(( ^_^ )) من غير ليــــه خلوني أكتب اللي أبيه !!!

[علي المحمد]

(1)

كان فيه شايب عنيد .. وراسه يابس
هذا الشايب (أعور) وعينه الزينه بها عمى ألوان والشوف عنده شجر
يعني من جميع النواحي دعواه محيوقة ورايح فيها
المهم إن خوينا هذا كان جالس هو وكم شايب على وقت أذان المغرب
إلا يوم شافوا سيّارة جايـتهم من بعيد ... وتعرفون الأوليّين فيهم هياط وطفاقة
فترّوعوا الشيبان قالوا ذا شكله يبي يدعـسنا وراح يواسينا بالارض
قالهم عوير اللي هو "بطل القصة" ياناس هذي مو سيارة هذولي (دبـّابين يتسابقون ) قالوا له الشيبان : من زين عيونك أنت ووجهك .. تبي تعلمنـّا بعد !!
المهم إن (عوير) قام يبي يثبت لهم إن هذي الأنوار اللي يشوفونها مو أنوار سياره .. وإنها (أنوار دبابين يمشون جنب بعض) وهو اللي يوقف قدام السيارة ويتوازن ويجلس في (النص) بزعمه يبي يدخل بين الدبـّابين !!
ولا أردى من شايبنا إلا اللي (يسوق السياره) !!
و شوي إلا يوم نشبت خشة عوير بـ (أديتر السيارة) !! بس ربك ستر .. ولا مات !!
المهم يوم خف العج ... جو لمـّه الشيبان اللي معه ... وهو يوّن !!
قالوا له (شفت إنها سيارة) !! ( يتشمتون بعز مصيبة الرجال طيب قولو سلامات )
قال لهم عوير : أقول لكم (دبـابين ) وفيه (دباب ثالث في النص بس إنه مطفـّي النور) !!( عوير مافيك حيله هههههههههههه ياليل الثقه )

فأمثال (عوير) - للأسف- كثيرين ... و حوّمو كبدي وكبد صديقي مغاط وكبد صديقي مفتاح 14 وحوَمو كبد صديقتي ليمونه وصديقتي مناكير ... ويمكن يقتنع عوير وهم ما اقتنعوا

 

[علي المحمد]

صديقة صديقتي ليمونه أرسلت رساله لـ ليمونه تقول :

( علي المحمد معقد ومغرور وشايف نفسه ) الله يسامحك بس


نجي لكلمة ( معقد ) وعشان ماأظلمك لازم أعترف إني :

إذا مشيت على بلاط أحاول ما أوطى الخطوط اللي تفصل بينهم وهالشيء مضايقني كثير ..
واذا وطيت الخط أحس اني رقله وما أعرف أمشي


نجي لكلمة ( مغرور و شايف نفسي ) :

ايه مغرور ولا عمري سبعت المواعين مع امي
ولاعمري شلت الاغراض مع سواق البيت
ولا عمري غسلت حوش بيتنا و لا عمري سويت استشوار لخواتي الصغيرات
وماعمري اخذت قدر فيه رز ودجاج ورحت اوديه لسواق جارنا ابو عبدالله
ودايم صالح العرجان يدق علي ويقول تعال سير علي بالجبيل وانا اقول له من انت عشان اجيك
اللي يبيني يجيني
ومن قوة الغرور اللي فيني حاط اغنية احلام قول عني ماتقول نغمه للي يتصل على جوالي

أي غرور وأي شوفة نفس بس قسم بالله من قوة التواضع تراني آكل بدون ملعقه





طبعاً ... ماخفي كان أعظم وأطعم
على فكره الغرور يصبح جميل إذا غلف بالتواضع وحب الآخرين

 

[علي المحمد]

اليوم راح أحكي عن أصدقائي ابو رهف الملقب بـــ ( مفتاح 14 ) و صديقي الآخر مغاط



مغاط وابو رهف توهم طالعين من مطعم الكرم البخاري وضاربين حبتين شوايه مع الرز وشاربين لبن

ورايحين لشقتهم ناوينها نومه كالعاده لين صباح اليوم الثاني




( أبو رهف داج بقووووه وراتبه 2000 ريال ومغاط يسمونه الشله كاااااش مان هو الوحيد اللي يبقى معاه راتبه ( 4900 ريال ) لين قبل نزول راتب الشهر التالي بأربع أيام يعني لاتحسدونهم تحسبونهم كل يوم يتغدون بمطعم الكرم البخاري ... مصادري الخاصه تؤكد لي أنهم قبل نزول الراتب بأربع أيام وجبتهم الرئيسيه ( خبز و شطه كريستال فقط لاغير ) فطور وغدا وعشاء
وبعض المرات تلعب فيهم الدنيا ويصير آخر يومين قبل الراتب ( شاي ودخان فقط) لين ربهم يفرجها )




نكمل سالفتنا بعد ماطلعو من المطعم ركبو سيارتهم وهم رايحين للشقه :


أبو رهف : مغاط لو سمحت وقف عند المحطه بشتري ( بكت دخان وبطاقة سوا )


مغاط : طيب بسرعه لا تتأخر وجب لي معاك ببسي أحس إن الدجاجه حيه وتبقبق ببطني


أبو رهف : هههههههههههههههههههههههههههه الله يرج ابليسك حالتك صعبه

دق على خويتك نوره ( مغاط يدلعها ليمونه ) شف تبي شي والا ماتبي أنا بجيب للرجه ساره ( ابو رهف مسميها مناكير ) بطاقة سوى


مغاط : أقول انزل لا ارجفك من الباب .... انت ووجهك ليمونتي ماتبي شي يرحم والديك لا تتأخر




طبعا أخذ ابو رهف الحاجات اللي يبيها من البقاله اللي بالمحطه و ولع زقارته وحس ان الدنيا قامت تدور براسه وقام يصارح مغاط ويقول له :

يامغاط انت اعز انسان عندي بالدنيا وانا بصراحه ما اتخيل ان علاقتنا تنتهي مادمنا على قيد الحياة ( قيد الحياة مو قيد من ورد )



مغاط قافله معاه الاشاره حمراء ويبيها تفتح بسرعه مو يم ابو رهف أبد ولا جاب لكلامه خبر

ولعت الاشاره خضراء والسياره اللي قدام سيارة مغاط واقفه ماتحركت



مغاط علق البوري طاااااااااااااااااااااااط طاااااااااااااااااااااااااااط

وانهبل وانفعل وقام يلجج بالسياره

يوووووووووووووووووه هذا ليه مايمشي والاشاره خضراء



أبو رهف بيده زقارته ويمزمز فيها ومرووووق وحاط رجل على رجل وقاعد يهدي مغاط ويقول : يامغاط انت بالسعوديه وسع صدرك تلقاه مطفي السياره عشان ينظف إذنه بالمفتاح


مغاط : هههههههههههههههههههههههههههههههههههههههههههههههههه ههه

كل تبن بس مو وقتك ياماصل أنا شوي وانهبل وانت قاعد تنكت



ابو رهف : يابن الحلال كل شي الا زعلك يا مغاطتي تبينا ننزل الحين ونصهمده بمفتاح العجلات
لين يتواسى بالارض والا نعطيه مساج بعقالك يامغاط لين ماعاد يسوق الا جنبه منظف اذن ويبطل يستخدم المفتاح عند الاشارات



مغاط : هههههههههههههههههههههههههههههههههههههههه خلاص بس اسكت


ابو رهف : الظاهر انك نسيت يوم يدبجوننا راعين الفوال بالمغرفه وعصا الجره حقت الفول

كله منك لانك دايم عصبي ودمك حااااااااار ياخي روق واذا بغيت شي إطلبه بأدب



مغاط : ههههههههههههههههههههههه ايه اذكر مانسيت يوم قابلنا العيال قلنا قالبين بالدباب



ابو رهف : عيال مين يالعين الحين ليمونه خويتك صارت عيال وقايلها قالب بالدباب


مغاط : أقول انزل وصلنا للشقه


ابو رهف : نزل من السياره وصك باب السياره بقوه من قوة تسكيرته لباب السياره باب مغاط انفتح


مغاط ( وعلى وجهه علامات التعجب و الذهول ) قال منفعلاً : ياكــربه / يادرج / ياعربجي / هذا باب كامري مو باب شيول بشويش اذا جيت تسكر الباب عسى ايدك للكسر


ابو رهف : استغفر ياطخمتي لا اهبدك بالجوال على وجهك


مغاط : ههههههههههههههههههههههههههههه ياليل البعارين انت بتجيب لي الجلطه

طيب يا العله استغفر الله ولاعمرك تتعودها


ابو رهف : وقد بانت نواجذه من شدة الفرح ردد قائلاً ( يلموني حبيبي فيك بصراحه قمة الروعه ... أنا والله من شفتك دخلت بقلبي بسرعه )


وصلو لباب الشقه مغاط يقول لأ بو رهف افتح الباب بسرعه ابو رهف يدور المفتاح بجيوبه

ابتسم بخبث وبراءة المجرمين وقال :

يامغاط يابعد قلبي أنا حاس فيك لكني نسيت المفتاح بالكامري امسك نفسك شوي وتحامل على بطنك بنقز للسياره وبجيبه


أخذ ابو رهف مفتاح الكامري ونزل تحت عند المواقف عشان يجيب مفتاح الشقه من السياره

ومغاط جالس يندب حظه التعيس بخويه البارد ويقول بينه وبين نفسه ان شاء الله مع الوقت يتعدل

ابو رهف وهو عند المواقف جته عجوز معها بنتين قالت له ياوليدي نبيك توصلنا لراس الشارع نآخذ ليموزين


ابو رهف من قوة الخقه نسى خويه مغاط فوق وقال ياخاله اركبي انتي وبناتك اوديك انا بنفسي للمشوار اللي تبينه ومايحتاج تاخذين ليموزين أنا مثل ولدك



.................................................. ..




مسكين مغاط ابو رهف زحف بمخه راح أكمل القصه بعدين أمي تقول قم ودني لعمتك

 

[علي المحمد]

ابو رهف : يسأل العجوز (( خاله وين تبين أوديك انتي وبناتك )) !!

العجوز : ياولدي نبي سوق طيبه الله يطيبك من الجنه

أبو رهف : آمين ياخاله الله يخلي لك بناتك

ابو رهف وآثار الخقه باديه على وجهه الملعوب فيه من لواهيب الرياض وسمومها وغبارها مسك طريق الدائري ونسى ان مغاط ينتظره يجيب مفتاح الشقه من السياره

جوال ابو رهف يدق ( مغاط يتصل بك )

ابو رهف من هول الصدمه دعس على البريك بوسط الدايري وبغى يجيب العيد بنفسه و بالعجوز وبناتها وفكهم الله من حادث شنيع
طبعا من قوة الربشه نزل من السياره وعطل الطريق عشان يكلم مغاط والعالم طااااااااااااااااط طااااااااااااااااااط

مغاط : ألو

ابو رهف : أنا إنخطفت يامغاط لكن عطني نصف ساعه أمردغ اللي خاطفيني واسلمهم للشرطه وأرجع لك

مغاط : وهو قاب قوسين او ادنى من جلطه خلك تجي بس وانا أعلمك أصول المردغه
أجل مخطوف ياهامور الاسهم خلك ترجع بس

قفل مغاط الخط وهو في قمة الإحباط وبدون شعور جلس يضحك وقال الله يعينني على هالطبل مافيه أمل يتغير ومافيه أمل ألقى صديق بطيبة قلبه وخفة دمه

ابو رهف بعد ان شل حركة المرور على طريق الدائري عاد وركب السياره وتأكد من عدم وجود إصابات في العجوز وبناتها
وأكمل طريقه متجهاً الى سوق طيبه بعد أن تعرض للشرشحه والتهزيء من البنات
وبعد ماوصلهم للسوق رجع بسرعه عشان مايتأخر على مغاط

مغاط جالس على رصيف المواقف اللي تحت الشقه لاعب فيه الهم والإحباط ينتظر ابو رهف يرجع
وصل ابو رهف للشقه وشاف مغاط جالس ينتظره تحت وكالعاده ابو رهف لما يسوي مصيبه يبتسم ابتسامه خاقوقيه تجبر أي شخص انه يسامحه

مغاط : أجل مخطوف يا وزير التجاره

ابو رهف : هههههههههههههههههههههههههههههههههههه احمد ربك اللي خاطفيني زلايب والا كان بتنام على الرصيف اليوم

مغاط : هات مفتاح الشقه ولا يكثر ياجيمس بوند الروضه

دخل ابو رهف ومغاط للشقه وكل واحد راح لغرفته ذابحهم التعب يبغون ينامون
وفجأه وبدون مقدمات وأثناء ماهم نايمين دق جرس الباب
محد انتبه لصوت الجرس
بدى صاحب العماره يطق الباب بيده بقووووه عشان مغاط وابو رهف يصحون ويفتحون له الباب

.....................................

 

[علي المحمد]

ابو سعد راعي العماره يطق الباب على مغاط وابو رهف

ابو سعد هذا خمسيني العمر قصير القامه ملياردير عنده مايقارب 30 عماره بالرياض وشبابي ومطنوخ ويحب مغاط وابو رهف .. لانهم شباب وعندهم طموح برغم ان الدنيا لاعبه فيهم وذابحتهم الدجه إلا انهم طيبين وصدورهم وسيعه

مغاط صحى من النوم على دبج الباب العنيف

مييييييييين ؟؟

أنا ابو سعد افتحو الباب

مغاط راح لغرفة ابو رهف يصحيه من النوم

قم قم ابو سعد عند الباب

ابو رهف : وشوووووووو ابو سعد لحظه بقوم اغسل وجهي وألبس

إفتح له الباب يامغاط

مغاط : جاي جاي يابوسعد لحظه افتح لك الباب

ابو سعد : السلام عليكم

مغاط : ياهلا والله ابو سعد وعليكم السلام تفضل طال عمرك

ابو سعد : دخل وتوجه مباشره للمطبخ وفتح الثلاجه لقاها فاضيه وابتسم

مغاط : ابو سعد وش تبي الشاي بنعناع والا بدون

ابو سعد : أنا بسوي الشاي خذ هذا مفتاح سيارتي بتلقى فيها مقاضي بشنطة السياره

رح جبهم وأنا عمك

مغاط : ماكان له داعي تكلف على نفسك يابوسعد

ابو سعد : لا كلافه ولا شي انتم مثل عيالي

ابو رهف بعد ماغسل وجهه ولبس ثوبه وطقها تمغيطه حقت واحد نايم له اسبوعين

راح وجلس بالصاله وسمع صوت بالمطبخ وسمع صوت باب الشقه يتسكر

على طول جا في باله ان اللي بالمطبخ مغاط وان اللي سكر باب الشقه ومشى هو ابو سعد

وقام يحش بأبو سعد على باله ان اللي بالمطبخ مغاط :

أبو رهف : مغاط وش يبي بابا سنفور !!

ابو سعد سمع ابو رهف وهو يقول بابا سنفور وكرها ضحك

ابو رهف : وراك ماترد يا طبل وش يبي ابو سعد !!

ابو سعد كرها ضحك بصوت خفيف وقال بينه وبين نفسه هذا لسانه طويل وماينتحارش

ابو رهف : والله قهر يامغاط راح ابو سعد وماسلمت عليه ياخي ماشاء الله عليه غني ومتواضع ورجال فيه خير


مغاط جاب الاغراض وضغط جرس الباب


ابو رهف : مين ؟؟

مغاط : افتح يا كمخه انا مغاط

ابو رهف : مغااااط !!! أجل من اللي يحوس بالمطبخ

ابو سعد : يستهبل انا بابا سنفور افتح الباب لمغاط ياطبل



ابو رهف ضاع وجهه و حس انه قوطي نيدو من الفشيله
فتح ابو رهف الباب وشاف مغاط معاه حوالي 12 كيس ومو قادر يشوف وجه مغاط من الاغراض اللي شايلها

مغاط : وخر يابعير عن الباب خلني ادخل الاغراض

ابو رهف : وش ذا يامغاط وش انت جايب

مغاط : الله يكثر خير ابو سعد جايب لنا مقاضي

ابو رهف : فديت صلعته ياشيخ

مغاط : هههههههههههههههههههههههههههه الله يرجك


ابو رهف ومغاط دخلو للمطبخ معاهم الاغراض وابو سعد واقف عند الفرن وبيده زقارته

ابو رهف راح لأبو سعد وسلم عليه ابو سعد ابتسم ابتسامة ملكع وقال :

أنا بابا سنفور يا هاتف العمله أكبر مافيك راسك


مغاط : ههههههههههههههههههههههه قويه



ابو رهف إنعمى وماعرف وش يقول وكرها ضحك مع مغاط على ذبة ابو سعد

وقام يصرف الموضوع ويطلع الاغراض من الأكياس ويحطها بالدواليب والثلاجه

وبعد هالجو الرائع من الضحك والمزح راحو للصاله وجلسو يسولفون مع ابو سعد

ابو سعد اقتصادي محنك وسياسي خطير

ومغاط وابو رهف يبي لهم بس واحد يمسكهم خط بهالمواضيع ويقلبونها خبيتي ومحشات

مع العلم انهم لا يستخدمونالحشيش أبداً



ابو سعد : يسأل الشباب فيه مباراة اليوم !!!

مغاط : ايه اليوم بيلعب الهلال ضد النصر والحين فيه استديو تحليلي اذا تبينا نشوفه

ابو سعد : والله المباراة قويه حط على الاستديو التحليلي نبي نعرف التشكيله

ابو رهف كالعاده عليه نطلات مدري وش تبي

تصدق يابوسعد وانت يامغاط اني كلمت امي اليوم وقلت لها حلليني انا تعبتك معاي ياميمتي

قالت لا والله ياوليدي اني ماني محللتك أبد

قلت لها أفا يمه ليه بس

قالت اني سمعت ان الامير سلطان يهاوش اللي يحللون



مغاط وابو سعد انفجرو من الضحك لين دمعة عيونهم



ابو سعد : قال والله اللي صار غلط بس يبقى الامير سلطان بن فهد قلبه كبير وصدره وسيع

وكلهم مثل عياله

مغاط : اي والله صدقت يابوسعد الامير سلطان قلبه كبير و الكلام اللي جا منه لحظة انفعال

ابو رهف : ليت فيه رابع نكمل بلوت شرايكم اكلم ابو خليل يجي يشوف المباراة معنا ويكملنا بلوت

وبعد فرصه يطبخ لنا الليله والله عليه طبخ يجيب القطو من السويدي


مغاط : ايه كلمه تكفى يابو رهف و قله يمر على حلويات سعد الدين يجيب معاه تشكيلة حلا


.................................................. ..................................


من علبة الككاو قصدي من صندوق الوارد :

شخص أرسل لي يسأل عن معنى مناكير

أنا أأكد لك إن المناكير مالها علاقه بالسمبوسه

المناكير : طلاء أظافر يستخدمونه البنات عشان يخققونك وماترفض لهم طلب

 

[علي المحمد]

آخر مره ذكرنا ان الشباب اتصلوعلى أبو خليل وقالو له يجيب لهم حلا من حلويات سعد الدين

وصل ابو الخل وعلى طول فتح له الباب مغاط



مغاط : هلا بالشين اللي شايل حلى

ابو خليل : هلا يا سبيكه ياخي انت دايم مستثور وعربجي وبرستيجك حوسه وبثر وقليل أدب متى تعقل

مغاط : هات الحلى ولايكثر وشف باب المطبخ يمينك يالله إدهر نبي ناكل وحنا نصيح من الفرح والخقه على طعم الأكل

( دخل ابو خليل للمطبخ هو ومغاط والباقين للحين جالسين بالصاله )

ابو خليل : هههههههههههههههههههههههههههههه متى تعرسون وافتك منكم

مغاط : العزوبيه فله و وناسه وش نبي بالعرس

ابو خليل : اسمح لي يامغاط كلامك ينافي بنود الحياة الفطريه الحرمه نعمه من نعم الله علينا على الأقل تلقى أحد تلعب معاه ( أونو )

مغاط : لايكثر بس ... لاتخليني ألمخك بالقدر على اذنك واخليها تون اسبوع أجل ( أونو ) يا المنتهي

ابو خليل : ههههههههههههههههههههههههههههههههه غريبه وين ابو رهف

مغاط : لا تخاف الحين يجي للمطبخ انت ماتعرفه زين كثري هذا علاقته بالمطبخ متذبذبة طوال العام بس تتوطد بشكل ملحوظ اذا صار فيه احد يبربس بالمطبخ
تدري انه يفتح جسر جوي بين خشمه وفتحة تهوية المطبخ ويقعد يشمشم



( ابو رهف يدخل للمطبخ بخشمه قصدي بجسمه )



ابو رهف : وين الحلا

ابو خليل : سلم أول يا الآفه ... يالضرس ... يا كنق التونه والشورما


ابو رهف مات من الضحك وسلم على ابوخليل وعلى طول توجه لصينية الحلا

وأخذله بلح شام وما أمداه يحطها بفمه الا قام يون وبغى ينهبل


ابو رهف : آآآآه ياضرسي

مغاط وهو متشقق من الوناسه قام يهف على وجه ابو رهف بفوطة البيالات

ابو رهف من شدة الالم سحب الفوطه من يد مغاط وعض عليها و انسدح بالمطبخ على ظهره
وصار يون ويقول ياعيال جيبو زراديه واقلعوه

ابو سعد جاء يركض جهة المطبخ على صياح ابو رهف وقال سلامات لايكون زلق هالخبل على ظهره

قال له ابو خليل لا والله اللي سادحه ضرسه يابوسعد

هههههههههههههههههههههههههههههههههههههههههههههههههه هه



ابو سعد : بسرعه شيلوه وركبوه السياره اوديه لعيادة الاسنان



ابو رهف والالم متجمع براسه ويلعب سامري



يقول :

لاااااااااااااااااااا مافيه وقت شيلوه انتم وبدون بنج

راسي بينفجر شيلوه بزراديه والا اسحبوه بونش مافيه وقت



الشباب ماتو من الضحك وقالو مالنا الا نسوي شي يخفف الالتهاب

مغاط راح يجهز العده جاب فرشة الاسنان حقت ابورهف والمعجون وغسول فم

يبون يفرشونها له عشان يخف الالم والالتهاب

ابو سعد ماسك رجلينه وابو خليل مثبت كتوفه عشان مايتحرك




مغاط : شل الفوطه اللي انت عاض عليها و افتح فمك يالدلخ خلني اشوف وش فيه

ابو رهف : فتح فمه وطاحت الفوطه وغمض عيونه من قوة الالم

مغاط : الله يقرفك ياخي تمضمض بفيري والا ديتول و الا حتى ركب سيفون في فمك

ابو رهف : هههههههههههههههههههههههههههه كل تبن مو وقت ذب <<<<<< يضحك و يون

ابو خليل : قسم بالله انتم يالعزوبيه ماتفرقون بين معجون الأسنان والبتكس لعنبو ابليسكم

قسم بالله يوم فتح فمه حسيت اني بجنوب الرياض جهت الحاير



ابوسعد غسل ايده منهم ودرى انهم رايحين فيها <<<<<<<<<< عيونه تذرف دموع من الضحك

تمت عملية التنظيف بنجاح والحمد لله خف الألم عن ابو رهف

وعطوه حبتين بندول وراح انسدح بالصاله بعد ان تعرض للذب العنيف والشرشحه


.................................................. .......................


بكمل لكم بعدين أحداث القصه ... مخي ضربت فيوزاته من الجوع ابي اروح اسوي لي ستيك لحم بالمطبخ





جمعتكم مباركه

 

[علي المحمد]

القادم ......

ابو رهف ومغاط يستعدون للسفر خارج السعوديه

..........................

 

[علي المحمد]

عم الهدوء أرجاء الشقه بعد أن نام ابو رهف على الكنبه بالصاله ونام معه ضرسه

ابو سعد الملياردير صاحب العماره إلتفت على مغاط وقال :

أنا قررت أسافر وأبي آخذكم معاي لأن عيالي بيروحون مع خوالهم وماراح يسافرون معاي

ابيكم توسعون صدري وبنفس الوقت تشوفون العالم برى السعوديه

مغاط وقد بانت نواجذه من شدة الفرح

طق تنهيده تسمعها الإبل في بادية الأردن

وقال ياعم ابو سعد حنا حدنا الصمان وشعيب الطوقي واذا خربناها رحنا لأبها والطايف

وبعدين انت من جدك تبي تآخذني أنا و أميتاب ( ممثل هندي يقصد ابو رهف )

أبو سعد : من هو اميتاب !!

من جدك يابو سعد ماتعرف اميتاب

أميتاب هذا ممثل هندي أفلامه كلها نصب وفقش

أجل مره دخل على وكر عصابه وصفقهم بعصى مكنسه ومسح فيهم البلاط ومشى وهم متسدحين ولا واحد فيهم يتحرك

أميتاب هذا من قوة النصب بأفلامه الشرطه يلحقونه وهو راكب سيكل و مايقدرون يمسكونه

ابو سعد : تقصد ان ابو رهف راعي نصب وفقش

مغاط : ههههههههههههههههههههههههه ماشفت شي الله يحلل الافلام الهنديه عنده

لعنبو ابليسه اسأله قبل كم يوم وين كنت يقول كانت معاي حراثه على طريق الدايري ورافع غزاله من مخرج 9 لين المطار

ابو سعد مات ضحك وراح عند راس ابو رهف وقام يقول له إصحى يا أميتاب الروضه

قوم ابي أعلمك بشي

ابو رهف : أميتاب هذا اسم علاج والا ايش

مغاط : لا اسم ممثل هندي انت تذكرني فيه ايام شبابه قوم يالله ابو سعد يبينا بموضوع

ابو رهف صحى من نومه وقام وغسل وجهه ورجع للصاله

ابو سعد : ابو رهف عندك جواز

ابو رهف : لا ماعندي ليه

ابو سعد : أجل الله لا يهينك باكر الصباح تروح انت ومغاط للجوازات وتطلعون جوازات نبي نسافرلأوربا

ابو رهف : هههههههههههههههههههههههههههه شكلكم بتسافرون لحالكم علي مخالفات قيمتها 4000 ريال ( طبعاً ماهو مصدق كلامهم )

ماراح يطلعون لي جواز لين اسدد

مغاط : مخالفاتك واضح لي انها من الحراثه على طريق الدايري وقيمتها 4000 الآف ريال ومحرر لك العسكري نوع المخالفه : محاولة طيران

ابو رهف : احم احم ورى ماتبلع لسانك وتسكت أي حراثه

ابو سعد : اجل رافع غزاله بالحراثه من مخرج 9 بالدايري لين المطار

ابو رهف بعد ان ضاع وجهه من مصالة مغاط وابو سعد بدا يصرف الموضوع

ويقول وين ابو خليل لا يكون مشى !!

مغاط : الرجال يسلم عليك كثير السلام بيسافر باكر مع عياله للقصيم مابغى يصحيك انت وضرسك

ابو رهف : يوصل بالسلامه ان شاء الله بس ماقلتو لي وين بنسافر ترى انا ماعمري سافرت الا جده

ابو سعد : بنروح ماربيا وميونخ وباريس وبرشلونه

ابو رهف : ههههههههههههههههههههههه تستهبل انت انا ومغاط اذا بغينا نتبهنس وندلع انفسنا نروح للدرعيه نحظر سامري ونستنزل ونرجع للرياض

انت بتودينا معاك متأكد !!

ابو سعد : والله ماني لاقي احسن منكم رجال واقدر اعتمد عليكم ووسيعين صدر

وانتم بحسبة عيالي وابيكم تشوفون الدنيا وتشوفون العالم الثاني

ابو رهف إلتفت على مغاط وقال أنت وش مسوي بالرجال يا يــ ( الربع توله ) لايكون ساحره

مغاط : ههههههههههههههههههههه أنا ربع توله يالفقمه لو فكرت اسحر احد بسحرك انت يالدرج عشان تعقل وأفتك من هبالك
محد طلع الشيب براسي الا انت

ابو سعد : ههههههههههههههههههههههههههه الله يديم صداقتكم ويكفيني شركم انا بمشي الحين وباكر خلصو اموركم بالجوازات
انا برتب الحجوزات وبمر باكر آخذ جوازاتكم وبروح السفاره اطلع لكم فيزا تشنقن

ابو رهف : ليه فيزا شايفنا شغالات

ابو سعد : هههههههههههههههههههههههههههههههههه يابن الحلال حتى انا شغاله مثلكم لازم كلنا نطلع الفيزا

فمان الله

مغاط وابو رهف : فمان الله



ابو رهف ومغاط بالمديريه العامه للجوازات

خلصو من تسديد المخالفات وكملو اجراءاتهم واستلمو جوازاتهم

وعلى طول راحو لــ السوق عشان يشترون ملابس وبدل رسميه لزوم السفر

وهم راجعين للشقه أبو رهف سأل مغاط وقال :

كل واحد فينا عنده عقده انت وش أكثر شي يعقدك بالدنيا !!!

مغاط : بصراحه مافيه شي معين بس العقد أقدر أشبهها لك بعقدة مص الأصبع عند الأطفال … وعقدة الاون الأحمر عند التكارنه … وعقدة البصق وتحفير الأنف في الطرقات عند الباكستانيين … و عقدة كسر البيالات وتشغيل المكيف و صبخ البيبان وصب الخزان عند الشيبان

وانت يا ابورهف وش يعقدك بالدنيا !!!

أبو رهف : بصراحه ربط الكرفتا يامغاط
مره ربطتها قبل سنتين يوم اشتغلت بمطعم هرفي وبغيت اموت ودخلوني الاسعاف بمستشفى الشميسي
والشرطه جو يحققون معاي يحسبونها محاولة انتحار
بعدها طلبت من ادارة هرفي يعطوني بدل خطر او اشتغل بدون ما ألبسها

مغاط : ههههههههههههههههههههههههههههههههههههههه ليتك ميت من يومها كان مرتاحين منك يا أميتاب

أبو رهف : تدري عاد يا مغاط ابو سعد هذا مسخره ربي لنا

والله ماكنت متوقع اني يوم من الأيام بسافر برى السعوديه

بصراحه بفقد ( مناكير ) يامغاط بجد مدري وش لون بصبر ما أكلمها وأنا هناك

مغاط : ههههههههههههههههههههههههههههههه للحين للحين تكلم ساره

ابو رهف : يعني مهند و نور احسن منا

مغاط : طيب علمتها اننا بنسافر !!

ابو رهف : لا ماعلمتها مدري وش لون بعلمها

مغاط : آه بس يالميونتي
المسكينه ماعلمتها شكلها بتنهبل اذا درت اننا بنسافر

ابو رهف : مغاط نوره كم صار لك معاها الحين

مغاط : ثلاث سنين وانت كم صار لك مع ساره !!

ابو رهف : مدري بس مبطي

مغاط : ههههههههههههههههههههههههههههههههههههه اقول انزل يالماصل و صلنا للشقه طول الطريق وانت سادح المرتبه وتسولف
نزل اغراضك وأنا بنزل أغراضي وترى الجوازات معاي ذكرني اتصل على ابو سعد بعد صلاة العشا عشان يجي يتعشى معنا ونعطيه الجوازات

.................................................. .............................................