتباهي
قال: أشدّك .. قلت : حَدّك
قلت : أنا كلّ انتباهك
عَصفك .. ونَزفك .. وفنّك
وآخر العنقود تدري
وآخر الموجود .. منّك
قال : أنا بعينك وش اسْمِي؟
قلت : مدري
بسّ انا فكرة أصيلة
وانت سهل وصعب .. لكن
كنت جدًّا مستحيلة