لـ خـيـانـة الـتـوفـيــق - الصفحة 3

جمال الشقصي · 10-21-2008, 09:51 AM

:
:
:

[poem="font="simplified arabic,5,black,normal,normal" bkcolor="transparent" bkimage="" border="none,4,gray" type=2 line=1 align=left use=ex num="0,black""]صباحك خير يا جدران حارتنا=مساك أطياب يا بيبان جيراني
فْـ ..بيت جْديد ما يشبه براءتنا=أعيش اليوم حرّ بقيد سجّاني!
تقل بابي يصيح: اشتقت جارتنا=تقل جاري الجديد اشتاق لاكفاني![/poem]

:
:
:

:

جمال الشقصي · 10-21-2008, 12:50 PM

:
:
:
:

أو قول هالشارع:
يكره يشوف أحباب
ما يفهم إن اللي رْكضوا:
طاحوا بْسلال أعناب
يا نورتي:
ما كنت أقولك من ترف
لا صحّ
لا عزّ
وشرف
كنتي تجيني من شوارعنا التراب
خلخالك الصادي ذهب
وحجولك الفضه مهب
وان بان مكعوبك تقل حفلة شهب!
كنتي تدقي الباب من سور السكوت
وآجيك للشارع حبي
ما اشيل لك خام وعِبي
لا ورد
لا شلت لْعبي
جيتك مثل هالشارع الحافي وحيد
مليان باشعار تْهبي!!
:
لكنها أشعار
رغم الضياق بشارعي
كنت أكتب عيونك بلاد
وغبار حارتنا عبير
يا نورتي لو تذكرين:
كل القصيد الباير بعينك حصاد
زهّبْت به ثوب العروس
وجهزّت مهرك بالورق
لا شغل
لا كذبة عرق
جيتك بلا حزمة فلوس
كل القصايد طرحتك
واحزان بيتي فرحتك!
ما كان هالشارع جدار
ولا كان رمله من حديد
كنتي إذا ضاقوا هلِك
وما لاقوا الخبز العفِن
خطّيتي بايدك في رمال الشارع:
إطلع ما اخبلك!!
لا تاكل وبيتي يجوع!
إياك تبلع لقمتك وآنا بطن داري يْهَلِك!
إياك.. تاكل والف عيب!!
ونقول أيادينا رطب
ونقول ناكلها ونطيب!

:

يا نورتي:
هالشارع اللي رتبوه
وبالورد
والأشجار ياما رتلوه
والله ما احسه لاحد
يا كثر ما فوقه أحد
وعْجزت أشوف بزحمته..
لو ربع واحد من أحد!
وينك؟
تجين نبعثره..
ونعاود لحارة شغبنا (ندفره)..!
وش رايك أنوار الشوارع نعتبرها خاتمك؟
والأرصفه وقْع نْسِمِك؟
قومي نقول الجسر هذا.. مع هذاك:
روجٍ سقط من مبسمك!!
:
يا نورتي..
لو تغمضي عينك عنَه
مادام ما هو من رمل
هالشارع بذكرى الحواير نسجنه
ونقول ما به من حديد
لا اسفلت
لا سكة حديد
وَلاَ نِقول بْيوتنا صارت بعيد
إنتي..
وقولي البيت هذا به أنا
وآنا أقول الأرض
كل الأرض
وجهة نورتي

:
:
:
:

جمال الشقصي · 10-21-2008, 10:37 PM

:
:
:

يا حارتي:
قولي لشارعنا الجديد
ما عادوا عيالي هلِك
و(ليلى) وسط لحد الممات
كِنّ أوْصَت صغار الحواير تجهلك!
يا حارتي..
رتبت أنا البيت الجديد
ولوّنت جدرانه من دهانٍ وحيد
لكن تعبت أستقبله
عيدية أطفالٍ حبوا
أو عطر في شال البنات
والله تعبت أستقبله..
لو وهْم.. عيد!
:
:
يا حارتي:
وش حال شارعنا التراب؟
واطلالنا برمل الخراب؟
وش حال خطوة فجرنا
للمسجد بساعة ثواب؟!
:
يا حارتي.. صار الكلام
كنّه جبل
وصوت النشيد اللي تعلكته سنين..
عاقِد على لساني حبل!
:
يا حارتي..
هالشارع بحيي الجديد
والله تمنى يمسكك
ياكل غلاك ويعلكك
يطلب يديك ويشبكك
عاجز يجي بثوب الزفاف
مادامت أرْصفته حديد
والزفت الاسود مو نفاف..!!

:
:
:
:

جمال الشقصي · 10-22-2008, 04:28 AM

:
:
:

يا حارتي الظلمى.. باروح
بعض المآذن كافره
كل المشاوير البريئه ناب في خصر الطموح!

:
:
:
:

جمال الشقصي · 10-23-2008, 12:26 AM

:
:
:

يالشارع المهدوم
كل النواصي لك قصيد
والذاكرة صوبك.. تحوم!
تْصدّق إني في الشمال:
كل ليل.. في حلقي الجنوب!
كل صبح.. أغرغر قلبي بحبك.. واذوب
أغسل بذكراك الحديد
والشارع بحيٍّ جديد
أكتب لك رْساله قبل لا اغفى وانام
واقول يا جدراني لو تترجّلي
عن سور.. عن غرفة مبات
وآنام في ذكرى البنات
اللي ركضت مْن الطفوله بشالهن
وطحنا بجميع الذكريات
بالشنطه..
بالثوب القديم
بالخبز الاسمر.. والشتيم!!
بالباص قدام البيوت:
لما يمر غبار حارتنا غبش
ويصحّي الطلاب من بيت ونعِش!!
:

يالشارع بْحيّي الجديد..
لا ما تعبت أتأملك:
ليش انت بعيوني الوحيد؟
وانت الوحيد اللي اجهلك؟!!
:
:
:

جمال الشقصي · 10-23-2008, 03:08 AM

:
:
:

الساعه خمس.. إلا رِبِع
محْدٍ طرق بابي
واخوي محْد تذكّره
العاده عصرية زمان
الساعه خمس إلا رِبِع
نلعب كره!
:
يا لون من زفت وسواد
أدمنتك العصر بمسير
طفتك مع الليل الأخير
طرتك تقل عصفور مشتاق الشُّرَف
أو قزةٍ تنعي الحرير
يوم انحطَب فرصادها..!!
للسوق للمقهى الرخام
رحتك وجيتك طول عام
كني ولا مره خرجت
كني فـ بيتي بطول عام!
:
:
:
ما جيت أباطلب حارتي..
بس (سارتي)..
تطلب رمِال ألعابها
و(شيخه) تخاف ثيابها..!
ياللي سرقت رجولهن
ضيّعت رقص حجولهن
وعلّقت هالثنتين دمعه للصباح:
تبكي على مريولهن!
:
:
:

جمال الشقصي · 10-23-2008, 04:15 AM

:
:
:
:

يا شارعي:

:

[poem="font="simplified arabic,5,darkblue,bold,normal" bkcolor="transparent" bkimage="" border="none,4,gray" type=2 line=1 align=right use=ex num="0,black""]ما على الأوطان شرهه.. يالمقام=يسجن الله النبي في بطْن حوت!*[/poem]

* أحمد السعدي: من نص ـ سكوت
:
:
:
:

جمال الشقصي · 10-23-2008, 05:26 AM

:
:
:

يا امّايتي:
ما ابي الحديد غْنايتي
مشتاق أقول إن التراب:
خصلة زهور مْن الشفق
محتاج أردد للتراب:
لا ثوب بالفقر انفتق!
محتاج أعمر هالتراب:
صوتٍ من الشعر انطلق!!
يا امّايتي كان وْلدِك
لا مرّ سكة صاحبيه..
يترك على رنة جرسهم عطر اديه
اللي من الخبز العجوز
باقي يفوح بوالديه
يا امّايتي الغربه بلد؟
والا البلد سجن الطريق؟!
مليت أرتب له سكيك الحاره الأولى شعر
واهدي له عيوني فجر
وشفاي له حزمة نصر
يا امّايتي وش ما عطيت؟!
واللي خذيت:
شارع سواده مو كحل
شارع على عيني انقفَل!!

:
:
:
:

الذين يشاهدون محتوى الموضوع الآن : 1 ( الأعضاء 0 والزوار 1)