مركى وسوالف

[موضي]

أنا وأمي تابعنا مسلسل عمر - رضي الله - حلقة بحلقة وكنت من أوائل المؤيدين له والأسباب تطول ولا لي خلق أخوض فيها اللحين .



سامر اسماعيل سبحان الله هنا يشبه أحمد الله يرحمه خصوصا ابتسامته هذه

 

[موضي]

من مدة جيت من المدرسة وشكلها مريحة والطريق قريب نص ساعة ولينا وصلنا الحمد لله
مهيب ذيك الهجرة اللي تقطع ظهورنا وتحوم تسبودنا ماوصلنا
طالباتها شويات مرة على اربع طالبات بس لا وثاني أو ثالث متوسط طالبة وحدة !!! ياربي ذي شلت همها أحسه درس خصوصي مهوب حصة !، والمعلمات القديمات يعلقون يقولون : لاغابت مافيه جدول خخخخ
الله يكتب لي الخير في هالمدرسة ويمنحني الصحبة الطيبة

 

[موضي]

وكالعادة أعلّم في مكانٍ طالباته أقل من المستوى العادي !
مادري وين العلّة فيه ؟ وليه هالهجر طالباتها على مستوى سيء للأسف !
بديت أكره التعليم وأكره شرحي ، مهما تحمست وشرحت لين ينبح صوتي مع عروض بوربينت وأوراق عمل وأوراق لتسهيل الدرس مافيه أي فايدة
(( ضيّ محبطة ))



::

 

[موضي]

أحس يمر اليوم بدون مباراة إنه يوم ممل ، يمكن أنا مفتونة على قولت أمي
بس فعلا الحياة بدون مباريات مالها طعم ، جميع الدوريات متوقفة الآن على فكرة استعباطية إنهم يريحون بين الجولات .



رغم كل هالوحسة مع لغتي الخالدة للصفوف المتوسطة إلا إني ما اتخلى عن شيئين :
كتاب + ريموت التلفزيون
يالله أنا أحب شي اسمه تلفزيون ومستحيل أجلس كذا من دونه وإذا اضطريت في يوم مثلا وطلعت لاستراحة مع اخواتي أحس إن فيه شي كبير ناقص !
مع إني ما أشوف إلا قنوات الكورة والسياسية والوثائقية فقط وباقي القنوات ما اهتم لها ، يعني مثلا اليوم من قمت العصر وأنا مع نبيل الجنابي لين المغرب ووصل بي الهوس إن أي مذيع يغيب في القنوات السياسية - خصوصا - أفقده ، لو يتغير أعرف هالتغيير زي الجنابي يوم خفف الصبغة من السوداء الفاحمة للبنية وغدا أملح
والمستقلة لي معها صولات خصوصا مع الهاشمي فمرة قد أرسلت له إنه يستقبل يحيى الحوثي قبل العام وجابه عقب الرسالة هالقناة أحبها رغم إنها خربت ولاعاد هيب زي أول .
+ تقريبا أنحن عائلة تحب التلفزيون ونفس القنوات بعد ، لدرجة أتذكر منول قبل الدشوش كنّا نرقى السطح ونرقي معنا التلفزيون لازم ، ننزل تحت نحوله معنا .



::

 

[موضي]

كل هالاسبوعين ضغط في المدرسة ، وهمن حضرنا دورة عشان نطبق التعليم المطور من طرق جديدة في التحضير والشرح وخلافه ، وماشاء الله اكتشفت إن شرحي على الطريقة المطورة وأنا مادري :d
هناك شفت ناس من سنين ماشفتهم من عقب الدراسة الجامعية ، وناس تعرفت عليهم خلال مدرستي السابقة وناس ما اعرفهم أبد بس زمالة اللغة العربية والمكان عرفتنا على بعض .
بالمجمل الدورة مفيدة وفيها تبادل خبرات بيننا كمعلمات ، الطريقة الجديدة سهلة وأقل كرف وأكثر منفعة لطالبات لأنها تربط المنهج المادي بالحياة وبدل مايكون التعليم جامد ممل يصير أكثر امتاع .

- سبحان الله لا الكثرة زينة ولا القلة زينة ، اللحين أدرس أول وثالث متوسط اربع طالبات بس وثاني طالبة وحدة وقاهرتني لأن اختها تروح للمدينة وهي مابينها وبين العاصمة غير 35 كيلو بس ومع ذلك معية تطلع تقول إني كنت مفكرة أنقل حيث إنها مقبولة في مدرسة بس هونت لأنها شافت المعلمات يشرحون زين .
قسم يجيني غلقة وضيقة صدر وأنا اشرح أتثاوب من الهدوء وبرودها إللي يقتل وأحس ودي أرغي من القهر والغلقة .
واليوم بغيت أتوطى ببطنها على درس الفاعل بعد ماشرحته وكل شي حلت لي غلط X غلط ولا عرفت تستخرجه أصلا وهو مهوب درسنا بالأساس استخراج الفاعل بل أنواعه ، عاد أنا هنا طلعت أم العبيد وطلعت من الفصل وتعوذت من ابليس
أنا الله يستر أنا أتلى عمري بيجيني ضغط الله يعدي هالسنة على خير وأنقل وأجي لمدراسنا إللي تفتح النفس لو مهوب كل الفصل شاطر وذهين بس على الأقل الأكثرية فيهن مخ قسم بالله ملييت أدرس في جدران حت ماعاد لي خلق أدرس .

- عاد اليوم آخر حصة أول ابتدائي فنية كملت
أنا ما أواطن المبزرة وخذت متوسط كله على صعوبته كله عشان ما أبي ابتدائي وتاليتها أمسك أول .
أنا وحدة جلفة منيب لبقة ولا أحب البزران ليه تعطوني ما أبي غير إن نصابي كثير
مسكتها غصب لأن عندنا نقص حاد في المعلمات والمعلمات يواسوني يقولون : فنية ولا غيرها .
اليوم هشت عليهم وخربتها كل شوي وحدة فاقتن أثمها وترغي على خرابيط ، ذي لمست يدي وذيك مادري وش سوت
عذاااااااااب خصوصا وأنت تكره المبزرة ولا تحب تتعامل معهم ، أقول ليوفا وشلون من سنين تدرسين أول تكفين .



::

 

[موضي]

عهود :- من الناس الذين نحن بحاجتهم ، من الناس اللذين يخبرونك أن الضحك له مساحات كبيرة في حياتك .
عهود كانت زميلة لي من ابتدائي وحتى الثانوية ، كانت تسبقني بسنة فقط وفي الجامعة لم تنجح في السنة الأولى لحقتها وصرنا ذات الدفعة .
لم تكن غير زميلة فقط ولم يكن بيننا أي حديث ففي الجامعة كانت في شعبة غير شعبتي ، وفي الدراسة لم تكن من أترابي .
عهود إنسان ندمت كل الندم أني لم أعرفها قبل هذا ! مع النقص الحاد للمعلمات والضغط وغباء اللاتي نشرف على تعليمهن ومع شدّة المديرة "على غير سنع" إلا أنها تمتلك قدرة عجبية على أن تسعد قلبك وتدخل الفرح فيه ، حتى وهي في قمة ضغطنا تحوله بأسلوبها إلى شيء مقبول ومحبوب كذلك .

- أنا أول وحدة يمرها النقل وهي الثانية وأحمد ربي إنها الثانية حتى يتغلغل الفرح في داخلي بأسلوبها
من تركب نجلس نسولف ونتشاكي وأنحن نضحك :d وأحس إن راعي النقل يضحك عليها أسلوب
وأنا أكملها بالحتسي العامي القحّ وفجأة وبدون سابق انذار أقلب فصيح عاد هي تنح وتعطيني ذاك التعليق إللي يدويّ ضحك .
اليوم الصبح والظهر ضحكنا لين دمعت عيونا ، لسببين متعيجزة أكتبهن :d

عهود ياضحكة وابتسامة لم أعهدهما من قبل إلا معكِ ، فغالبا مجال العمل فيه من الجدية وإن ضحكنا إلا إن العمل مع عهود غير شكل .


::

 

[موضي]

وعادت المباريات من جديد وبقوة
اليوم أهمها : مانشستر ستي ومدريد
وفي البرشا بس هذه أقوى وللأسف كلهن في نفس التوقيت
وأتمنى من أعماق قلبي الخسارة للريال فأنا أكره الفرحة على وجوههم ، أكره فوزهم ينرفزني بعد
وستي ما أكرهه وشلون أصلا أكرهه ومدربه مانشيني لاعب سامبودريا القديم .

وبكرة مباراة مجنونة بين اليوفي والبلوز



وياحلو ربوع وسهرة على كورة من سنين وانا أعشق هالسهرات



::

 

[موضي]

مباراة الستي والريال مباراة تقهر وترفع الضغط
الستي لعب فيها مباراة كبيرة رغم ظروفه ، تقدم مرتين لكن الدفاع يرتبك وذوليك الحظ معهم يلعب يخرب بيتهم .
من هجمات معدودة قدر يسجل فيها الستي وهنا يكمن الابداع والصعود في عالم الكرة



يايا توري يا أخي أنت فظيع وقلب الستي
( أتذكره أيام البرشا )



باص توري نصف الهدف وجيكو كمل النصف وجاب الهدف في مرمى كاسياس إللي انبطح عقبها
هدف جميل جدًا وتفاهم بين توري وجيكو




أما هارت فهذا نصر الستي حارس فذّ ومنقذ رائع




هالادمي دائما مايوسع صدري هههههههههههههههههه
وزحللللللللق كن الكاس فوق



::