[ .. غـن لا ضاقت عليك الوسيعه غـن .. ] .. !!

[سكون]

احس اني وسط ليل طويل ناسي فجره
اعيش بظلمته واسرح بافكاري الى المجهول

افكر وانتظر صبحي الجميل الباسم وعطره
وتصدمني هواجيسي ولا القى لهمي حلول

انا مليت واحساسي معاك ارهف من الشعره
والوم القلب لكنه يعاند وانته المسؤول

اريد ابكي على قلبي وتحرقني انا العبره
واحس بدمعتي الحاره على محجر عيوني تجول

تبي تنزل واعاتبها تقول شفيك مغتره
واقول الصبر يادمعه انا وانتي نخل وخيول

انا ياليل وش ذنبي تصبرني على القمره
وتجبرني على همومك اعايشها بعرض وطول

اهوجس واحسب نجومك وقلبي يلتهب جمره
واضيع حسبتي وفكري على باب الوصل مشغول

انا ياصبح اترقب طلوعك والامل بكره
اريد تكحل بنورك وليلي ينجلي ويزول

حقيقة او سراب انتا انا مدري وش الفكره
انا صبري بدأ ينفذ واخاف انك امل مقتول

اريد تعيد لي وقتي قديم وشمسه وفجره
اريد اعرف انا منهو اريد تفسر المجهول