بارد الجمر..

[حسن نسيب]

بارد الجمر.. اشعل من جنونك شغف
الملامــح.. بـقايا يكتسيــها رمـــاد

جوفها عمر يابس من رغدها نشف
يرتسم وجه باهت في ملابس حداد

أسكب اللي رشفته لين عرقك نزف
واطوي اللي عزفته في سكون المهاد

امسح اللي كتبته.. كان حاضر وقف
أحترق صار ذكرى وقت بالهم جاد

جدد العمر واروي قلب ظامي رهف
عطر انفاس ليلك طال شوق وسهاد

كسر القيد واطلق روح تهوى الترف
طير.. حلّق.. وسافر في محاني الوداد

الثم الزهر وارقص لحن عزف السعف
داعب اطياف لاحت.. وهجها في ازدياد

خبروا من سألني نبعكم ليه جف !
ليه تخفي حنينك كبرياء وعناد !

يا عذولي خذلني من حويته كنف
ما التفت لي رماني تحت رحمة زناد

ذبت هم ومواجع لين عظمي رجف
فاض من كاس ياسي سال بحره مداد

كيف للحب نوفي والمظاهر خزف !
كيف للعمر نسقي من مشاعر جماد !

طاح ما كان خافي والستار انكشف
مات ما كان جامح قبل يوم الحصاد

كم تمنيت يرقى للمعالي شرف
كم تمنيت يرضى.. لو صفا كان ساد

انتظر خير غيثه لين سيله جرف
ساق حمله شماتة.. سيل يمحي بلاد

ليت ما هان قدره.. عن غرامي عزف
ليت ما عاش صورة في صراع وجهاد

لا تظن المشاعر بعثَرَتها خرف
صاح بعضي وكتبته.. ما خطيت المراد

اشتري الصمت حكمة لو طغا او عسف
والبس الصبر طاعة دام دربي رشاد

الخطايا خطايا وان لحقها أسف
والنوايا خفايا عند رب العباد

من عذلني عذرته جاهلن ما عرف
من رحل ما رجيته دام ناوي البعاد

بارد الجمر.. اشعل في عيوني شغف
ما بقى في الملامح غير كومة رماد


حسن نسيب