نصوص بلا أجنحة ..🪽🪽

[نوف الناصر]

•
‏

‏•
‏كان يجْمع لي عصافير الصباحات وْ يعلمها أغاني
‏ في حضوري ..
‏كان .. يعزفني ..
‏ينوّت من ضلوعي
‏ضلع .. ضلع ..
‏يوزن عْيوني موسيقى شعْر
‏وِ يْدوزن شعوري ..
‏[ فاعلاتن فَع ]

‏كان يفتح للحكايات الشبابيك وْ يناديني :
‏( تعالي ..
‏وينك انتي ورْدتي ؟!
‏ودي احكيلك حكاية
‏لين تتثاوب فراشات بْـ ملامِحْك
‏وْ تنامي في خيالي .. )

‏( بس اخاف اني انام
‏وْ تفتح الشباك ..
‏ترحل ..!
‏تترك غْيابك معلّق في غصن روحي ..
‏ ويمحل ..! )

‏( لا تخافي..!
‏غمّضي عينك على صدري قصيدة
‏واسكنيها بيت .. بيت
‏ واكسريها ..
‏ والعبي بـ ( الرمْل )* في داخل ضفافي ..)

‏( ممكن تْدندن بِـ تهويدة
‏وتهمس لي : ( أحبك ) ..؟!
‏قصّ لي قصة أبشعر
‏ كم أنا طفلة صغيرة ..
‏ تحضن يْدينك وِ تِتكوّر فِـ قلبك .. )

‏كان يقرا [ كان ياما كان ]
‏ماشعرت الاّ غفيت ..!
‏و الصباح يْمرّر يدينه على وجهي ضوا
‏ ينفض نِعاسي ..
‏و افتح عْيوني وَ ادوّرْه بْـ عيوني
‏و المكان ..
‏فجأة وَ اتعثر فـ ياسي
‏والمح الظلمة عناكب فـ الزوايا ..
‏وانطفيت ..!

‏قفّل الشباك .. راح ..!
‏ماترك لي غير خيبات وْ جراح ..!
‏والكثير من الهدايا ..
‏دمع ..
‏وِ اسوارة .. صور ..
‏وردة ..
‏ قصايد ..
‏وجه ذابل فـ المرايا ..!

‏

1 اغسطس 2025

https://x.com/too_simple_girl/status...702968369?s=46

 

[نوف الناصر]

‏

‏

تلويحة الظّلّ الأخير
بين الجهات الأربعة

تعلّقِت بين المصير
والضّيق وَاطراف السّعة

كانت تلوّح بالهجير
والذّكريات الموجعة

لمحت لي حلمٍ ضرير
ناديته وْ رحت اتبعه

تعثّر بْـ ظلّي كثير
وِ تْعثرت روحي معه

أحيان احس اني بِخير
آخذ مِنَ الحظ اروعه

واحيان احسْ حظي فقير
يَنْكَأ مِنَ الجرح اوْجعه

يا ليتني أقدر أطير
بَلا هموم وْ أمتعة

واهرب مِن الظّل الأخير
و مْن الجهات الأربعة

‏

10 فبراير 2025

رابط تويتر


https://x.com/too_simple_girl/status...739284984?s=46