(........................ ) يتصل بك ...!!

[علي المحمد]

[ 19 ]


( نايف ) يتصل بك ....




نايف : هلا علي فيك شي

علي : لا مافيني شي ليه تسأل غريب سؤالك ؟

نايف : اليوم ليه ماجيت للاستراحه

علي : تبي الصدق يانايف ما احس الدنيا لها طعم ولا احس لها لون

نايف : تعوذ من الشيطان ان شاء الله الأمور بتكون أحسن

علي : ان شاء الله

نايف : بتجي باكر

علي : اذا الله أحيانا جيت

نايف : طيب وين رحت اليوم

علي : رحت اشوف الفحل ( رمان ) حق عبدالعزيز بن فهد

نايف : وين تشوفه

علي : بمخيم عمي عبدالله

نايف : لقيت احد بالمخيم يوم رحت !!

علي : لا ماكان فيه احد جلست لحالي لين ذبحني البرد ورجعت

نايف : انت يبي لك جلسه خاصه لازم اشوفك واحكي معاك

علي : ابشر يانايف

نايف : انتبه لنفسك ... تصبح على خير

علي : وانت من اهله

 

[علي المحمد]

( عبدالكريم ) يتصل بك ....



عبدالكريم : السلام عليكم

علي : وعليكم السلام هلا كرووووم وش اخبارك

عبدالكريم : بخير يالغالي انت اخبارك وين هالغيبه انت للحين بالدنيا

علي : لا بالآخره طال عمرك

الحمد لله لازلت بالدنيا .... انت وينك فيه ... بالدنيا بعد

عبدالكريم : هههههههههههههههههههههههههههههههههههههههههههه

عساني ما افقدك يالنتفه

اخبار الاهل واخبار اخويانا اللي كانو معنا بالدراسه

علي : الاهل الحمد لله كلهم بخير ... واخويانا اللي بالدراسه منقطع عن بعضهم ... وبعضهم ما اشوفه الا مرات قليله

عبدالكريم : الحمد لله عساه دوم يارب ... على طاري ايام الدراسه تذكر واحد معنا كان ايام الثانوي اسمه عبدالعزيز كانو يلقبونه عميد ثانوية الاندلس

علي : ههههههههههههههههههههههههههههههههههه ايه اذكره فديته ... هذاك يحلفون انه بالثانويه من ايام الدوله العثمانيه مو قادر ينجح

عبدالكريم : ههههههههههههههههههههههههههههههه قويه الله يرج شيطانك ... تصدق اليوم قابلته بالبنك عندي وسألته عن اخباره وقال انه بخير وانه يشتغل اعمال حره

علي : الله يوفقه يارب ... يستاهل لانه انسان كافح واجتهد ... ربي يزيده من خيره

عبدالكريم : امين ... اخذت رقمه وبعزمه الاسبوع الجاي وابيك تكون موجود

علي : والله ما اوعدك لكن ان شاء الله بكون موجود

عبدالكريم : ربي يحفظك

علي : وش تقصد يحفظني يعني ياخذ وداعته واموت

عبدالكريم : هههههههههههههههههههههههههههههه لا اقصد يحفظك من كل شر ويخليك لاهلك واللي تحبهم ويحبونك

علي : وانت بعد ربي يحفظك

عبدالكريم : ههههههههههههههههههههههههههه وش تقصد

علي : ماني معلمك

عبدالكريم : عساني ما افقدك يارب

علي : آمين و لا افقدك يالغالي

عبدالكريم : لا تنسى وعدنا وفمان الله

علي : ان شاء الله ... ربي يحفظك

عبدالكريم : هههههههههههههههههههههههههههههههههههههههههههههه

آمين وافتك من هبالتك

علي : استغفر الله والله اني احبك وما اقصد ربي يحفظك انك تموت ... واذا منت مصدق ... الحين موت ... وشوف من اكثر واحد يبكي عليك

عبدالكريم : هههههههههههههههههههههههههههههههههه الله يبارك لنا بأعمارنا ويحسن خاتمتنا ... نبقى على اتصال ان شاء الله

علي : امين ... ان شاء الله يالغالي

عبدالكريم : فمان الله

علي : في أمانه

 

[علي المحمد]

( خوخه ) تتصل بك ...

خوخه : ههههههههههههههههههههه خخخخخخخخخخخخخخخخخخخخ يقولون ان اصبع رجلك مكسور

علي : ايه الله يكسر اصبع زوجك

خوخه : ههههههههههههههههههههههههههههههههههههههههههههه آمين

علي : هههههههههههههه ليه ليه تبين فزعه والا شي

خوخه : لا ما أبي منك شي داقه عليك أبي أتشمت وأسأل عن أي أصابع رجلك اللي مكسور ؟؟

علي : الإبهام

كنت العب كوره أنا و أخوياي و يوم جيت اشوت الكوره حط واحد منهم رجله قدامي وجت رجلي برجله حسيت اني شايت ماصوره

وقتها أتذكر ان النبض نزل من الجهه اليسرى بالصدر وبقدرة قادر صار الابهام ينبض من شدة الألم

والله اذا تبين تدعين على أحد قولي الله يكسر ابهام رجلك

ههههههههههههههههههههههه رحت المستشفى وكفنوه لي ... مرات أطالع فيه و أقول مسكين مكفن ومره أطالع فيه و أضحك صاير كأنه أسير عراقي حاطين على راسه كيس أبيض

خوخه : ههههههههههههههههههههههه ماتشوف شر ولا عاد تلعب مع مواصير مع السلامه

علي : هههههههههههههههههههه مع السلامه



إلهي لقد مننت علي و وهبتني بأغلى من كنوز الدنيا أناس أرق من الزهر و أنقى من الماء العذب

أرى فيهم براءة الحب وسلامة القلب ... اللهم إكتبهم من عبادك المخلصين ممن أحببتهم وذكرتهم فيمن عندك

ولا تحرمني منهم ولا تحرمهم مني ... آمين

 

[علي المحمد]

( نايف ) دقيت عليه وابي أقفل عشان يكلمني وبسرعه رد ودايم يسوي ذا الحركه عشان يقهرني ...


نايف : هلا بخال العيال

علي : خال ان شاء الله يدبجك لين يليًن عظامك ليه ترد يا نذل يالله بقفل وإرجع دق وبعدين كم مره قلت لك لا ترد

نايف : ههههههههههههههههههههههههه طيب قفل وبدق

نايف رجع يتصل مره ثانيه

نايف : ألو

علي : هلا أخبارك

نايف : تمام ولابس فروه ... و أنت أخبارك

علي : تمام ولابس هيلا هوب ... الحين انت و وجهك انا سألتك وش لابس !!

و إلا بتعلمني إنه عندكم برد .... والله لو يجيكم نصف البرد اللي عندنا الحين كان ما تقدر تطلع من البيت

ما فيه فرق بيني وبين ابو الهول دايم قاعد بالبيت الدنيا ثلوج ودرجة الحراره اليوم -14

نايف : خلصت كلامك !! وش لون الهيلا هوب اللي لابسه يا أبو الهول

علي : ههههههههههههههههههههه لا تستخف دمك ياعساني أشوفك منتدب بالأسكيمو اسبوعين و يلعب البرد بعظامك و ماتاكل الا تونه

نايف : ههههههههههههههههههههههههههههههه وش تبي داق !!!

علي : ابي ترسل لي بطانيه بطانياتهم ما تزبن والله ماعاد صرت اقدر انام من البرد وأبي ترسل مويه مقري فيها و أبي عشر كروز مالبورو

نايف : ليه المويه المقري عليها ؟؟؟

علي : العجوز البريطانيه اللي ساكن عندها ماهي مضبوطه قبل يومين لقيتها تسولف مع نفسها قعدت أطالع فيها قلت الحمد لله ولك الشكر وش فيها هذي

كأني سمعتها تقول محد صديقي إلا أنا ... وما أحب إلا أنا ... و الدوري السنه هذي نصراوي

نايف : هههههههههههههههههههههههههه لو سمحت لا تطقطق على العالمي يالمحلي

علي : ههههههههههههههههههههههههههه المهم بجد اتكلم أرسل لي الأغراض اللي قلت لك

والمويه المقري عليها أبيها ضروري لانه فيه واحد عراقي معاي في بريطانيا يقول انه تعبان شوي ويحس بكتمه دايم تجيه بصدره

مابي أطول عليك سلم لي على أختي و على أهلك

نايف : يبلغ ان شاء الله ... في أمان الله

علي : في أمانه

 

[علي المحمد]

.......................... محد اتصل .........

 

[علي المحمد]

( نايف ) يتصل بك ...

نايف : السلام عليكم .. صباح الخير علوش

علي : وعليكم السلام .. هلا نايف ... مدري ليه حاس انه وراك مصيبه بسرعه انا طالع من الفصل عشان اكلمك

نايف : أبد داق ابي اتطمن عليك وابارك لك بنجاح البنات

علي : الله يبارك فيك

نايف : جالسين نحش فيك انا والعيال بالاستراحه سامحنا

علي : يارب يارب يارب اشوفكم تبيعون فول وكبده وكشري بميدان التحرير بمصر

ويبقسونكم ذا المصاريا تبقيس لين ترجعون للسعوديه بإخلاء طبي و معاكم حسني مبارك

نايف : ههههههههههههههههههههههههههههههههههههه بقول كلامك للعيال

علي : قل لهم وقل لهم بعد اني ماني مستقبل احد بلندن وقل لبدر بالذات تذاكر مباراة مانشستر اللي حجزها لك علي بتروح عليك

نايف : هههههههههههههههههه ما تنتحارش على فكره ترى امك بتجي الشهر الجاي لندن

علي : لا لا قلها لاتجي تكفى قبل شهر كانت بمصر و انقلب الشعب على حسني اخاف تجي هنا و ينقلبون على اليزابيث

نايف : ههههههههههههههههههههههههههههههههههه يا داشر والله لا اعلمها

علي : ههههههههههههههههههههههههههه امزح ورب البيت ... الله يخليها لي بس ما ودي تجي هالوقت لانه برد عليها وما ابيها تجي و تتعب

احسن وقت بعد شهرين من الحين بيكون الجو رايق يا نايف

نايف : تقول انها بتجيك ودها تشوفك ومنها تغير جو

علي : انت خلها تجي اذا ما خليت برقعها يرفرف بأعلى قمة لندن آي ما أكون ولد محمد وبخليها تحظر مباراة للمان يونايتد وبلبسها شال الشياطين الحمر

نايف : ههههههههههههههههههههههههه والله ياعلي اتحداك

علي : زين الايام بيننا ... يالله اكلمك وقت ثاني و لاعاد تدق علي هالوقت لاني اكون بالفصل

باي

نايف : باي

 

[علي المحمد]