نهايات ..!!

[نواف التركي]

لي فـ الغياب أحباب
دام الحضور قبور
لا تقرّب الأغراب
دوم الغريب يبور


ويغفى النور ..
ولا أحسّ الحضور حضور ..
وأحسّ إنّ الغياب أجمل ..


تعال نغيب ..
تعال نروح للأخر ..
تعال أكثر من اللازم ..
تعال وبس ..



تعب ياصاحب الأقلام ..
تعب وأحلامنا ما عادت الأحلام ..
تعب وأكثر مساحات الكلام قبور ..
تعبت أحضر شعر وشعور ..




تفتّش بي قلوب الناس ..
عن الإحساس ..
عن اللي ما وراء الصمت ..
عن الخافي ..
عن الــ ... ولاّ بلاش أحكي ..

تعبت أحكي ..
تعبت أكتب ..
تعبت أكذب ..
تعبت أحضر شعر وشعور ..

 

[نواف التركي]

هذا أنا يا أسماء
تعيشني جروحي
هارب من الأشياء
متوحّد بروحي
أتعمّد الأقصاء
وأستفرد بـ بوحي

هذا أنا ..
أحيان يخذلني الحكي
أحيان يأخذني الحكي
أحيان أحسّ أني طفل وأشاغبك
وألاعبك ..
وأزعل على اتفه سبب

وأحيان أحسّ انّي كبرت بـ هالعمر
وأنّي كذا ملّيتني
وأنّ السنين اللي تمر
ماخلّت بعمري عمر
وأشتاق لـ الأوّل وأحن
وأحسّني مثل السفن
تبحر بعيد مسافرة
وتغيب ضحكتها على كل المواني العابرة
ومكابرة ومكابرة
تخاف لا هبّ الحنين شراعها
تشتاق لأحضان الوطن

لا تعبثين بشاعر أضحى خالي إحساسه من الأحساس
خليه مثل الناس
ينام خالي هم
يصحى ولا يهتم
خليه يا أسماء
هارب من الأشياء
هارب من جروحه
هارب إلى روحه
والسلام
يرفرف بصدره حمام
والسلام يرفرف بصدره حمام

 

[نواف التركي]

وبيرجعون الراحلين ..
بيرجعون ..
ما خانوا الأحباب
لكن يخون الدرب
يا أسرابنا الغيّاب
بكرة تجون مسيّرين ؟
ولاّ الحنين ..
غصنٍ رواه الفقد ..
حتى اينع النسيان ..

وبيرجعون الراحلين ,
بآخر نفس لـ غيابهم ,
وأحبابهم ,
واللي بقى من ذكريات الأمس ,
..
هذا الشعور / النور ,,
يا موقد الظلما ,
ما فـ الحضور حضور ,
ولا بقى بأرواحنا للمقبلين إحساس ,
لو يفهمون الناس ,
إنّ الحديث جروح , وأنّ السكوت الموت , وأنّي مابين الصمت أزرع لصوتي صوت ,,
ماودّي أفقدني ,
يكفيني اللي راح , منّي مع اللي راح ..
سنين أدوّرني ,
مرّة مع اللي الجاي مرّة مع اللي راح ,
وأيّست ألاقيني ,
ولقيتني فيني ..
أحيان ماتدري عن ضيعتك فيك ,
ما عاد أخلّيني ,
يا آنا دخيل الله , لا عاد بي ترحل ..
خلّك هنا وياي ,
ما فـي غيابك خير ..
وبيرجعون الراحلين ؟
مدري مهمّ رجوعهم ..
وإلاّ المهمّ الفقد ,
وأقول ماخانوا ..
لكن يخون الدرب ..
وبيرجعون بخير