تك تك تك تك تك
عقاربها تزفّ الذاكرة للجرح ..
ما تهدى
وأستجديها تتباطأ ..
وأتوسلها ترحمني ..
رحيلك قبل ما يشرق ,,
تخليني ,,
بها الليلة تخليني ..
أنام بحضنك الليلة ..
وأدثر بيك لهفتنا ..
طفولتنا ..
محبتنا ..
شغب ما زال يذكرنا ..
وأتسوّل حضورك مَي
نشف حلمي وجفّ بْحلقي احساسي ..
وغاب الضي
و
أ
ت
س
ا
ق
ط
على خدك ..
قتيلٍ بسّ في نبضه ..
شعورٍ حي ..
عيونك ..
ما قوت حملي وهي ترحل ..
بقايا من حنين ..
وذكريات مهاجرة للآأأأه
وآآآه آه ..
لا صار الوجع يعصر ضلوعك وجد ..
وانته تنحني للبعد ..
وتهاجر
رجيتك يوم شفتك تحزم أحلامي
ـــــــــــــــــــــــــــــــــــ تريّث لا يموت الحلم وارثي له
وحطْ من نبض قلبك زاد لأيامي
ـــــــــــــــــــــــــــــــــــ غريب وْجرّ عشقك في مواويله
سكبتك عشق في صدرٍ نَفَقْ ضامي
ـــــــــــــــــــــــــــــــــــ ودسيت الحنين بشنطتك شيله
حرقني الْبعد/ بردك ينخر عْظامي
ــــــــــــــــــــــــــــــــــــ رحلت ونور فجري طفّ قنديله
سكتّ ودارت أرضي تحت أقدامي
ــــــــــــــــــــــــــــــــــــ ذبل قلبي ودمعي جفّ منديله
تنفّستك خداع وْضاقت أنْسامي
ــــــــــــــــــــــــــــــــــــ حمل صدري جروحهْ وامْتطى ويله
جنين الخوف في رحْم الوفا نامي
ـــــــــــــــــــــــــــــــــــــ كبر خوفي وهدّم للوفا حيله
جسد منهك وغارق في بحر طامي
ـــــــــــــــــــــــــــــــــــ ألحّف كلّي ابّعضي بلا حيله
أنا ما عِشْت بعدك بس أوهامي
ـــــــــــــــــــــــــــــــــــ صحت دونك وخانت كذبك بليلة
ودون أشعر ..
أغمّض عيني بدونك
وترحل ليك أحداقي ..
رجا شوفك على غفلة ..
وأحس بمشيها تحذر ..
يعثّرها الجفا
و ت ط ي ح
ما تقوى ..
تواصل دونك الرحلة ..
وأتخبّط بأوهامي ..
وأعاند لجلك أيامي
وأجيلك ..
مثْل أعمى يلتمس دربه
حمل عكّازته ..
وتعثّر بظله
وتخذلني ..
مثل أرضٍ رواها الساقي بدمه
ولا نبتت سوى الصبّار ..
يطْعن ما بقى منه
وتتركني
مثل بابٍ تريّا إيدك اتضمه
صدا حلمه
وبعده ما دفا قفله
وتجرحني
وتجرحني
وت ج ر ح ن ي
وأظل أنزف جراحك لين أتوفّى
وبعد الموت
تجي وتنبّش ف قبري ..
ولا تلقى سوى جْراحك
حبيبي شفت اخلاصي ؟!
فنى كلّي ..
وبعدي أحفظ جراحك !