نتوء بـ هدوء..!

[طارق سليمان]

عرفتى ليش رحت هناك
عليّه ضاقت الدنيا
كما غبتى
ودوّرتك
أنا أدرى بك تزوجتى وجاك عيال
لكنّى:
تصورتك
بـ أمر ف خاطرك ليله/ وتغنينى مثل اول/ وتغنى طرقة الشيله/ وياخذنى السديم هناك/ يعلقنى كما عصفور فى شباك
امانه صدق جوك عيال؟
ش أساميهم؟
أحب اضحك مع الاطفال!!!
طيب ليش ماجيتى؟
أحب اسمع اغانيهم!!
أكيد انتوا سكنتوا بعيد وشريتوا بيت!!
وزوجك اعرفه طيّب!
يجونك ناس نعرفهم؟؟
عيونك مثل ماأذكرها؟
وضحكاتك مثل ماكنت اسكرها؟
الى هـ الحين تحبى الشاى بالنعناع؟
عرفتى ليش
رحت هناك
تعرفينى الى هـ الحين كلى هناك
كما غبتى!!

 

[طارق سليمان]

هواء ملوث
أغبره
أكسيد كربون
تقاطعوا
وأكلوا لحم بعض
لكن..
ياليتكم ياربعنا تستفيدون!!؟

 

[طارق سليمان]

فكّر قبل تكتب ترى الناس تقراك
به ناس تقرا/ تكتبك.. دون تفكير


حاول عشانك بس لاتكثر أخطاك
وشلون تلقى للخطا ...منك تبرير

 

[طارق سليمان]

مهم إنك تكونى بخير
أنا مدرى السبب لكن
ابى انك تكونى غير
وترمى حزنك الداكن

 

[طارق سليمان]

طفله تصب الغيم فى مجدب الروح
...... ياليتها تدرى شكثر عشب سوّت
كانت رسالتها.. عطر فاخر.. يفوح
..... مرت ب عتمة حالتى لين ضوّت

 

[طارق سليمان]

تبى تروحين؟
نتفارق؟
إذا هذا يريّح خاطرك قولى؟
إذا هذا بيجلب لك فرح قولى!
إذا هذا بينهى كل مشاكل بيننا قولى؟
تبى تروحين؟
نتفارق؟
شسوى بعدك بـ طارق؟
ووين القى دفا لـ بارد مساحاتى؟
ووين القى ضيا لـ أسود صباحاتى؟
قبل أمشى
وقبل تمشين
عطينى أمتعة حزنى
بكاى اللى يجى دايم على غيابك
عصافيرى وهى ترفرف على بابك
قصيد اللى كتبته فيك
وتكحل دوم بأهدابك
عطينى كل مسج"وينك"
"وحشتينى"
" فقدتك مافقدتينى"
سهر ليلى وأنا أنطر صوتك الدافى
حزن قلبى وانا غافى
ملامح وجهى المتعب
وشلل مخبون بأطرافى
ونكهة قهوتى المره
وكوب الشاى
عبث ايدك بحزن الناى
وغنا فيروز
وأم كلثوم
عطينى كل لحظة عشق بها فكرت بأن انتى تحبينى
كثير اكثر من الدنيا
وحزن الصيف
مواويلى إذا مّرك مرض والا شعرتى بضيق
فراشاتى
كتاباتى
بوكيه الورد
وكل لحظه بها منك شعرت بـ برد
عطينى كل امتعتى
قبل لـ أمشى
وعد لـ أمشى
وتراى اكذب اذا انك لمحتى شى فى رمشى!!

 

[طارق سليمان]

وتفارقنا
وش اللى صار
أنا ماصار فينى شى
وحتى انتى
لكنّى أدوّر للدموع أعذار
أدوّر شى يبكينى
ينسينى
بأن إحنا تفارقنا
انا من هذاك اليوم
ليما الحين
علىّ أكذب وأمثل دور بأنى حالتى لاهى
وأشعل كل لحظة بعد
سيجاره
وأدخّنها
أطالع كاسة الشاهى
وأنساها
أطالع لونها الداكن يشابه حالة الفرقا
وتجى تبرد
حزينه كاسة الشاهى
وأنا بعدك
أسخنها
أنا أتوقع درت إنا تفارقنا
لذا بردت
أنا لازلت
أمرّ أكثر أماكنا
وأقرا عن تفاصيل الفراق المر
أمرّ اشياء
ماتخطر على بالك
أمرّ أول مكان إحنا تلاقينا فيه
أمر أشجار تظلل تحتها وجهك
حزينه وشابت الاشجار
رمت أغلب ملابسها
وتعرت حيل
هنا إحنا جلسنا من تعب مشى وحكى دافى
هنا أتذكر
سألتينى
الا من غبت شتسوى
وأذكر قلت
ولا حاجه
أبعتم
ينطفى
ض
و
ى

 

[طارق سليمان]

مساءك خير
ياطفله من تسولف لى
تنبّت حولى النوير
مساءك خير
تعالى نظفّر الغيمه قبل تمطر
نسوى هـ المطر مجدول
واسوى لك من النجمات إسواره
وهذا البدر
طياره
وأطيّر لك فراشات الحزن والليل
كلامك
ثرثرة قنديل
وانتى غير
مساءك خير


يتبع..