ولا هنا...ولا هناك!

[مسفر الدوسري]

مساؤكم نابض بالحب وأغاني السواحل المنداة بالحنين.

ولا هنا..
ولا هناك..!
معلّقه..
بين كل شي..وضده..
في هواك!
بين الشموع اللي تضوّي الذاكره..
وبين: ...كل شي فيني نساك!
بين النهار ..اللي يقود..
كفوفي العميا...لنهار
وبين الظلام اللي يودّي خطوتي..
لعتمة سماك.
كل مابديت..
ألمس طرف جمرك ...لقيت..
كفك رماد
بردك خذاك
وانتي هناك..
معلّقه..
بين المطر... وجْروح ظماك.
بين صوتك المليان عشب..
وبين العطش..
بحروف صداك
لا انتي هنا
ولا هناك!
أفتح درايش اشواقي عليك
ألقاك دخلتي.. ومادريت..
من يجيبك الهوا..
ورده..
وينسى لايجيب..معاك شذاك!!!
أحس بانفاسك ...ولا ..
أشوف ملامح صورتك
ولا ..دفاك.
أحاول أتذكر ...عيونك
لونها
ولا اذكر إلا مابقى.. من كحلها
وليل(ن) قبل تسرين...سراك!
مرّات أحس ..مشتاق لك
وأدوّرك
مره بدفا حضن الوصل
ومرّات أروح برد الجفا
مالك أثر
مدريتي جفيتي الأمكنه
ولاّ المكان اللي ..جفاك؟!!!
لا انتي هنا..
ولا هناك!
من يوم تفارقنا أخذتي كل شي
أخضر معاك
ولا تركتيلي وراك
إلاّ التفاصيل النحيله في يدي
وبعَض حكي..
أصفر.. ولا يشبه رضاك!
كل مانسيتك..أذكره
كل ما غفيتك ..أسهره
وانتي بقيتي معلّقه..
مابين صباح الذاكره
ومابين ..مساك!
بعضك معي..
وبعضك ..معاك
لا انتي هنا..
ولا هناك!!!

 

[نور]

هنيئا لي بأول الردود دائما على ابداعك,,



لا تتخيل مدى فرحتي بهذه المرتبه



وهنيئا لنا عودتك من جديد ,,



وهنيئا للقصيده بشاعرها ,,,



نور..

 

[عبدالعزيز الودعاني]

معلقّة إحساس بأرق الأجراس

القامة / مسفر الدوسري

لم تجعلنا هنا ولا هناك

أصبحنا ( معلقين ) لتشرب خمرة هذا النص أكثر وأكثر

ولن نرتوي

 

[عبدالعزيز رشيد]

مسفر يامسفر
كم نحن محظوظين بك
رومنسيّة سخيّة تتقطّر من حرفك
كلّ الشكر لك

 

[لمى السويدي]

.
.

وأخيراً

إنسكب العطر

بعد طول غيابـ

,
,
حتماً لي عوده

تليق بِـ

العملاقـ

وحرفـه


,
.

 

[مشعل الوسّامي]

مسفر الدوسري ......

اسم عالق بالذاكرة منذ زمن ............

دعنا نتلذذ بما تيوح به ......

 

[ريم علي]

المبدع الى ماله حددود
مسفر

شكرا لانك ترتقي بالشعر من اجلنا

تحياتي

 

[وجدان الأحمد]

العذب / مسفر الدوسري



إفتقدنا هذا النور وهذا العطر ..

هنيئًا لنا بعودتك ..

وحدك يا مسفر تكتبنا ..

ترسم أحاسيسنا ..

أعذب من يصف الغياب أنت ..

و أجمل من يكتب الشوق أنت ..

وحدك تتفرد بكلام لن يكتب أعذب منه ..

لا عدمنا حضورًا كـ حضورك ..

ألف شكر لقلبك ..

ودمت بألف خير ..