الأسد والعاهرة

[عبدالحميد بن ناحي]

مات الأسد ..
مات الأسد ..
من روح ... بالتربة جسد
مات ( ( وليال القاهرة ) )
دمعة بطرفي طاهرة
مات الأسد ..

كان الورق .. يحمل جسد ؟!
كان الورق !!
ياخذ من النعمة حسد ..
دمع وعرق
ولاّ بلاش من القهر
حبل الطواري من مسد
مات الأسد ..

يمكن عرين بلا شبل
ولاّ سهل ماله جبل
ولاّ على قول المثل
( ماتزعل الدنيا خبل )
ياصاحبي مات الأسد

ياصاحبي قل للورق
من دفتري .
ياخذ من عيوني أرق
ويامحبري .
بعد المشاعر وش أرق ؟
من كلمتي قبل الغرق
قبل الغرق .. مات الأسد

مات الأسد .. مات الأسد
والقاتلة هي عاهرة
هي عاهرة .. ( ( عاشت ليالي قاهرة ) )

ياعاهرة .. ياعاهرة
دمعة بطرفي طاهرة
واللي طرق روحي طرق

مات الأسد ..
وش ننتظر باقي بعد ؟!
لازم نموت .. لازم نموت
ولاّ مع الماضي نفوت
ولاّ نغني في ( كلم )
( سره من اسرار القنوت )
يعني على قول المثل
( فضة ) كلامي للعرب
يعني ( ذهب ) عند السكوت
ولاّ نموت
مات الأسد ..

ياشعر ابو الطيب ترى ..
ماعاد به عين(ن) ترى
كافور ( عبد ) القاهرة
كلاً على مدحه درى
ولاّ بلا ..
بعدك على الدنيا علا
يمكن كبير ..
ولاّ على قولك حقير
ولاّ على قول المثل
( شاعر ومجّد له أمير )
ولا عطاه اللي وعد
مات الأسد ..

يابو الفداء ( يابن الكثير )
اللي على الدنيا كثير
قل وش بقى ؟
بعد ( البداية والنهاية )
وش بقى ؟
قل وش يصير !

السالفة من عمر نوح
واللي ينوح
ان قلّ ( قلّ ) اقول خير
والصلح خير
( بين الفرزدق مع جرير )
ولا هو كثير
اللي نقوله لو نبي
من حب قيس العامري
ولبنى وشاعرها كثير

ياشعر ..

لو حرفك جسد
وسطرك من العسجد مسد
مالك مدينة من ورق ..
مالك مدينة من ورق ..
مات الأسد ..

والعاهرة ..

من كفها رمح السنين اللي زرق
في قلب
للدنيا قلَب
قلب الأسد
مات الأسد .. مات الأسد


السالفة بلسان حاكيها وهم
والجارحة أكبر من الطاري وأهم
واللي فهم يمكن فهم
والراي للعاقل غرير
والنور مع دربه شرق
ياصاحبي مات الأسد

لاتلتهي ..

لاتكتبه .. قبل انتهي
قبل ابتدي .. لاتكتبه
قبل آعبربه واعتبر
ابعتبر به وآعبر
واكتب شكر
للي ذكر
أنثى عرب ولا ذكر
وآقول ياشعر العرب .. كلك مزامير وطرب
حسان شاعر للنبي .. واللي يبي غيره يبي
ماقال شاعر للعرب .. ولاّ يبي دنيا طرب

كان الأسد .. بيته عرين
موته مثل جرحه دفين
وكان الورق يلبس جسد
يبقى على موته حزين

العاهرة ..

ساحة .. وشعر .. وظاهرة
يلعن ابوها بعد ابوه
يلعن تواريخ الأدب
لاخلّدت هذا الأدب
هذا أدب ؟ يلعن ابوه
مات الأسد .. مات الأسد
والقاتلة هي عاهرة