في متاهات الزمن

[فهد ضيف الله البيضاني]

كلما قلنا تزين اوضاعنا يابن الحلال
اعترضها ما اعترضها من صواديف الزمن
ساعةٍ نصحى وساعاتٍ نعيش ابها خيال
في متاهاته ندوّر ما يداوي هالحزن
التشاؤم .. ما يسر والحق لا بده يقال
والتفاؤل .. ما يرد المعضلات اليا لفن
بين هذا وبين هذا هو جوابك يالسؤال
والقدر سيفه يمرك لا يشاور لا يحن
ريّح اعصابك وناظر لسما تلقى مجال
الفضا واسع حياتك لا تخليها سجن
قلت لك ودري تقول اللي يوصي لا يزال
في غياهب ضيقته مابين شامه واليمن
ايه داري لا تقدابي تعدي بالطوال
اللحون اشقابها وزريت في ترك اللحن
ما على مثلي ملامه دام في جوفي قتال
بين ياسي والرجا حربٍ شنيعه تطحن
لي ثلاث اعوام والبيدا تناديني تعال
انثر اهمومك على قاعي ودمعك ورجهن
جيتها جيّة مجنا ما يشيل الا الثقال
ما يشوف الا الخصوم وما يشوف الا الكفن
حالتي تشبه لحاله يوم سامرت الليال
امتلى صدره مخافه ومتلى صدري غبن
لا تبعتك يالهدى لاحت بروقك يالضلال
وان تبعتك يالضلال اشفق على ريحة عدن
يا غصين البان ندري ما ورى الفرقا وصال
يا غصن وان كان تدري لا تمايل يا غصن
الله اعطاك الحسن والله عطاني طول بال
لكن البال الهواوي ضيّعه كثر الحسن
ما رأت عيني جمال الا جمالك يا غزال
مرتعه فكري وعيني والضلوع وما حون
ابتدينا من صباح الخير يا كل الدلال
وانتهينا نودّع الفرحة ملفات الزمن