بيـن الظـمـا والمـــا

سلطان الوثر · 10-27-2011, 03:50 AM

باقي من خيوط المسا خيط ذااايب
بين النحر والجيد .. ياجيد ريمة

الصدر كنِّه من لضى الكعب رااايب
والكتف كنِّه ذروة ذراع غيمة

وقذولها .. ياقذول غرَّ السحايب
يمشط بها النسناس بردهـ وديمهـ

ياخاطري ما بالهوى انسان تايب
حطَّ السفر واقرا كتاب النديمة

واسرد لها رحلة ثقيل الركايب
واكتب لها : ماعااااد للصمت قيمة

الغيرة امَّ العشق بنت المصايب
خلَّت جميل يشوف اخيِّه خصيمه

يابنت انا تاسع هذيك العجايب
لاصرتي انتي ثامنتنا العظيمة

بين الظما والما وضرب الهبايب
أنا الحصان اللي صهل من صميمه

أنا الحضور اللي( مدى الحبر غايب)
وانا الغياب اللي (شكى حضور ضيمه )

أنا المصاب اللي لقيتيه .. صايب
وانتي صواب اللي جروحه أليمه

وان كان شوقك صمت .. فيها طلايب
الصمت ماعقــَّـب وفا يانديمة

وشكراً