درايش..

[منتهى القريش]

يا درايش الغربه الحزينه
علمينا
ليه ترفضنا المنافي
والله كافي هـ الغياب

[منتهى القريش]

شفايف الوقت
سولفت لي عن حنينك
واصابع الشوق
فيها ريحة ايدينك

يسهرني الليل تخمين
الدريشه صمت
والباب سكين
والجدار الي كسرني هم
سمعته البارحه يشمت
كأنه صار سكينك

افتح ابواب الصدر
يمكن تلاقي غربتي
تنصب صياوين الحزن
وتقرا تعازي الناس
في دفتر اعيونك

[منتهى القريش]

النفاق
عمره ما كان أبيض
النفاق .. أقذر ستار
والوجوه الكثيره
اشقد حقيره
أدري انه الوضوح .. عاااااااااار
أو دمار
بس يبقى وجه واحد للحقيقة
ما يهمه الإنحدار

[منتهى القريش]

اليوم
فيني نقمه ع الحياة

[منتهى القريش]

ليه نحلم بالسلام
واحنا اصلاً
نبلع الضيم وننام

[منتهى القريش]

بينك وبينك مهزله
مو مشكله
طعم الهوى كنه مصخ
مره تربي في الهوى.. مثل الطفل واتدلـ..له
ومره تدوسه.. تقتله

[منتهى القريش]

ما أطوله..
ليل الحنين
يملاك دهشه وأسئله

[منتهى القريش]

قبل الوعد
كانوا هنا
فجأه...
ارحلوا
والقصه صارت مُحزنه

وآآآآآآآآآآآآآآآآآآه يا عيونها
لا تنزفي جرح الظنى
شوفي الوجوه
كيف اصبحت
لوحات يسكنها أسى
كذب.. وخديعه ملونه

[منتهى القريش]

من فقدتك
كل شي فيني تغير
حتى حلمي
تصدق انه .. في غيابك
صار لا شئ يُذكر ..

[منتهى القريش]

أستغفرك ذنب
وارتكبك خطايا
واكفر بمن حولي
وتبقى يقيني

[منتهى القريش]

حضورك أكبر من غيابك
غيابك أكثر من حضورك
ابي أعرف
في حياتي وش مصيرك؟

[منتهى القريش]

وتسألني: تبيني؟
إيه وربي
ما أبي في الكون غيرك

[منتهى القريش]

البارحه
كنت محتاجه لصدرك يحتويني
ما لقيتك
تلحفت عيني بعيني ..
ونمت

[منتهى القريش]

تعبت
وانا أدورني عليك

[منتهى القريش]

م الصباح
وآنا أسأل
وينك انت .. آنا ويني؟
صرت أدورني عليك
أحتويك وتحتويني
صرت أنت في حياتي
سر واضح
ذنب فاضح
بس مُباح

[منتهى القريش]

وتتكسر
مجاديف الهوى نغرق
ولا نلقى لنا مرسى
تضيعنا شواطينا

[منتهى القريش]

صباح الخير
أحلم به
واتوهم
كيف احلم
صباحي يبتدي بفرحه
واتفاءل
واقول: يا رب
عسى يبقى
صباحي دوم
يملا عالمي بالخير

[منتهى القريش]

تصدق اني
من عرفتك
خاب في كل الناس ظني

[منتهى القريش]

احنا ما اخترنا أسامينا
ولا اخترنا الوطن
ولا التراب اختار يغرق
في مساحات الصحاري

[منتهى القريش]

كنت صغير
قلت أحطك تحت مجهر
شفتك أصغر
والغريبه
انتشر حبك خلايا
من جنون
فـ كل روحي صار يكبر
ويا حسافه
المرض فيني تمكن
صار أخطر

[منتهى القريش]

وجه الرصيف
واصوات اقلوبهم والفي
بُعد المدى .. والريح
واعيونهم
في عتمة الليل تتهادى
تشبه ملامح ضي

[منتهى القريش]

اتبعثر ..
واتكدر ..
بس.. أحاول اتصبر

[منتهى القريش]

فـ امان الصبر يا جرحي

[منتهى القريش]

ألا يا قافلة حزني
أخاف الهم يقتلني
تنكر لي الزمن مره
وهبني قلبه الطيب
وفي لحظه .. أخذ فرحي
وحط الملح على جرحي
غصب عني
أخاف افرح
أخاف اني
في يوم اضحك
وحتى الفرحه تخذلني

[منتهى القريش]

آه يا حرارة مدمعه
صار ضايع
بين وجهه والملامح
يبي يعرف.. لو مجرد معرفه
وتبقى روحه خايفه
منهو الي.. واقف(ن) ضده معه

مره في ضيق السعه
سأل نفسه وجاوب
يا ترى حاضر أنا
أو حضوري كان غايب
وارتفع ليما حضيض الأسئله
وانكسر فيه انكساره
صار يدور.. عن بعض كله معه

[منتهى القريش]

وتغيب
واعلق ادموعي قناديل

[منتهى القريش]

كنت احسبك وايد وفي
كنت ارسمك باحلى صور

كانت تقاسيم الهوى
تمشي على أحلى وتر

لكني يا طيف العمر
ماني خشب عود ووتر
ماني زجاجه من العطر
لو تنتهي ماهي حسافه تنكسر

انتا بشر .. وآنا بشر
كنت انا شاري بالوفا
وانت الي بايع بالغدر

بعتك خلاص من دنيتي
ودست الهوى وسط الصدر
والي انتهى .. راح ومضى
ولا عاد اله أدنى أثر

[منتهى القريش]

تمر امرار في بالي
واحاول اذكر النسيان
وكلما أنسى أتذكر

[منتهى القريش]

ما هي صدفه
تذبل أوراق الشجر
ومو غريبه
نموت سنين العمر

عطش داير في سمانا
سيف يذبح في هوانا
ولا يخلي له أثر

الصداقه والمحبه
أشياء نقتلها بيدينا
ويا حسافه
هم يسمونا بشر

[منتهى القريش]

كان وعدك لي كلام
رد واجب والسلام

أقول..
(القتل عمداً حرام)

[منتهى القريش]

من عرفتك ..
صار طعم الليل مُر

[منتهى القريش]

للحين!
شالوا احتمالات الهوى
واقفوا
ما عودوا للحين

تناسوا
وعودن لا طرت
في القلب غصه
كنها .. طاري البين

قلتي
تتوبي م الهوى
وتتعوذي منهم
شياطين

مو طبع الجفا فيهم؟
تبت أياديهم
أما الوفا
في خاطري
كان تخمين

[منتهى القريش]

دمعتي أضحت غريبه
وانكسر داخلي شي

[منتهى القريش]

ليه ..
كلما جيت أحلم .. يموت الليل!

[منتهى القريش]

مساحات الألم فيني ..
تعدت كل مساحاتي

[منتهى القريش]

أيش يعني لو بكيت
تبرد الجرح الدموع؟
والله مدري
الدمع ملح
والبكا رهبه وخشوع

[منتهى القريش]

للحزن مليون باب
ادخل الباب القديم
تنفتح بيبان أكثر
والشبابيك القديمه
يطل منها صوت ديمه
اغنيه جداً أليمه
تمطر آهات ووجع
والفرح صوته يباب

[منتهى القريش]

هناك ... تذكر؟
يوم انك
فتحت اجروح قدامي
سحابات الدمع جفت... وأحلامي
صباحاتك مع العتمة
وقلنا هالزمن يقدر
ينسينا مآسينا

تذكر لما أعطش بك
وتعطش بي
اقول اشرب.. بروى بك
قطره وحده تكفينا

[منتهى القريش]

كل شي حولي يسألني عليك
مرايتي
وجهي الي منكسر
ساعتي
كل دقيقه تمر فيها تنتحر
الزوايا والأماكن والسكون
ودمعي الي ما يفارق هالعيون
تصدق ؟
كل ما جيت أنسى
حتى صمتي.. يرجع يذكرني فيك

[منتهى القريش]

أعذرك
قبل حتى تعتذر
واصبرك
لما يرفضني الصبر

[منتهى القريش]

يمكن قسى!
يمكن تناسى وابتعد!
وليه ابتعد؟
عنده سبب؟
ووين الوعد؟
وليه السبب هي تجهله؟

يمكن رحل من هالوجود؟
يمكن كفر.. باسم الهوى
يمكن رفض..
كل الهوى في مجمله؟

[منتهى القريش]

كنت احبك بلا حدود ..
بلا حواجز أو قيود ..
كان حبي لك
كلمه أكبر من تعابير الكلام
كنت غير الناس كلها ..
كلما قربت منك كم سنه
تبتعد مليون عام
مدري قسوه تعودت روحك عليها
ولا يمكن يعجبك طبع الجحود
اقول خلاص يكفي يا حبيبي
خلص الصبر وقالوا:
(انما للصبر حدود)

[منتهى القريش]

انت فوق احتمالات الظنون
انت جداً حنووووووووون

[منتهى القريش]

صدرك الدافي وطن
ردته لحظه يحتويني

[منتهى القريش]

واختصرت المسافه
يا حسافه
ما عرفتك من زمان
قرب أكثر
خلني أشعر بالأمان

[منتهى القريش]

اغفر النسيان
والذكرى
وبارك هالألم
وسامح ايامي الي راحت
توني اعرف
كانت الايام من غيرك عدم

[منتهى القريش]

ليه تقسى
وآنا محتاجه حنانك

[منتهى القريش]

واشوف الصبح ف عيونك وطن

[منتهى القريش]

وافرح بك
أنسى كل عناويني
ولا أذكر
سوى إني
على صدرك
احس بغربتي بعيده
ولا أتنكر الـ نفسي
حيث اني
أعرفني أنا ويني

[منتهى القريش]

يمر الوقت
ساعه
ورا ساعه
ورا ساعه
(تك .. تك .. تك)
وانسى كل هالعالم
ولا أذكر
سوى انك .. معي وحدي
واخلي قلبي المركب
وقلبك في الهوى اشراعه

[منتهى القريش]

اغص بـ اسمك
وتسألني: تحبيني؟

واسأل طيفك ابلهفه
ويش الي صار
أنا ويني؟

[منتهى القريش]

تجرحني
تقول آسف مو قصدي
واغفر لك
اقول .. أزمه وتعدي

تكبر معاناتي .. واحبك بعد أكثر

[منتهى القريش]

اسامح فيك احزاني
واخلق لك كثير اعذار
وابعد كل خطا عنك
واقول
ان الزمن غدار

[منتهى القريش]

وتسألني عن اخباري
ويش اخباري
أنا ف بعدك
حياتي تكون
مراكب في الغرق تاهت
حنين الوقت..
ضيع كل مراسيها

[منتهى القريش]

عقارب الساعه ... بطيئه
حلمنا مكسور فيها
يا ثوانيها .. طويله يا ثوانيها
وصمتها المقتول فينا
يشبه احزان المقابر

شلي صاير
وينك انت؟
ايديني في ايدينك ولكن
ميته فيها المشاعر

[منتهى القريش]

يضيع الشارع وحزني .. شفايف
والعطش طيفك
وكم غصه
توقف بيني وبينك
واحس عينك .. سحابه
بس ما تمطر

[منتهى القريش]

تعال اسألني وش فيني
سؤالك بس يريحني!

[منتهى القريش]

عساك بخير
عساه الشوق ما زارك
اريد اعرف
ويش اخبارك؟

أنا مشتاقه لك تدري؟
اشكثر زرتك بأحلامي
اشكثر شوقي الك خذني
هناك بعيد لديارك

حلفت اني
الك ما اشتاق لكني
غصب عني
فـ غيابك تحن روحي
واحاول أقبل أعذارك

[منتهى القريش]

ممكن اغفر كل شي
بس غيابك
كيف ممكن أغفره ..

[منتهى القريش]

يوم شفتك
كانت الدمعه قريبه من عيوني
خفت تنزل توجعك
قلت لك الله معك ..

[منتهى القريش]

اشفيه صوتي
أحس انه حزين
حتى صوتي في غيابك
يخاصم ألوان الفرح!

[منتهى القريش]

أحتاجك .. أبيك
بكل حالاتك
في الرضى أو في الغضب
توني أعرف
الدنيا من غيرك .. تعب

[منتهى القريش]

ممكن تقبل اعتذاري
ولا يعني ما تسامح هالحنين؟

[منتهى القريش]

تبغاني
رغم زلاتي؟
أنا طفله
توها تتعلم معك
كيف ينطقها الكلام ..

[منتهى القريش]

أدري إنك
كم سهرتي
كم سهرتي
كم سهرتي
كم صبرتي
كانت الأصوات أبعد
لما كنتي تسمعين

[منتهى القريش]

اعاند فيك إحساسي
واقول اني .. بغيابك
ابد ما كنت توحشني

[منتهى القريش]

ضيقه
وشبابيك ذكرى
وكم سؤال

عتمه
فكره ورا فكره
واللقا أصبح محال

[منتهى القريش]

فيني هم وفيني ضيق
ضاع فـ عيوني الطريق

[منتهى القريش]

جيتك آنا
والندم يسري بعروقي
أعتذر لك
واحمل آلامي وشوقي

[منتهى القريش]

تمر أمرار في بالي
واحاول أذكر النسيان
وكلما أنسى أتذكر

[منتهى القريش]

هواك خذني على غفله
وتيهني مثل طفله
ضحكني وبكاني
بدد خوفي واحزاني
وصار كل شي معاك أحلى

[منتهى القريش]

لا يا القهر
اشلون القمر
ماتت رموشه من السهر
اشلون المحبة تغيرت
ذابت مثل حبة مطر
وين الرفاقه تفرقوا
منهم بقى .. ذكرى وصور

[منتهى القريش]

لو ترجع سنين العمر
كان القمر ..
خاصم تناهيم القدر
كنا زرعنا هالعمر
فرحه اشكثر
تضحك على صدر الكدر

[منتهى القريش]

خلاص قلبي بدا يضعف
أحسه اليوم بدا ينهار

[منتهى القريش]

غناوينا .. سوالفنا .. أمانينا
صعبه فـ يوم ننساها
وهم صعبه .. يصير الحب
بس حروف مكتوبه
تضيع بزحمة الأوراق

[منتهى القريش]

قريت سطور
يلونها ظلام ونور

وغصت بحور
يسكنها قلب مهجور

وبين لحروف دورتك
لقيت انسان

وردت أشوف لو فرحه
ولا لاقيت غير أحزان

شفت الكلمه بحروفك
تخلي للحزن ألوان

نعم أحس بوجدانك
تحمل روح للفنان

ترسم كلمتك باحساس
تلونها ألم موجوع

تخلي الحرف يتكلم
تبروزها ببقايا دموع

عذاب الحرف لو تدري
ليل أسود بليا شموع

[منتهى القريش]

إذا أجرمت في حقك
أنا مره
إنت أجرمت في حقي
كثير أمرار

عليك اخطيت
ترجيتك تسامحني
حسبت انك بتعذرني
بدون دموع أو أعذار

غريبه .. ما توقعتك
تكون قاسي .. علي بالذات
ولا ترحم
بقايا قلبي المنهار

سامحني
غصب عني .. بروح بعيد
غصب عني .. بكتم آهة التنهيد
بس .. سلم لو صدفه تلاقينا
ما بي حد يشمت بي
ولا بيهم يقولوا لك: سامحها
أكيد افـ يوم لو أخطيت ..
بتغفر كل اخطائك
حيث ان الزمن دوار ..

[منتهى القريش]

شوف وجهي
ما ارتديته كالقناع
واضحه فيه الملامح

أكره الألوان في قبح الوجوه
تختلط فيها النوايا
انما ذنبي أنا
باين بوجهي وواضح

ابيك تعرف شي واحد
الـ يمدحك ..
مو وكاد انه يحبك
والـ يسبك ..
ربما افـ لحظه يسامح

[منتهى القريش]

بـ اعتذر لك
ان كان حبي لك خطا
واسامح أوجاعي معك

[منتهى القريش]

أحاول اخدع هالألم
وابتسم ..

[منتهى القريش]

واهتزت الصوره
كذا صارت
كثير ألوان
ملامح طفله مرعوبه

[منتهى القريش]

لما تغيب
أحس الدنيا ما فيها أحد
أحس قلبي كأنه صار تابوتي

وانادي لك
كأني أصرخ بغابه
ولا أسمع .. سوى صوتي

واتخطى .. حدود الصمت
واقول: لبيه لو ناديت
أثاري الوهم يخدعني
أتألم.. وابلع غصة اسكوتي

[منتهى القريش]

مثل الفقير
الـ يحتمل جوعه وينام

مثل الضرير
الـ يحضن العتمه بسلام

مثل اليتيم
الـ يحلم بأمه وابوه
حلمه يطير عبر الفضا
يعبر مثل سرب الحمام

مثل الغريب
لما يحس بوحدته .. في غربته
صمته ايتخطاه الكلام

مثل النقي
لما يشوهوا سمعته
عيال الحرام

كل السطور الماضيه ..
إحساسي كان البارحة
لما رأيتك في المنام ..

[منتهى القريش]

واحبس دمعتي يمه
أداريها وسط عيني
واغطيها بأحزاني
واتنفس هوى الشارع
أشاغب
أركض
أسبق اسنيني
ولا مره سألتيني
لوين الحزن وداني

[منتهى القريش]

أنا ويني؟

أنا ويني؟

معقوله.. ضاعت كل عناويني؟

[منتهى القريش]

مو بيدينا
نقفل أبواب الحنين
ولا بيدينا
نبدل الضحكه أنين
هكذا نحن خلقنا
من ماء وطين
وغدا سوف نكون
في عداد الميتين
ليه ما نسامح بعضنا
نعيش في حب وسلام
ونترك الحقد اللعين

وآآآآآآآآآآآآآآآآآآآآآآآه يا نوايا الطيبين

[منتهى القريش]

يرسم احزانه
على وجه الرصيف

يبيع ورده
ويشتري كسرة رغيف

يبعثر انفاسه في عيون العابرين
يحترق صيف الأماني
والشتا مليون زيف

يرتدي هم الشوارع
والمواجع
في خطوط اليد ترسم امنيات
أغنيات
أعمى يحلم بالصباح
غاية أحلام الضعيف

[منتهى القريش]

إيييييييييييييييه يا بلد
من ننولد
لنا مع الغربه وعد

وسط الزحام
نمشي .. نتوه
ندور علينا للأسف
جوانا ما نلقى أحد ..

[منتهى القريش]

منازلهم
يا حي أصواتهم فيها
من غابوا
رحى صارت
تدور .. تطحن لهيب الشوق
تتآلف مع العتمة
تشعلها وتطفيها

[منتهى القريش]

مو غريبه ننتهي
ننباع في لحظة غدر

[منتهى القريش]

أكتبك للقا لهفه
وتكتبني غياب
أرسمك م الفرح بسمه
وترسمني عذاب
ألون دروبك أغاني
تلون دروبي عتاب

[منتهى القريش]

جيت أدورني عليك
ما لقيت إلا بقايا
فيها ريحة من يديك

جيت أفتح
دفتر الذكرى شظايا
اسئلة .. حزن وألم
والزويا .. فارغه
تشعل الجرح بغيابك
وكلما تنسى جفوني
فز دمعي
بحرقه يسألني عليك

[منتهى القريش]

البارحه
أشعلت بك ليلي
نسيت إني
طفيتك من زمان

بس تدري
من أخونك وي عيونك
أحس بشوية أمان

[منتهى القريش]

تعلمت من الخطا أخطي
واسبق وقفتي بطيحه ..

[منتهى القريش]

تعلمنا
إذا ماتت أمانينا ..
وتألمنا
نتاني بالأمل بكره ..

[منتهى القريش]

ليه تنزفنا الجراح
ليه نبكي ع الي راح

ليه هالدنيا الوسيعه
تضيق فينا لو بكينا
وتطول بينا هالليالي
وتموت فينا
حتى أنفاس الصباح

[منتهى القريش]

باودعك ..
وادري غيابي يوجعك ..
لكنني غصباً علي
اقولها وكلي ألم
روح ابتعد .. الله معك

[منتهى القريش]

دنيا غريبه ومُحزنه
فيها الجراح ملونه

يا دنيتي
عجزت اسأل ..
من أنا؟

[منتهى القريش]

دخيل العشرة
وجراحي
وحنيني لك
ما بي اسمعه صوتك

[منتهى القريش]

لأن البكا مثل المطر
ببكي وابلل خافقي المتعب
راح أطهرني من أوجاعي بدمعي
وراح أغني كلما مرني خيالك
(أسقني واشرب)

[منتهى القريش]

وينك؟
والله أتعبني غيابك
تصدق
كل شي فيك افتقدته
حنانك .. قسوتك ..
ضحكتك .. حتى عتابك

ما وحشتك؟
طيفي ما مرك أبد
في مداين الانتظار؟
شوقي ما جا ودق بابك؟

مو صحيح!

[منتهى القريش]

سلام
لكل القلوب المتعبه
ليل الحزن ما أصعبه

[منتهى القريش]

السكوت..
بعضه موت ..
وبعضه أشهى م الكلام

[منتهى القريش]

حلم
وايدينك المشوار
ولحظات اللقا معروف تاليها

[منتهى القريش]

لازم أغلط ..
مثل باقي الناس واتعدى حدودي
ربما حس بوجودي

لازم أصبغ هالبياض
لون أسود
لازم أصرخ واتمرد
أشوه الصمت بنشاز
ربما يقولوا أغرد
لازم أكسر كل قيودي

بعد هذا لا تقول
كم تغيرتي كثير
كانت الدنيا بخير
إنما كل شي تغير
ماتت أحلام السلام
والصدق أصبح كلام
باحللك من كل عهودك
واعتبر ماتت عهودي

[منتهى القريش]

قول لي وش سوى غيابي في حياتك
علمني
وش سوى طيفي بالتفاتك

أما آنا أشرب المر بغيابك
أعلق عيوني ببابك
واقتات باقي ذكرياتك

وجاي تسأل.. كيف حالي!
من وعت ع اللهفة عيني
وكل شي حولي حزين
والليالي .. آه يا طول الليالي
صرت أسهرني لحالي
كل دمعة في عيوني
تلثم الجرح بشفاتك

كل بسمه تنتحب تسأل عليك
كل لفتة .. كل همسه
تقول يا مبعد أبيك
كل شي فيني تغير
حتى حلمي
صار شاحب .. صار أصفر
بعد هذا ..
جاي تسأل .. كيف حالي!
جاي تقول لي ..
علميني .. شنهو آنا في حياتك؟!

[منتهى القريش]

رسمتك دمعة مغبونه
رسمتك ليله مجنونه
وقبل لا تكبر اذنوبي
رسمتك ذنبي المغفور

[منتهى القريش]

لك أماكن
في غيابك ..
تفتقد صوتك .. حضورك

لك مساكن
وسط روحي
ما سكنها إلا شعورك

لك وطن
قلبي واخذته
ما أظن يسكني غيرك

يا انتمائي
يا حدودي
يا سمائي
راضية بشرك وخيرك

[منتهى القريش]

البرد .. كافر
والحزن .. سافر
والليل ..
ما يستر عورة الأحزان

ما قلت لك.. لا تسافر؟
موت تصبح هـ الحياة
تابوت يصبح هـ المكان

في غيابك..
كل أفراحي تهاجر
خوفي يكبر .. أفتقدني
وافتقد معنى الأمان ..

[منتهى القريش]

احتمال إنك تغيب
واحتمال إني أغيب
والأكيد..
مهما نبعد نقترب
ليت ظني ما يخيب ..

[منتهى القريش]

داخلي شي أكبر
من مجرد إشتياق
داخلي صوت احتراق
تدري شنهو الإحتراق؟
ينهدم كل شي جميل
والطريق الـ يودي للفرح
شاحب ومعتم طويييييييييل
تختنق بانفاس حزنك
تمشي وحدك في الطريق
المدى حولك يضيق
ما تحس بأي شي
يموت حولك كل حي
الفرح صوته يموت
تغص باوجاعك سكوت
دخيل اوجاعي وحزني
لا تغيب أكره غيابك
لا تلوح لي بيدك
تقول باكر نلتقي ..
شوف بعدك ايش سوى
شوف وش سوى الفراق ..

[منتهى القريش]

نتلاقى مثل أغراب ..
ولا تسلم ..
قول لي ليه؟ فهمني!
ترى والله
عجزت افهم ..

[منتهى القريش]

إلك داخلي وحشه
قلوب اطفال ..
عجزت إني أناغيها
وعلى قد الفرح بيها
عجزت إني ..
أجاري لثغتك فيها
صدقني ..
أحاسيسك
عجزت أعرف معانيها ..
دخيل الله تحملني
وعلمني
أطفالك بوسط الروح
كيف اقدر أربيها؟

[منتهى القريش]

رحت ابعيد ..
وانا طفله
كبرت .. وكبرت اهمومي
صرت نخله
تهزها الريح
والتجريح
يحفر في الصدر وديان
كثير احزان
تعصف في شراييني
أنا ويني
اشكثر شاب الحزن فيني
وشابت فيني الطفله

[منتهى القريش]

أحاول أخدع أحزاني
وأنسى غربتي وياك ..

[منتهى القريش]

يا حسافه
كيف تبعدنا المسافه
كنت أداري
غربتك داخل عيوني
كان طيفك
كلما أبعد يجيني
بس تدري
فيك خابت كل ظنوني ..

ويااااااااااااااااااا حسافه ..

[منتهى القريش]

كنت أغرق في سرابك
كان إحساسي غريب

كان يشقيني عذابك
كنت من روحي قريب

كان يتعبني غيابك
رغم إني كنت اشوفك
وسط روحي
كان طيفك مثل ظلي
عن عيوني ما يغيب

الحين اسألني
ليه معك أعشق عذابي
ويا ترى يهمك غيابي؟
يرد لي صمتي بقسوة
والله إحساسك غريب ..

[منتهى القريش]

فقد صوتي
حروف اسمك
تحن اشفاتي تنطقها
صرت اقولها بصمتي

فقدك الشارع
الحاره
صرير الباب
الـ يوجع بذاكرتي

فقدك الدفتر
الـ يحضن خرابيشي
سؤالك
رعشة ايدينك
أيش اليوم دونتي؟

فقدت الدهشة في صوتك
من أغلط .. تعاتبني
تقول هذا .. أكيد انتِ!؟

[منتهى القريش]

كل خطوة لك خذتني
عنك أكثر أبعدتني

كل دمعه من عيوني
من ذنوبك طهرتني

[منتهى القريش]

سمعت البارحه صوتك
مع اللهفه
يدق الباب

علقت الفرح قنديل
شهقة ليل
تحضن بالأمل بكره
تجي فكره ورا فكره
تبدد وحشة اللي غاب

[منتهى القريش]

رصيف وشمس
وشارع
ووجوه مسبيه

ليل وعتمه
ومواجع
واحلام منسيه

كأن الصبح متأخر!
لو صعبه هالجيه؟

[منتهى القريش]

تأخر حلمي وما جيت
إلك حنيت
مر لو طيف ..
وانثر جيتك فرحه
بزوايا البيت

[منتهى القريش]

ليه كلما شفت اسمك
احس السما أكبر
أحس الدنيا تتغير
أحس الكون فـ يديني
ربيع .. أشجار ..
حقل أخضر ..

[منتهى القريش]

واحبك بعد أكثر
احس الدنيا بوجودك
تصير أحلى تصير أكبر

[منتهى القريش]

تحبني كثر ما احبك؟

أريد أهرب من احزاني
خبيني
هناك ابعيد في قلبك

[منتهى القريش]

الكون من غيرك سراب
واغتراب
والسما موحشة
والأرض يسكنها يباب

[منتهى القريش]

أريد احضن معك فرحه صغيره كثير
واطلقها افـ سما روحي
فراشات ..وحلم يكبر
ألونها عشب أخضر
وارسمها عصافير

[منتهى القريش]

شفت اشلون
يصير الكون
في قربك
فرح مجنون؟

[منتهى القريش]

حياتي بـ وجودك ..
تصير أفراح .. تصير أعراس
واعشقها بعد أكثر ..
واحسدني
احسد فرحتي بقربك
واخاف يموت هالإحساس

[منتهى القريش]

روح سافر
واحمل احلامك معك
ابتدي م النهايه
واترك اجراحك معايا

[منتهى القريش]

لا بغيت ترد
بس عطني خبر
بـ ارسم اعيوني مطارات وسفر
بـ امسح الذكرى ولا بـ اترك أثر

[منتهى القريش]

صحيح ان الورق أصفر
شحت مشاعرنا
وكل شي فينا متغير
لكني
بكتب نهايتنا بـ حبر أخضر

[منتهى القريش]

في حقايب عمري بدفن أمنياتي
بنسى إنك
كنت حفنة من مشاعر
كنت قصيدة كاذبه ما كتبها أي شاعر
كنت عمري اللي أعيشه
خارج حدود سجني
صرت سجاني الـ قتلني
صرت موتي
في صراخي وفي سكوتي
وبيك ماتت .. أحلى فرحه في حياتي

[منتهى القريش]

كيف تقتل احساسي وتمشي في الجنازة
مات ضميرك؟ ولا أعطيته إجازه؟

[منتهى القريش]

ميتة بيك ومن غيرك أموت
إن حكيت أشقى ..
وهم يقتلني السكوت

[منتهى القريش]

كأني يوم ودعتك
ودعت العمر كله .. ولا عاد به أيام
تعال ..
بتنفس وجودك .. أو حتى جحودك
تعال بـ احيا بك .. في زحمة اغيابك
واخدع حنيني لك
واقول .. اش جابك؟
لو حتى في الأحلام

أسمع صدى صوتك
يمكن تناديني
وتهلي بك عيني
أدور واتلفت ..
أدري الصدى أوهام

[منتهى القريش]

تدري وش سوى حنيني
ضايعه بيني وبيني
كلما غمضت عيني
فز دمعي يحتريني

[منتهى القريش]

في غيابك
ينكسر فيني الأمل

[منتهى القريش]

ليه من أشوفك
ينتحر كل الكلام
وما ألاقي شي اقوله

[منتهى القريش]

قلت أبعد
يمكن أرتاح افـ غيابك
صرت أقرب
يمكن أدمنته عذابك

[منتهى القريش]

كنت أكذب إحساسي واقول:
إني نسيتك
أحاول أقتل صورتك في داخلي
واهرب بوجهي لـ وجهي في المرايه
وما ألاقي غير وجهك
يستفز الجرح فيني
وابتدي بك م النهايه

[منتهى القريش]

(كل شي حولي يذكرني بشي)

أثاري انك صرت ظلي
صرت كلي
صرت عندي كل شي

وضاااااااااااااااااااااقت الدنيا علي

[منتهى القريش]

كلما جيت أقول ما أحِبك
ألاقي احساسي يقول
مااااااااااااااا .. أحَبَك

[منتهى القريش]

ليه كلما تجفا أحبك
وكلما حاولت أبعد عن طريقك
ألقى خطواتي بدربك

[منتهى القريش]

أشتريك
لو تقول ..
انك بعتني
ولو تروح أبعد مكان
لجل عينك أعتني

[منتهى القريش]

مو مهم إنك تحبني
المهم إني أحبك
مو ضروري تتهمني
بالجفا .. لو كان ذنبك
راح أسامح بك خطايا واتهمني
بس رجايا .. أبقى قربك

[منتهى القريش]

شوف دموعي
تبلل أوراق الغياب
شوف ضلوعي
ما بها غير العذاب
شوف قلبي
كان ينبض بالفرح
ومن جفيت
مات فرحي
وقلبي م الأحزان ذاب

[منتهى القريش]

ليه تغضب ..
لما يجرحني غيابك؟
حقي أزعل ..
لما أغرق في سرابك
ليه حنيني بس حنيني يجرحك
يعني مو من حقي أتعب؟
ولا أعتب؟
لازم أحبس دمعتي؟
لازم أبلع غصتي؟
لازم أتحمل عتابك؟

[منتهى القريش]

أعتذر لك عن حنيني
أعتذر لك
لو دموعي توجعك
ولو بغيت تروح .. روح
بس تأكد
بـ اترك احساسي معك

[منتهى القريش]

يا حزن وش فيك جارح
يا فرح لا وين رايح