اتكدر ويرضيني هزيل العذر

[حسام المجلاد]

مدري اصبر على مرّ أمس ولا على
حاضرٍ مرّ ولا باكر ادهى وامر

لو درا بأني احمل صبر كل الملا
وقفة الصبر.. يحسدني عليها الشجر

ما تعلمت من درس الزمن، والبلا
طيبتي كثر ما قيّدتها تستمر

هذا انا كل ما القلب بشقاه امتلا
اتكدر ويرضيني هزيل العذر

واللي اعطيتها روحي غرام وولا
ما اتْركت لي سوى سكينها بالظهر

كاذبة ما تشابه غير كلمة هلا
لانطقها خبيثٍ في ثياب الطهر

مابها ذرّه من احساس صادق ولا..
..يمكن تلين، لو يْلين صم الحجر

قلبها ممتلي بالكبر .. ومن الغلا:
خاليٍ مثل مسجد في صلاة الفجر