البحيرة والنورس

[حمد الدوسري]

من بغى الفرقا لقى له عذر واسباب ودليل
خل عنك العذر والاسباب دام الحب ضاع
كان ودك بالفراق .. ابشر عسى عمرك طويل
لاتردد وانت لك كلمه ولك امر ٍ مطاع
لي عليك انّك تبّت بكلمة ٍ تشفي الغليل
ولك عليّ اني لأوّقف وقفة الرجل الشجاع
لاتجاملني مخافة ( قال ) مدري خوف ( قيل )
عمر ( هرج الناس ) مايسمن ولايغني جياع
كان قصدك ( سر حبك ) .. اوعدك لأصبح بخيل
واحمل اسرارك معي للموووت قدر المستطاع
بس قلها ... قل ما احبك ... وابشر بصبر ٍ جميل
لاتحسب أني مثل من طبعهم لوي الذراع
صاحبك ماهو كذا ياصاحب القد النحيل
صاحبك طبعه غريب وغربته غربه طباع
في الهوى مايقبل الحل الوسط ولا القليل
مثل ماهو لاشرى يشري .. ليامن باع باع
ثابت ٍ لو هي تميل الارض حدره ... مايميل
يدري ان الفقر ماهو عيب والدنيا متاع
ماعشق لذّة حياته كثر عشق المستحيل
ولا كره حتى مماته كثر كره الأنصياع
كم تعلّم من شديد البدو وش معنى الرحيل
وكم تعلّم من غروب الشمس وش معنى الوداع
وكم تعلّم من سحاب الصيف وش معنى الحصيل
كم تعلّم من ليال البرد وش معنى الضياع
ايه انا هذا طريقي ( موحش .. وصعب .. وطويل )
وانت لامنك تعبت .. العالم فجوجه وساع
اعتبرني في بداية سكّتك عابر سبيل
رح وانا قلبي معك من وين وجّهت الشراع


فهد المساعد

 

[حمد الدوسري]

من يدّثر صوتي الليله ويكسب له ثواب ؟!
مالها يالشعر غيرك أنت ياجبر الكسور
يكفي أني لابكيت بدونك أشعر بإرتياب
وكل ماأبكي فيك أشوفك لي عن اللي فيّ سور
أدري بيوتك عرايا لكن أوزانك ثياب
لبّس جروحي من أحزانك وألبّسك الصدور
كان ياما كان والنسيان للعشّاق باب
عاشق لاشدّ درفة باب صاح بلا شعور :
يقدر النسيان ينزع غصن من فوق التراب
بس مايقدر يقرّب للتراب وللجذور
كيف أبنسى ذكريات الطيش الأول والشباب
ورفقة الليل العتيقه وأول الفجر الطهور
والمواعيد وشغبها والوله قبل العتاب
وساعة كم كنت أحاول في عقاربها تدور
والمكان اللي وهن سقفه من الفرقا وشاب
من بعد ماكان يحضّنا مثل طفل غيور
والمطر لا لوّن الشارع وقلنا للسحاب :
بللّ أيدينا ترى العشّاق أياديهم زهور
كيف أبنسى والرياض لسيرتي مثل الكتاب !
حافظتني بيت بيت و حي حي و دوُر دوُر
من كثر ماكنت أدوّر في شوارعها جواب :
هو صحيح الحب أعمى ! أو عيون الناس عور ؟!
كنت أشوف الحب عذب وهم يشوفونه عذاب !
كان هذا الحب سر ! وقلته وكلي سرور
علمّوني في المدينه كيف لاحبيت أهاب
لكن القريه قمرها قال : كُن للحب نور
في بلادي كنت عاشق بس شاعر بإغتراب !
لين صرت الشاعر اللي تعشقه كل البحور
علمّيني يالقصايد هو خطأ والا صواب ؟!
لارفضت أنسى عيون عشتها شعر وشعور
هذا أنا لحالي هزيل الحال وأشعر بإكتئاب
كن قلبي جال بحر هاجرت عنه الطيور
أجرع الفرقا وأقول الحب عذب وللعذاب
كل قلب لاحرمه الوقت من خلّه يبور

 

[حمد الدوسري]

أسمعك يا اللي تناديني .. يا أبو قلبٍ خلي
بس أنا ماني خلّي القلب لجل اسكت واجيك
الخلي ما هوب قلبٍ من هيامك ممتلى
الخلي قلب آدميٍ شافك ولا هام فيك
إنت زعلان لجفاي .. وما دريت أن زعلي
يوم قلبك ما يبيني .. قد ما قلبي يبيك
حتى لو عيت همومك في غيابي تنجلي
كل هذا ما يساوي لهفتي يوم احتريك
وكان ما صدقت هرجي .. طيب اسمع ما يلي
يا حبيبي يا عسى ربي يحفظك ويهديك
جايز انك في غيابي .. تقلب الدنيا علي
بس أنا من قبل أعرفك .. قالب الدنيا عليك

 

[حمد الدوسري]

جيت مثل الغريب وكنت مثل البلاد
وقمت أباهي وأصوّت يابْلدي يابْلدي
أحسب أني كسبت الكسب يوم الجهاد
وجبت راس العنيد وشلت حمْل ( ابعدي )
وأثر كسبي عيون ماتذوق الرقاد
وشاعر كل ماضاقت عليه يحدي
هيه ياللي بديت بشي مثل الوكاد
وأنتهيت بظنون حاربت مرقدي
أعتبر كل عمري معك كبوة جواد
وألف شكرا على أني صرت اعرف آعدي

 

[حمد الدوسري]

أطارد شمسك اللي لآخر الدنيا بدون غيوم
والى منّي ذكرت اعيونك ومغناي وشراعه
أجي يم البحر واحكيله اوّل ما عرفت العوم
وفوق الشّاطي ارسم وجهك اللي سافر اشعاعه
والى جا الموج يمّي ضمّت ايدي وجهك المرسوم
وطاحت نجمتينٍ مرّت الخدّين مرتاعه
واعوّد للحدايق ما بقى من زادي الا اللوم
أدوّر عن عبيرٍ كم وكم نسمه من اتباعه
أداعب وردها والفل والريحان واليشموم
ولا هو ملمس الورد الطبيعي يا اجمل انواعه
وانشّد عنْك اناشيد وعصافير وشجر وكروم
وكرسي باهتٍ لونه وسبع اخيوط لمّاعه
واشوفك في فساتين وذهب ومعلّق بمنظوم
واخبّر بك سرايا كل سوق وغالي بضاعه
واشيل اوراقك ام حروف وقلوبٍ تشيل سهوم
واغنّي ما طرى واطبع عليه الطاري اطباعه
واعوّد للوساده في مساً ماله قمر ونجوم
اصحّي صورتك من نومها وتفز فزّاعه
أنام بحضنها لين الصباح يقول صحّ النوم
وافيق بوجه نجمٍ من صباح الخير مطلاعه


ناصر القحطاني

 

[حمد الدوسري]

لا سلام .. وكل نذل يحل عني
ما بعد ملت يدي من النظافة
والسفيه اللي من العام متعني
ما ترك حتى النعامة و الزرافة
وان مدح وان سب والله ما شحني
اعتبرته تافه وستين تافه
والقصايد صنعتي والفن فني
والبلد مليان تهريج وطرافة

 

[حمد الدوسري]

الا يالله طلبتك سمعة ماتقبل التهميش
ولو متّ افقر الناس وهلي فقرانه يديها
عسى ماهو صحيح ان المبادي ماتوكل عيش
اذا هو صدق .. أجل عز الله اني رايح فيها

 

[حمد الدوسري]

عمر نثرتيه .. رحت انساك والمّه
والى تذكرتك اذكر عمر تشتيتي
انتي و وقتي وحظي ما لكم ذمه
ياما على ونتي غنوا و غنيتي
واجرحي اللي نفذ صبري وانا اضمه
كيف اتناسى صوابي لو تناسيتي
ما انتي بذيك اللي الشوق اهدرت دمه
وانا اللي اظن بين ضلوعها بيتي
ياليتني قبل اكذّب راعي النمه
سويت في طفلنا اللي فيه سويتي
انا الوفا بين اخوه وبين ابن عمه
وانتي الجفا وبين ما رحتي وحليتي
يمكن نخيتي الزمان وشح باللمه
او شفتي الصدق زودها ومليتي
كذاب لو قلت قلبي راح ما همه
والفين كذاب لو ما قلت حبيتي
ياللي تركتي الهوى غرقان في دمّه
جيتي غريبه ورحتي مثل ما جيتي