صالح الشادي

[ميــرال]

ياغزل

(1)

وش آتغزل ياغزل .. !

طاحت سواليفي على حظنك ..

وجفني طاح ..

وإسترخَى كسل .

وش آتغزل ياعسل ..

و(الشهد) نحل الشوق من حُسنك جنَاه ..!

ومن رحيقك..

سافر العطر ورحل .

وش آتغزل والزعل -

إليا زعلتي ،

يستعر فيني زغاريد وطفولة ..!

تزعلي ..

وآموت في (هيك ) مهبولة ..!

يعني مقبولة

ومقبولة

ومقبولة

ولا فيها .. جدل .

(2)

صمتك.. أنا أدري وش وراه ! .

مليون آه ..محاصره في آهتين .

آه .. لعيون الحبيب -

وآه .. من سطوة هواه .

هو صحيح يحبني ..؟!

هذا الجنون اللي على ها لارض يمشي ؟!

أو يساير عقلي الغايب ..

ويلعب من وراه ؟

ياترى .. كم ألف أنثى ذاقته قبلي قصيده ..؟

وكم قصيدة حب فيني صاغها..

وهو (صحيح ) و( جد ) يعنيني ؟

ويعني ماحكاه ! ؟

ياترى ..الطير هذا..

يخونني كل يوم ..؟

ولا.. كل شهر مرة.. ؟!

والله ، لو مرّة وقع بيدي بلحظة (ملعنة ) –

إني لأخرب هالسنة وألعن أبو جد الحياة ؟

يخونني ..؟!

مو على كيفه يخون .

أنا - وإذا فكر بغيري ، أفضحه..!!

أو أجرحه ..

أو أذبحه ..

طيري ، وأنا حُرة بطيري .. ولا أبي غيري معاه ؟!.

(3)

ياهوه .. ياذا الفاتك المزّاح -

زحزحتني عن ثقل أبوي آدم ،غصِب ..

وأشغلتني ( حسبي عليك ) بحفلة التفاح .

قل : ماتبي ترتاح ؟

قلي : متى تهدا الظنون العاصفة ..؟

ومتى تصدق إن عشقي إنت وأصل السالفة .. ؟

وإنك إذا قررت مرة تحتويني ..

ممكن انك تحتويني ..

وتنفرد بالباب والمفتاح !! .

قل : ماتبي ترتاح ؟

إهدا ، أباشعل فيك صمتي .

أُطرد الوسواس ..وسوس بي ..!

وعشني ،

وروق من عصف الرياح .

وقل : ما تبي ترتاح ؟

إرتاح ياقلبي..

كفاك اللي جرالك من زمان فات ..!

خذني وبلا هذا الشتا ت .

خذني، وحن ياقلبي على روحك..

وريّح هالجناح..!

وإطفيّ المصباح

 

[ميــرال]

الشيب

هذا الضيف الأغبر زارني!.

والضيف له حقه وله تقدير..

وأنا على ما شفتني يا طير..

مثلك أفزّ من الصدى..

احتاج مثلك للمدى..

للبوح..للتعبير...

خذني أبي أتنفس..

خذني ما دام إن المسا عسعس!..

والدااااار صااارت غير!!

يا طير يا رفراف..

خذني ورى الأطراف..

خذني ، وأنا المسؤول عني.. ولا تخاف!

الحزن من ربعي!!

وعشقي من عرفته ما تغيِّر..

في الصبايا ...وللرغيف لحاف..

يا طير يا رفراف...خذني ورى الأطراف..!!

خذني وب أحكي بـ صمت ..

للشيح...للقيصوم...للعزّاف..

عن قصة غياب المطر...

وعن طعم هالدنيا بدون أنصاف..!!

الشيب..

من جيت أنزعه..

قالوا مردّك للبياض..

وكل شعره بـ أربعة..!!

قلت أربعة!

قالوا كثر جهلك ولا لك اعتراض..

والحقيقة موجهة..

آآآه ياااا هي موجعة!!

إنّك تخون الشمس..والبرد يسريبك!!

آآآآآه يااااااهي موجعة!!

إنك تشوف مرايتك تفرح بتعذيبك..

ي أنت يا طيبك..

أشغلت نفسك في سراب من البشر..

غابوا..

ودورت العذر لغيابهم..!!

وفي غيبتك ما دوروا إلا عذاريبك..

تعوذ من إبليس ومن هالناس ومن طيبك..

ي أنت يا طيبك!

لو لاح لك وجهٍ من الماضي ..

تشجع وأصفعه..أو أمنعه..

ما ينفعك مثلك غبي..ولا تنفعه..!!

الشيب لو زارك ،وقارك فيه..

حييه..ثم حييه..ثم حييه..

الشيب مثل أحلى القصايد..

روعته في مطلعه!!..

طفلة وطاحت من زحام..

قالت : سلام!

قلت: السلام نام ..وخليني أنام!

من بعد نوّار العمر وش فايدة كثر الكلام!!

قالت سواليفك عسل..

زدني غزل ..زدني غزل..

ومن يطلب الجنة من أمثالك وصل!!

يا شاعري قم ..واسقني نخب الغرام..

قلت : السلام نام ،، وخليني أنام!

قالت : ولا قلّ الغلا..

أبيك أنا ..وإن قلت لا.!!

ولك ما تبيه من الولا ومن الحلا..

ولا لي بديلك في الملا..ولا لي مقام..!!

قلت : الهوى عند الخفوق إذا استوى

جهل وحرام!!

والشيبتين آخر مشاوير الصبا..

وأول مشاوير الصيام..!!

ولا على شايب ملام !!

قالت : سلام ..

قلت : السلام..

وي الله عسى حسن الختام

 

[ميــرال]

يعد نجوم

(1)

من صعاليك وملوك ..

ومن جنوب ومن تبوك ..

ومن نشامى تشبهك ..

أو يشبهوك .

شفت ياما .

(2)

يانديمي ..

خذ من الفنجان ما يروي حنينك للصديق ..

دامك أتعبت الطريق ..

وجيت بك شرهة ندامى .

(3)

اعتبرني ماسمعت اللي سمعت ..

ولاتلوم ..

لا تقطع نصيب الصمت -

أنا ضيفه .. وهو ملزوم.

واتركني على هذا المدى أهذي ..

وخل اللي هذى يهذي ..

وربك لانيب قاطع ،ولا راجع .. ولا محروم .

وإذا قالوا ..

وش اللي حدّه يولّي ورا حد الصخب ياهيه ..؟

قول : آظن صابه تيه ..

وراح الشاعر بحمله -على مهله -

يعد نجوم ..!

 

[ميــرال]

ولد مجنون

قالت : ولد مجنون

قلت : و عآشق(ن) مجنون

من خلقت الدنيا و مثله ماخلق بالناس مثله

رغم قسوتهم حنون]~

أسمر سقته الشمس ماها لين فوّح في مداها و أدهش الليمون

و أبيض من اوراق السحاب و من عباب الماء و من نبع العيون

روحه غمامه من سماء

بوحه ضماء

نوحه رفيف غصوون

موزون ..

لكن لاسمع صوتك تبعثر و إنهمر و إختل فيه الكون

و محزون ..

لكنك تنسيه الحزن كل ماحضن طيبك شقاه و هدهده بالهون

و مفتون ..

لكن فتنة العاشق مرآتب و من تكوني عشقة إحساسه

طبيعي لو رفع رآسه وعآشق بمرتبة مجنون

قالت : ولد مجنون

قلت : وعآشق(ن) مجنون

تدرين وش معنى مساء الخير ؟

تدرين لا طارت من شفاهك من اللي يطير ؟

عقلي يطير

و كوكبي يفتر عكس الإعتياد من الطرب و المستحيل يصير

أمنت بالله القدير

حلّ الدفى و البرد فارقني و فلّ الزمهرير

رجعت حيّ و قلت حيّ الورد الأصفر و العبير

حيّ الصباح اللي تشابك بالمساء حيّ الحرير

حيّ الحياة اللي طعمها يشبه الجنّه كثير

قولي مساء الخير ]]آورّق و آنبعث و آكون و لآتسألي وشلون

مجنون !!

ومن قولي بربك يسأل المجنون إلآ واحد(ن) مجنون !!

قالت : ولد مجنون

قلت : وعآشق(ن) مجنون

مر(ن) ثلاثين و عليه(ن) من سنيني زود

وكان العقل موجود

لكن وش جنيت من العقل و الثقل ومن الليالي السود

وش فادني صبري و مقطان الحنين اللي سرق عطري سنين و بادني وش زادني ؟

مازادني إلا جفاف إسمه رشاف المجد

و المجد زيف إن ماعركته باليدين المجد

المجد لله في سمااه و في ثراه

ماغير حُبك مجد

ياشوق مشغلني معه

ياطربتي لافزت من أقصى الضلووع آلآشرعه

انا اتوّجد وجد و ياجعل قلبك مايذوق إلارفيف الوجد

ياعذبة العنقود ’’

إشتقت للباروود و إن كان بك مثل إشتياقي فجريني بالتلاقي و إنسفيني جود

أنا إحترآقي في عيونك كل همي و غاية المقصوود

و لآهمني هرج الملا خل الملا يحكون

مجنون !!

ومن قولي بربك يسأل المجنون إلآ واحد(ن) مجنون !!

قآلت : شاعر(ن) مجنون

 

[فاطمة العرجان]

تملكين ذائقة رفيعة وراقية يـ ميرال ..
أتابعك وأنتِ تضمين رسائل [الشادي] تحت جناح روحك العالية ..!
,
شكراً لك

 

[ميــرال]

(1)

علاقة عابرة ..

وفتاة مكابرة ، ورجّال سهل !

وأنا ياابوجهل مليت .. من هذا الجهل !

ياليت ترحمني وتقلب وجهك الطيني ..

وتاريخ الهزل .

الروح من دنس طهارتها ، دنس ..

ثم إنكنس من سكة الصدق ، وعلى راسه نزل !

والدمع لامنّه نزل وأمسى على خد التراب ..

أصبح وحل !

مسكين ياالغافي بحضيرة عشق مافيها نخل .

ومسكين ياللي تلمس الوردة بأحاسيس النحل

ومسكين ياللي عايش ليومك ..

ولا به من يلومك ..

ولا عندك أمل !

الذل إنك تترك التاج الرفيع ..

وتلعق غبار النعل !

والذل إنك ماتشوف من الشموخ إلا الحضيض أوالسهل ..

والذل إنك ماتكون إلا (فحل ).

علاقة عابرة ..وفتاة مكابرة .. ورجّال سهل .

(2)

ياقليلين الشعور ..

تعلموا حب الزهور

تعلموا عشق الزهور

ولا تقطفوا هذا الرجا الموصول مابين المعاني والعطور!

النور لو نطفيه بإيدينا عمينا ..

وأرهبتنا دورنا ببرودها ، وفي وحشة الديجور .

والحور ..

هذا الباسق المغرور ..

دلوع الشجر ..

لو نقطع غصونه يشين .. ولا يسُر ..

ولو تمايل من طرب أومن عجب و سرور !

والتينة اللي عاث فيها الطير ..

غير التينة اللي ماوصلها غيرك إنت من الطيور !

والنفس فيها عزة لوتنتهي ..

أشرف لنا من هالحياة ، القاصيات من القبور .

ومن تاب تاب الله عليه ..

ومن غفل .. مايشبه الا الثور !

وطبيعة الدنيا تدور ..

وكلنا بالدور ! ولا فيها زعل .

الحب ماهوب العسل ..

والحب ماهو موعد وليلة دجل.

الحب انسان نبيل

يحلم ولا عمره وصل .

ماهو علاقة عابرة ..وإلا فتاة مكابرة .. ولا هو برجّال سهل ! .

(3)

يامبعدة ..

ومعربدة فيني ، خيال وطيف ‍

أنا جار الضحى والضي

وقلبي حي ..

ما له بالعتم والحيف !

وربي ماخلقني مثل زي وزي

غيمة ، أو سحابة صيف .

أحب إنك تكونيني ..

وأكونك شي ..

ماله وصف أو تعريف !

إذا زاد الجفاف الميْ

وإذا زاد الخلاف السيف !

وبلا هالظن في ربعي‍

وبلا هالطعن في طبعي

وبلا تخريف .

أحبك إيه أحبك إيه أحبك

ولو تقولي خان ..

أنا عازف عن القطعان وأهل الزيف!

ولكن لا وصلني ضيف ..

أبكرم من وصل ؟

حتى ولو ماله سوى عيني محل ..

ولو كنت ما املك من حطام العالمين إلا الغزل ..

بأسقيه نبعة من غزل

ماهي علاقة عابرة .. ولاهي فتاة مكابرة .. ولاني برجال سهل

 

[ميــرال]

المشاركة الأصلية كتبت بواسطة فاطمة العرجان

تملكين ذائقة رفيعة وراقية يـ ميرال ..
أتابعك وأنتِ تضمين رسائل [الشادي] تحت جناح روحك العالية ..!
,
شكراً لك

فاطمه وليتكِ تعلمين بقدر حبي لكِ
شكراً ياغاليه لك ولوجودك

الغير مستغرب حين تأتين باالنور

 

[ميــرال]

جامليني

.
أدخليني ..
وإطفي الدنيا بحضورك واشعليني ..
....
كيف ؟؟
...
أدري إنك [ مافهتي شي ]..
لكن ..
جامليني .. !
أدخلي في أي عرق يخصني ..
واستعمري ذرات روحي ..
وعلميني الإنشطار .
قولي لتاريخ المراجل :
إستريح ..
وإفردي الأنثى على شط انبهار .
إقلبي وجه الحزن عني ..
خنقني ظله البارد
دخيلك..
إمنحيني لونهار !.
ذلني هذا السمو اللي رفعني لوحدتي ..
مليت من عد النجوم البيض تحتي ..
لو سمحتي ..
ريحيني من جلاميد الشموخ بداخلي ..
وغازلي كبري بعطر
الإنكسار ..
إكسري هذا الجدار ..
و أدخليني ..
وإطفي الدنيا بحضورك واشعليني ..
كيف ؟؟

أدري إنك مافهتي شي ..
لكن ..
جامليني ..
كل شاعر يفترس أنثى خياله، في خياله ..
و مخلب الواقع يبدع في افتراسه لا صحى ..
وكل شاعر ماسكن مثلك خياله ، شفت حاله..
ماصحت شمسه ، على مركا التعاسة للضحى..
والليل ياليلى العصور الغابرة واليوم ..
لو غبتي يجيه النوم ..
ولو جيتي تخلى عن نعاسه ،.
واستحى ..
يعني أحبك ..
منطقيني ، لاوجود لأي ميزان يساومني على الدوزان ..
جيتي دوزنيني ..
واعتلي كرسي الرئاسة ،
صالح الشادي انتحى .
الفرح هذا الخرافي البعيد ..
اشتقت له ..
قولي له إرحل من هناك ..
وزور هذا الناحل المطحون مابين السياسة والرحا ..

الرحاب تضيق بي ..
والعمر يستفحل شجر وأغصان ..
والعصفور ماغرد ..
ودستور الوناسة .. إنمحى.
إمحي التعب عني فديتك ..
واكتبي هذا مكاني ..
وكل حي بها الزمن حر بحلاله ..
وكل شاعر يفترس أنثى خياله في خياله ..
وادخليني ..
وإطفي الدنيا بحضورك واشعليني ..
كيف ؟؟

أدري إنك مافهتي شي ..
لكن ..
جامليني .. !