:
هذا العالق في صدرك مو رعشة شوق
تمرك وتعربد في صدرك :
ساعة ..
ليلة ..
تهتك روحك
وترد الغصن الاخضر :
يابس محروق !
هذا الوجع اللا محدود ..
اللا انساني ..
المتجمع فيك المتكاثر ياكل صدرك
مثل الدود !
وتشوف انك رغم الشي العالق فيك
الزايد فيك
انت المسروق !
اكثر من باب يوقـّف مابين احساسك
بالصرخة الاشبه في : ناسِك
راكع في عينك متراخي ..
متماسك
لكن مسدود !
والجفن اليابس مشقوق !
مابينك انت ومابين الواقف يصرخ ويحاول يلمس بايدينه بعضك
ويحاول وتغوص الارض
ويفلت وتغطيه الارض
تغوص تغوص برجلينه :
كنت انت بنفسك من كان يحاول يوصل لك
لكنك : وينه !
وين تردك
وين تعيدك
لو تلقاه اكثر من مرة :
من يلقاك !!!
وين تحاول تعرف طعم العالق في روحك
وتدوِّر فيه ..
وكل درب تحسّه يوصل بك
لحظة تيه ..
وتحفر اكثر ارض بصدرك
تلقى العشب الأكثر
ليه ؟!!
تمسح وجه الطين المترامي
وتدور بحروف الرمل الباقي
عن هذا الصوت المجموع بصدرك
وابعادك فيه وابعاده
لاوصف وتعرف اشباهه
لا عمره فيك وميلاده
لاسحر تـْحاول تتداوى
لاشعر وتاكل بطيوره :
تخطفها
أوتحايلها – في خفة - مثل ابن آوى
لا تلويحة عاشق حاول يجمع نفسه
كانت نفسه
قبل يحاول :
تتساقط فيه
وتتهاوى !
لاحزن اسود والدنيا بعينك تتساوى
لا اشياء وتتوقعها
لا اشلاء وتجـْمَعْها
توزّعها
ترجّعها
من هذا التيه الساكن ارضك
لــ روحك فوق !
يا الله
شكثر احتاج اتوحد
احتاج اتبعثر لاقصاي
اتوحد اكثر
وافتح هالصندوق الاسود
واكسر بيدي هذا الطوق
وافتح شباك الطفل :
الجالس مخنوق !
محتاج بكل انسانية
اني اصغر
اصغر
اصغر
اصغر
اصغر
لين اتساوى فيني أكثر !
يـا ليـــــــت اقـــــــــــدر !!
انصحني ارجوك
او حاول اكثر من تنصحني :
اذبحني !
يمكن اتذوق هالطعم العالق
ويعنكب بأطرافي عشه
ويتمادى اكثر من بيت فكل شقوق !!
ارجوك إسمع هالمخلوق !
واسمع هالطعم العالق في روحي من ايام
اطول من عزلة " ماركيز " الــ مية عام !
ارجوك تعيد الطعم المخبوء الخالد للآلام
طعم الحزن التقليدي
من اول تكوينه / تلوينه فينا
بالارحام ..
الاعظم من اي تفسير الهالك
في مقبرة الاستسلام
الصلف الأشعث والقادر قتلك – في لحظة - بالابهام !
الأكثر سطوة
الأبعد صبح
الأقرب خطوة
لمعنى الذبح !!
يمكن يقفز هذا السر / السحر المدفون بصحراي
أو بحري
أو تحت فراش أيامي
أو في مدخل باب عيوني
في ما أدري وين اتخيل ما أدري
- ما أقسى هذي الــ ما أدري
ما اعنف لفتتها / قلقك / صفعتها -
لكن
يمكن لحظتها
ساعتها
ليلتها
أو أي ماكانت مدتها فوق الآرقام
يقدر ( واحد فيني ) ينام
:
ويفسر لي هــالآلام !!!