مُـذَاكِــراتْ 24 سبتمبر ...

[تهاني سلطان]

.

هاللي حولك .. ماحد يحس فيك ..
و هاللي حولك .. يسألون شنو فيك ..
وهاللي حولك .. يتذمرون من تصرفك وياهم ..
و هاللي حولك .. يجبرك تسكت و تبتسم ..





البكاء الصامت .. هالحالة اللي صعب أنها تجي بوقت يكون هالوقت من الاوقات النادة اللي تصادفك .. و بهالوقت تحديداً يكون الكثير حولك .. يشاركونك الحديث .. و يحاولون يفهمونك أكثر .. هم بداخلهم فرحانين لأنهم و ياك .. و أنت بداخلك حزين لأنك صُدمت من ناس غيرهم .. ردة الفعل منك غير تجاههم .. حتى هم يبدأون يسألون نفسهم أخطينا بشيء .. قصرنا بِـ شيء .. و يحطون التقصير تقصيرهم و الذنب ذنبهم .. و أنت معاهم جسد و التفكير بعيد عنهم ..


البكاء الصامت أنك تحاول تبكي موب بِـ شكل داخليّ ... لا هالشيء تظهرهـ لكن بدون صوت .. بدون تنهيدهـ .. فقط دموع تشارك خدك .. وتحاول تقلل من اللي بخاطرك .. يمكن معاها تفضفض من ذاتك لِـ ذاتك .. يكون هالبكاء بعيد عن اللي حولك .. يكون بِـ وقت مافيه غيرك .. حتى لو كانت أنفاسهم تشاركك بِـ المكان .. مُتعب هالشيء .. لكن فايدته أنه يعيشك البُكاء الحقيقي ..


و هذا البُكاء .. مشكلته النَفَس لأن بنفس الوقت اللي تبكيّ فيه لازم تكون تتنفس طبيعي .. عشان ماحد يحس ..حتى بصوت نفسك .. يعني تكون تبكي من شيء و تحذر من شيء ثاني .. أحيان من قوة الألم اللي بداخلك .. تزفر زفرة تحس أن وياها العالم حس فيك .. تحس وياها أن العالم ينبض فيك .. ومن قوتها يمكن تتحول لِـ البكاء الحقيقي .. وهنا تكون انتقلت لِـ مشكلة أكبر لِـ أن صمتك ماراح يفيدك .. و لأنك راح تتكلم عن مشكلتك ..


يظل هالبكاء مراحل يمتد من البسيط اللي يكون وقتيّ وينتهي .. يمكن عشان تغير المكان .. ووجود ناس أكثر .. و زحمة و روحات وجيات .. و أحيان يكون ألم من روح لِـ روح و هالشيء مُدمر .. لأن مهما ظليّت مع البُكاء الصامت إلاّ و تنفجر بِـ ببكاء حقيقي يطهر قلبك .. و يهديّ أعصابك .. ويخليك تشوف الحياة صح .. و تشوف الأمور كما هي تماماً ..








الأربعاء 15 - 07 - 2009م

.