قصيدة | قلعة الشيطان |
وانا طفلٍ تسولف جدتي عن قلعة الشيطان
تقول اللي ينام وما يسمي ينسجن فيها
واغمض عيني مْن الخوف وألقاني ورى القضبان
أراقب شمسي الحمراء تلوّح لي بـ أياديها
سجنّي الوهم في سجنٍ قديم وكانت الجدران
عليها صورة القلعة ورسمة وجه راعيها !!
بكيت وكنت طفل وما اتحمل صفعة السجان
تشب النار في جفني ولا ادري كيف اطفيها
وكبرت ولا يزال الطفل في قلعة بلا عنوان
سجين الذكريات اللي يجيب الهم طاريها
أنام وكل حلم يمرني متضايق وتعبااان !
يمد يديه لجروحٍ على وجهه يغطّيها
واسافر في خيالي خطوتي هم وندوب أحزان
ورياح الموت تتبع جرة أقدامي (وتحييها!)
وصلت لقلعة الذكرى عليها من ملوك الجان
رجالٍ يحرسون أسوراها وتراب أراضيها
تسللت وعبرت وماحدٍ لاحظ وجود إنسان
اظن جروحي اخفتني كثر ماكنت مخفيها
دخلت وشفت طفلٍ كان دمعه يحرق النيران
معه طفله تلحّن له جروحه ثم تغنيها!!!
معه طفلة غرام وقصة أحلام ويباس أغصان
معه عمري معه من خانت دروبي خطاويها
تناظرني كبير وتبتسم واضحك بدون ألوان
وتناظرني صغير وتبتسم وابكي وأبكّيها
تسافر دمعتي تنزف جروح ويحترق بستان
واعزّي الطفل واحضنها على صدري وأعزّيها
واقول إليا كبرتو مرّوا بقبري وقولوا كان !!
يعيش بغربة آمالٍ تعب يعطش ويسقيها
وأنا ببقى هنا واتحمل الصفعة من السجّان !
واموت بقلعة الذكرى الحزينة وأندفن فيها
آخر المشاركات
07-02-2022, 11:27 AM
قلعة الشيطان
العرض الشجري