مُتنفس .. شِعري !

[عُمق]

في عيونٍ تلتقي على ضوءٍ خافت
وفي أرواحٍ تتشابك على حافته
تسكن الحكايا بين نبضات صمت
وتزهر الكلمات حين يُلامسها الشوق.

 

[زايد الشليمي]

ياسما من يطولك لو رقينا السما ..
منه اللي وصلها سدرة المُنْتـهى
:
بين حد الحياة .. ..وبين حد الضّما
واقفة ..والكلام .. كلّه بصمْتَهَا
:
مارمَت إذْ رمتْ رمشها اللي رمى
أعدمَت جيل كامل وانتشر صيتها
:
ما ألوم العيون لو تمنى العمى
بس منه لمحْها ...مات في وقتها
:
غَرّدي للصباح .. وارقصي كلّما
ضاق صدر الحياة .. وانْخَربْ بيتَها
؛
جيت أبَكْتب واحاول بس حول الحمى
من جنوني أخاف كلمةٍ قلتَها
:
أنتِ دنيا لْحَالك ..والبقيّة دُمَى
لو كَتَبْتِـك ظَلَمْتِك والكلام انْتـهَى
:
زَاْيِـــدْ ..

 

[زايد الشليمي]

:
عذّااال ..


:
صكّت ضلوعي وانهدم حيل رجّال
والدمعة اللي في ضلوعي ثمينة
:
عذّال..شفني ..تعرف الويل والحال
مادام تقرا بالوجيه .. الغبينة
:
ياضاقت الدنيا تذكّرت عذّال
يضحك لَوِنْ جروح صدره مدينه
:
لاتسأله ( عذّال)وشلون الأحوال
يرسملك الضحكة بلحظة حزينه
:
لو اسألوني تَعْرِفَه ..قلت ذا خال
ابوه خال امي .. وعيني لْعَيْنِـه
:
بالغصب يقربلي..عشان أقدر اختال
من مثلنا .. دام العلاقة متينه
:
فطرةْ كرَم ماهي كذا صفّةْ دلال
محّدْ غَلَبْ يسـراه.. الا يمينه
:
كفّه وطن .. ماقلتها موقفه قال
روحه سما .. ماشال لاحّد ضغينه
:
الطيب واضح مايبي كثرة المال
يعطيك مابيديه .. والا يدينــه

زَاْيِـــدْ ..

 

[نايف الروقي]

:
.
ياعيني مادام الجفن مامر فيه نعاس"
مزون الدموع الحامية جف ذارفها.
"
لاجت تنهمر من عمسة الخاطر المنحاس"
ملامح شرود النظرة الوجه يكشفها.
"
بذمة ضمير ٍ لو تماسك رهيف احساس"
شموس المبادي من دجا الفكر يكسفها.
"
زعل ناس عندي لو يساوي معزة ناس"
تساوت بعرفي ناس مع ناس م اعرفها.
"
ياصدري عن الضيقه ليا هبك النسناس"
تلق الهبوب ودرفة الضيق طرفها…!!
؛
الروقي .. ن ..!

 

[زايد الشليمي]

ياسمانا الجوع يطلبك الرغيف
الرغيف المر.... حباته عِنَـب ْ
:
مايمل الريق من طعم الخريف
والسوابق كلها لَعْنْ وْتَعَب
:
مادريت ان الشتاء عقله خفيف
ولادريت ان المطر ينزل عتَب
:
لايغرك ..داخلي طفلٍ ضعيف
أكثر اللي شفت في وجهي كِذَبْ
:
مابقى لصدورنا غير الرصيف
ولابقى لجلودنا غير الجرب
:
ياخوي ماعاد بالعالم شريف
الأدب .. مع عالمك قلّة أدَبْ
:
تدري اكثر شيء بالدنيا سخيف
انْ كِل همومنا حسب الطلَبْ
:
يا أمينه ليت ماشاف الكفيف
كل نكبة بالحياة أنتي سبَبْ
:
أكبر من الويل..نسيانك مُخيف
ياما صدري من ورا كفوفك شِرِبْ
:
احرق الدّخان صدري يالطيف
كان تبغى خذ من ضلوعي حطَب





؛

زَاْيِـــدْ ..