(توفّت ما لقت فرحة...

[فهد ضيف الله البيضاني]

توفّت ما لقت فرحة
سرى من خاطره ضايق ..طريق أحزانه المزحوم
يخلي نقطة الحاضر ..لنقطة ما يخليها
حدود اوجاعه اكبر من حدود الدوله المرسوم
ثلاث اسنين وطيور العنا بالحوم تطويها
ملى دلو الحياه اعذب ظنونه والحبل مبروم
على ايدين الهقاوي والهقاوي تبت ايديها
رمت به جمّة ابيار الندامه والندم يحموم
غلايانه قتلها كلها عن بكرة ابيها
تلفت في محبينه وسالت دمعة المهموم
تحيي خده الشاحب .. عسا الله لا يحييها
يحاول ينقذ البسمه يحاول والقدر محتوم
توفت ما لقت فرحه تصافحها وتحييّها
هنا الخذلان وطعونه هنا احلامه غدت في يوم
وطاحت من سما ودّه نجومٍ كان يغليها
تمنى واقعه حلمٍ يمرّه من خلال النوم
متى ما فاقت اعيونه كوابيسه يعدّيها
سرى والنفس يألمها تراديد العتب واللوم
وذيب الياس ينهشها وسيف الحق حاميها
يقول الموت مختاره ولا رحمة حقير القوم
نموت اعزاز ما نحيى بذلّه ما ندانيها
جزا حبي ونلته وش بقا يالخنجر المسموم
سوى كرهاً ملا الدنيا من أولها لتاليها