يا هند..

[محمد المناع]

البارحه .. يا هند/ في عين البصيرة و المنام
شفتك وانا ما بين حلم و بين جفوة مهجعي

شفتك على عرشٍ تعالى فوق هودج من غمام
وطيور من حولك تطوف/وطير تسعى لك سعي

والناس من دونك جلوس/إلا ثلاثه لك قيام
ثالوث ضيع وش يبي .. وإلا / يقول أو يدعي

هذا يقول / أنا هنا ( قيس الملوح ) و الغرام
سيفه مضى بي و انتهى ..واجهز وقرب مصرعي

وآخر يقول أنا الشجاع (ابو المكارم) والعظام
تصغر بعيني لو نزفت الحبر و ارخيت اصبعي

والثالث اللي من كبار الرهط و صغار المقام
يقول من باب الأدب .. اصغوا لقول (الأصمعي)

و اشر علي و قال من باب التهكم .. يا غلام
أخرج علينا واستمع/ و ازداد ..من زادي وعي

خرجت أنا.. من ركنك الشرقي/و من باب السلام
بيدي عصا موسى وسيفٍ ../ من سيوف التبعي

ارخيت حدي في رقاب البغي و احللت السلام
و اقول خذها../ من يد (المناع) و الجد المعي

وأخذت جوله في بلاط الحكم و ارخيت اللثام
من شان تعرفني حجيج البيت ../ و تلبي معي

هلوا و لبوا واقبلوا .. و استبشروا بعد الظلام
من يوم ظللهم سماك / و عين غيمه .. تدمعي

لكن صحيت ب مذن الحاره ../ ينادي للصيام
وامسكت عن باقي الكلام.. اللي يجرح واقعي.

#محمد المناع