فايق عبدالجليل ـــ يعودْ ولَكِنْ !!

[حنان محمد]

بقولها الليله
بقولها
واهدم جدار الخوف
بيني وبينها
عدى علي الوقت
بين انتظار
وصمت
ابعلن عليها الحب
واسمع ردها
يالطيف
الطف علي بردها

حبيبتي
اخر محطه بدنيتي
انا عندي احساس
انج تستشفين المعاني
انا عندي احساس
انج تعرفين شلون اعاني
في زياراتي
بسلامي
في كلامي
في ضياعي
فارتعاش الكف
وانتي في وداعي
وعدى علي الوقت
بين انتظار
وصمت
ابعلن عليها الحب
واسمع ردها

بقولها الليله
وباي ثمن
ابعلنها في سمعك
وفي سمع المحبه والزمن
واكشف لك السر
اللي في عمري اندفن
لو انتي ريح بارد
بعز الشتا
انا اخطفك
لو انتي نغمه شارده
اركض وراك
واعزفك
جيت بشعوري
اعرّفك
جيتك انا مجبور
مالي اختيار
جيتك انا
بسدل على صمتي الستار
وعدى علي الوقت
بين انتظار
وصمت
بعلن عليها الحب
واسمع ردها
يالطيف
الطف علي بردها

 

[حنان محمد]

(( آن الأوان ))

مثل ما ياخذك النسيان
أنا مثلك أنا انسان .. وهم أنسى
أنا وقت التعب .. مثل السفن
لي شافت المرسـى
يا مخدوع في فرحي .. أنا في ضحكتي جرحي
وأمامك كلمتي خرسى

ناديتك .. بصوتي المتعب الولهان
ناديتك .. وانتظرت سنين
ناديتك .. وصوتي والصدى للآن
ناديتك .. لا حسيت ولا رديت
وصوتي والصدى للآن
غيابك .. وصل أفراحي إلى الأحزان
أشوفك راحتي .. ومنك أنا تعبان
يا مخدوع في فرحي .. أنا في ضحكتي جرحي
وأمامك كلمتي خرسى

آن الأوان
انا بارتاح من ياسي
من خوفي أنا .. انا بحاجة لأمان
وداع يا شوق .. يا ذكرى
وداع .. يا زمانٍ كان
وكل اللي أقوله الآن
أباركلك النسيان
يا مخدوع في فرحي .. أنا في ضحكتي جرحي
وأمامك كلمتي خرسى

 

[حنان محمد]

رقم هاتف ))

بقى عندي رقم هاتف
وحراير صوتها عاصف
وشريط يدور مع الكلمات
غصب يمشي على الآهات
وقيثارة بلا اوتار
ومجلد للشعر .. خالي من الأشعار
وبلابل حب في وسط المطر .. يبكون
وصور اطفال .. حبوا وهم يدرون
ياللي ادورون عن حبي وسط كتاب
الكتب ما تقدر .. تصوّر ألم الأحباب
شعري ضعيف مهما يطول
ما يقدر يصوّرني
وكلامي مكسر .. مشلول
حروفه ما تساعدني
وانا في الوجود قصه خياليه
وصدى أيتام مظلومين
وجسم ذايب .. قريب يزول

 

[حنان محمد]

دنيا يسر
دنيا عسر
يابسهم اللي ينكسر
باكر يعيش اللي يعيش وباكر يموت اللي يموت
الله واكبر هذي الحياة الواحد اقوى من العشر
والاف يعادلهم صفر
لازم نعيش لازم نمارس المد والجزر
كل الشواطئ يوم بكت خطت على الساحل شعر
ولا تحزنوا باكر مراكبنا تمر

فايق عبدالجليل

 

[حنان محمد]

بكل طيبة عشاق
اطلب ننتهي
سافر وغيب وننتهي
بتشوف ناس
وتحب ناس
وتنسى
واصير بدنيتك واحد من الناس
كنت اتصور اني لك
كنت اتصور
وانت عارف منزلك
جدت ظروف
وعينك تشوف
صرت بصعوبه اقابلك
صرت بالم اشتاق لك
بتشوف ناس
وتحب ناس
وتنسى واصير بدنيتك
واحد من الناس
سلمت انا
مالي انا غير الصبر
اه لو تدري
بعد هذا العمر
اسمك اذا مرني
يعطرني عطر
اه ياكل العمر
كون بمكاني
وتشوف عانيت شكثر
بتشوف ناس
وتحب ناس
وتنسى واصير بدنيتك
واحد من الناس

 

[حنان محمد]

( خيال شاعر )

انا شاعر ..
اسهر الليل الطويل
اكتب شعر
اصور الدنيا
مثل ما اشتهي
وما افتكر
ازرع نجوم السما
بوسط السما
بعز الظهر
ابدل الليل وسواده بالفجر
اسافر الهند
وكراجي كل عصر
الهوى في كل صدر
اوصف الدمعه البريئه
من قبل ماتنحدر
اخلي ايام الربيع
ما تنتهي طول العمر
اذوب الدنيا الكبيره .. في سطر
اشيد اروع معجزاتي
في القلم
ويّا الحبر


( طفله )

قاعده على العتبه
جنج ارنبه حلوه !
...... جنج ارنبه !
والكون كله مبعثر وفرحان
الا شعرك الحزنان
في بحر السواد غرقان
طويل جنه غصن نيسان
ومشطج الازرق الزاهي
سفينه في وسط شعرك
بلا ربان

 

[حنان محمد]

انانيه . . .
انانيه . . .
معاي انا . . .
انانيه
تخشين العيون السود
بس عني
تهدين الليالي السود
بوشيه
وانت زين اتعرفيني
احب الليل في عيونك . . .
بدون حدود
اسجد له . . .
بدون حجاب
عشان الليل من طبعه
ما يرتاح . . .
الا في عيون انسانه شرقيه . . .

(( 2 ))

ياليت اقدر
اقضي كل حياتي
في الليالي السود . . .
. . . اتجول
وامشي الليل في عيونك
وانام الليل في عيونك
واعيد الدرب من اول
ياليت اقدر
اذوب نفسي في عيونك
عشان ارتاح
عشان اشعر . . .
فعلا في العيون السود
عذابي راح
عشان المس خيوط الليل
عشان انسج لي خيمه هناك . . .
. . . ورديه
واصلي لليالي السود
. . . والقدره الالهيه

(( 3 ))

انانيه . . .
انانيه . . .
مدري ليش انانيه
مدري ليش تخشين
القصيده الحلوه في عيونك
مع الاوزان ليليه
انانيه
حقي لو اقول انا . . .
انانيه
عشان انتِ
تذوبين البشر كله
ولا تحبين . . .
وكل قصة هوى عندك
. . . خرافيه !!

 

[حنان محمد]

اتعبت ايدك
وشكى خدك
وبدا ليل الهوى
يبكي على ودك
كفايه افكار
ريح ايدك وخدك
وخل الحب . . .
. . . يعيش للحب
وعيش انت . . بعيد وحدك

طريق الحب بعيد مجهول
بعيد في دنيا مجهوله
ارجع لا تحاول فيه
بكوا كل اللي راحوا له
هذا الحب . . .
قصه مسطره بالشوك والاشواق
هذا الحب ياما عذب العشاق
كفايه افكار
ريح ايدك وخدك
وخل الحب . . .
. . . يعيش للحب
وعيش انت . . بعيد وحدك

حبيبك خان
وهداك الذكرى والحيره
ومحه اسم الهوى والشوق
من قلبه وتفكيره
وانت في الهوى بعدك
تحط ايدك على خدك
كفايه افكار
ريح ايدك وخدك
وخل الحب . . .
. . . يعيش للحب
وعيش انت . . بعيد وحدك !!