البحيرة والنورس

[حمد الدوسري]

صدقني ما ضقت من فرقاك بالمره
بس ما ذبحني سوا حاجه بجوالي
تدري وش اللي ذبح قلبي من الحره
اني مخزنك في جوالي الغالي

 

[حمد الدوسري]

قلت الحقيقه واضحه إبلا تذاكر
ماكل منهو زل يلقا له اعذار
وانتي نسيتيني وانا كنت فاكر
اني بجي ويكون طعم اللقا حار
لكن وعد مني اذا عشت باكر
ماعاد لك موعد وماضي وتذكار

 

[حمد الدوسري]

ياراس لاترجي رفيقٍ يعزك
ان كان ماعزيت نفسك بتنهان
قام الردي يجسر عليك ويدزك
دارت عليك اليوم دورات الازمان
الناس ماتعطف عليك وترزك
ارفع مقامك وارتفع ياكحيلان
والموقف اللي هز قلبك وهزك
لاتلتفت للي غدى ماضيٍ كان
يحز بالخاطر وانا ادري يحزك
انك تشوف الذل من اقرب انسان
اصبر على همومٍ كثيره تلزك
وقف على حيلك ولو كنت تعبان
عاند زمانك في طموحٍ يكزك
لو قالوا : ان معاند الوقت خسران
قلوب خلق الله بعضها تعزك
واكثر من اللي تعزك قلوب عدوان
يعني اليامن طحت محدٍ يرزك
انكان مارزيت نفسك بتنهان

 

[حمد الدوسري]

قالوا امدح شيخ والا امدح امير
لجل تكسب من مديحه فايده
قلت انا في خير واحوالي بخير
ليه ادوّر شي ماني رايده .؟
ادري ان مال الكبير الا الكبير
الرجال تقاد والا قايده
اكره اثنين : المنافق والحقير
تستغل طيب الرجال الرايده
ان مدحت امدح وانا وجهي سفير
مدحتٍ للحق ماهي سايده
وكانها ماجات من قلب وضمير
مدحتي ذمه بحقه كايده
وش علي ان صاد له طيرٍ يطير
لاهو بطيري ولاني صايده
من خلقن الله احب اكون غير
ما احب اكون حاجه زايده
الفقر ماعذرب اخلاق الفقير
في السنين الحاضره والبايده
في الزمن اشياء تعني لي كثير
التمام الشمل حول المايده
ومنظر البسمه على الطفل الصغير
في نهار العيد يوم تعايده
قلتها وعذري يصير اللي يصير
كلٍ راسٍ يرتخي لوسايده