تعويذة سلام ..

[منتهى القريش]

كنت غايب
انتشر عطرك
على صورة حبايب
خفت اضمهم في عيوني
تفوح ذكراهم ابـ روحي
ثم يفضحني حنيني

مرت الذكرى أمطار وسحايب
بللتني .. غرقتني
ما اشتكت منها جفوني

من فقدتك
كني اللي ما فقد أبداً حبايب
قبل ما تبدا سوالفهم يروحوا
بالنهايه يتركوني

جيتني مذنب وتايب
ارتديتك ثوب أبيض
يوم أطهرهم تدنس
في عيوني

اعتنقت العشق واسمك
صار إيماني ويقيني

اعتزلت الدنيا أترهبن لـ حبك
ناسكه والدير قلبك
حتى لو هم بالمحبه كفروني

غبت لكن
صوتك الـ بالروح ساكن
يستفز الصمت واحساس الأماكن
والقى اني وحدي اللي
احتري طيفك واجيني

كلما حاولت أغفى أو أنام
تمرني الذكرى حرام
تزف لي حبك خيانه
والتفت لي حتى آنا ما أبيني

وتمطر ابـ روحي ظنون الأسئله
وين راح؟
غاب عني واستراح؟
وانتظر صوتك إجابه
أقول: بكره
يحن لي يرجع يبيني

ويعيش بي ليل الحنين
يعلق اشموع الفراق
يلف فيني من مدينه لي مدينه
في شوارعها الحزينه
يدق باب الحلم حتى
تفز من صوته شجوني

واتلو إسمك
بيني وبيني
تعويذة سلام
كيف أنام
كيف انسى صوت عطرك
كيف وآنا
كلما جيت أنسى
أرجع استغفر حنيني