طال ليلي

[أحمد عبيد العدواني]

مساء الخير لقلوبكم النقيه




طال ليلي والسهر مامنه فود
ماحصدت الا تعب مشوار عام

لاتحَسبيني على الصمت محَدود
عادتي لاضقت ماحب الكلام

انفرد باحساسي بليّا قيود
مع خيالاتي لقيت الانسجام

ضايق(ن) ماعاد به فرح(ن) يجود
تايه(ن) مابي حلول ولا خصام

طاشت افعالك تعدّن الحدود
وانكسر خاطر ولاشاف اهتمام

ماعرفتي من طباع الا الجحود
ماوفيتي يوم قلبي فيك هام

مايفيد اليوم تكرار الوعود
عايف(ن) كل المحبه والغرام

وش بقى يابنت باحنّ السدود
مابقى لي فيك لاشف ومرام

مل قلب(ن) عذّبه كثر الصدود
عزّم الفرقا وعدّاه الملام

كل طيف(ن) مر علّه مايعود
انتهت قصة غرامك والسلام