[غريبة أمنياتي]

[نورة القحطاني]

لآ شعور إلاّ شعور المبعدين
‏يآخذك في غفلة احساس الألم !

/

غريبة أمنياتي ؟! يابعد هالعمر ، وأحبابه !
شتات يجندل الأحلام في لثغة مساءاتي !

تبيّن لي بكفينه خطوطٍ تشبه (ا)كتابه !
تميل أحيان للذكرى تذكّرني صباحاتي

ترجّل من فتات الأمس خيّالٍ كسر بابه !
يلمّ الروح من بعد الفراق وصمت ساعاتي

لمحته حلم مدري فيه انفاسٍ من أطيابه
سجين الليل من يرحم أنينه داخل أوقاتي

على نفس المشاعر
والشرود
ولمحة غيابه
لعب طيف السنين بشمعةٍ ترقص بمشكاتي !

سهرته ليل !
لا والله
سهرته عمر ..
وأسبابه
تبكيني إذا حلّ الصباح وتنظم أبياتي !

ولا مرّة فقدت من الأمل طيفه وترحابه
احسّ انه قريييب ب داخلي يطوي معاناتي

يقولون البطى ينسي أنا أشهد هالبطى جابه
على جنحان أشواقي يبدد ليل وجهاتي !


/



لو إنّنا مع كل ضيقٍ بكينا
‏ماكان شفت بعسكر العين أهداب

()