( فاهم غلط )

[علي المحمد]

والله بعض الأمهات و بعض المتزوجات برمضان يكسرون الخاطر ( الود ودي أعطي كل أم وكل زوجه كرتون رد بول )

ياهم يكرفون كرف ... اتحدى جنود المارينز بالقوات الأمريكيه يكون عندهم تحمل مثل ذا المسكينات

للأسف بعض الوحوش لما يكون الملح ناقص بالاكل يسمعون صراخه اللي في نيودلهي

ويبدا يستثور وشوي وتجيه جلطه أو ينهبل

لعنبو ابليسهم مايحسون وما يستحون وما بقلوبهم رحمه على هالمسكينات

آآآه يالقهر ... قسم بالله ودك تجيه المدام وتصفقه بالملاس على جبهته بأقوى مابحيلها

الحين ابي اعرف حاجه :

وحده تقوم قبل العصر وتبدا تجهز الفطور لين المغرب و بعد المغرب تقدم العشاء لزوجها وعيالها و بعدين تروح المسجد تصلي التراويح وبالعشر الاخيره تصلي القيام

وترجع عشان تسوي السحور يكون جزاها صراخ ونكد . !!!

على الاقل اشترو لهن ( رد بول ) بدال ( اللبن ) على السحور

على طاري الرد بول

بشتري للوالده أربع عبوات رد بول لأن يوم الاثنين الجاي عندنا عزيمه كبيره