( فاهم غلط )

[علي المحمد]

يقول التاريخ ان هتلر كان يحب زوجته ويحترمها ولا يبالغ بالزعل والقسوه عليها

وكان النازي الراحل يلعب معاها غميما ويلعب معاها السلم والداب ... ويقولون بعد كان اذا سكر يلعب معها شطرنج ويطالع بعيونها ويقول يالبيه وتتلخبط مشاعره ويصيح

ويقولون انه قرر يحتل العالم بس عشان زوجته قالت له تؤبرني هالشجاعه وهالخطابات الناريه يا أبضاي

وبغض النظر عن شنبات هتلر وجنونه بزوجته أبي أقول شي يقرقع بقلبي للجنس الذكوري المستأسد على الإناث



زوجتك ... اختك ... حبيبتك ... الأنثى بشكل عام

ازعل عليها بشوووووويش ... ولاتنسى ان بعض الاناث أقوى مخلوق شافوه بحياتهم الحمامه

خلك اسد وقت ماتحتاج لأمانك ... وخلك حنون وقت حاجتها لحنانك

ازعل بشويش ولا تنسى إن مالها بعد الله امان الا امانك

 

[علي المحمد]

وها هو الكتكوت يخرج مرةً أخرى من ساعتي الحائطيه مرتدياً الفروه والـ ( آيس كاب )

معلنا قدوم يوم جديد وأنيق ( أحلى من ثوب الدفه )

صائحاً بأعلى صوته يقول مستنجداً بعد أن لعب البرد بمشاعره الرقيقه

( يرحم أمك ياعلي حط بغرفتك دفايه )

وبدون اي تفاهم مع هذا المخلوق المزعج قمت برمي علبة المناديل على كوخه الصغير بكل ما أوتيت من قوه قائلاً له :

ترى اذا ماعقلت بصادر منك الملابس الشتويه اللي شريتها لك ياقليل الأدب

فخرج مرةً أخرى من باب الساعه :

ورمى كل الملابس اللي شريتها له وقال شف لك واحد يصحيك للدوام باكر لا ابوها عيشه تدبل الكبد

هههههههههههههههههههههههههههههههههههههههههه

فديته زعل ... ورحت شريت له دفايه وبجامتين وقلت له لو تبيني بعد أولع بالغرفه نار عشان تدفى ترى ماعندي مانع


لاتفهموني غلط ...

السالفه ومافيها الانفلونزا لعبت بعظامي ... وقاعد أحاول أقاومها بدون مضادات حيويه

للأسف تعودت على المضادات من فتره ماهي بسيطه وما انصح أحد يستخدمها لان ضررها على المدى البعيد أكثر من نفعها وتخلي الجسم ضعيف المناعه

دفو عيالكم بالذات الصغار اللي يروحون للمدارس وانتم بعد يالكبار تدفو واللي ماعنده دفايه يشتري دفايه

واللي عنده حطب يعطيني وحده عشان ابي امحط فيها الكتكوت لو طلب شي ثاني غير الدفايه

ههههههههههههههه اقصد اللي يشب حطب أو فحم ... قبل ينام يطلعه برى المكان اللي هو نايم فيه

وادعو لي تروح عني الانفلونزا


برايفت :

لا تغارين من الكتكوت ترى الموضوع مو مستاهل

 

[علي المحمد]

وهاهو القطار يمر بالقرب من مسكني الصغير بالظهران
ضاربا بالانسانيه عرض الحائط مسببا لي الفزع المتكرر بصوته المرعب
ليوقضني من نومي وأنا في حالة يرثى لها وفي خشية دائمه من انحرافه عن مساره لا قدر الله
وبدعوات صادقه بأن لأجده مخترقاً جدار غرفتي وماراً بجاوري وانا مستلقي على سريري
حتى الكتكوت أصبح الأن يطالبني بصرف بدل خطر أو ان أقوم بصرف لباس المقاتلين القدامى له والمكون من الحديد والفولاذ ... تحسبا منه لاختراق القطار لغرفتنا الصغيره
وقد أخبرته مرارا بعدم تكرار طلباته لأني أستطيع الاستغناء عنه بسبب هذا القطار الذي يتكفل بإيقاضي كل يوم بمروره بجوار سكني
اسقط في يد الكتكوت وقال : حسبي الله على اللي باعني عليك وأخذ يتمتم بعبارات لم أسمع منها إلا : ( مصيرهم بيغيرون المسار وشف لك أحد يصحيك يالشبيره )
وفر هاربا داخل كوخه قبل أن تصل إليه طفاية السجائر
وخرج مرةً أخرى محتجاً على تصرفي العنيف معه وقال : تراني كتكوت ولو فيك خير يالقوي إرمها على سواق القطار اللي اتمنى من كل قلبي يخربها ويسير علينا هو وقطاره هنا بالغرفه ويقلبونها سامري
لا ابوها عيشه معاك ياخي شف لك ديك يصحيك شف لك ببغاء أنا ما أبيك ارمني بالشارع للقطاوه ياكلوني ارحم من القعده معاك
وقبل ان ينهي حديثه تفاجأ الكتكوت بكرتون المناديل وهو يمر بجانبه بسرعة البرق
وعاد الى كوخه يجرجر أذيال الخيبه ومصطحبا معه مشاعر الاضطهاد
ونهضت من سريري متجها الى المغسله لاغسل رأسي ووجهي وقمت بتنظيف اسناني و ارتديت ملابس العمل واشعلت سيجارتي
واثناء اخراجي للمفتاح لاقفل باب الغرفه خرج الكتكوت من كوخه قائلاً : وانت جاي جب معاك حبوب ضغط وسكر اللي عندي خلصو وانتبه لنفسك وانت بالطريق

اللي ابيه يوصل من كلامي

عاملو الأنثى بلطف ورحمه ترى قلبها مثل الكتكوت
شي يقهر إنك تسمع بأنثى معاها ضغط وسكر و ماهي مرتاحه بحياتها

 

[علي المحمد]

ماهي فائدة الأخت في نظر أعدائك يا حواء ؟؟؟



بصراحه ظلم لازم تدافعون عن أنفسكم

يقولون :

الرجل إذا كان على قيد الحياة ( مو قيد من ورد ) يقال عنه حي .... أما المرأه يقال عنها ( حيه )

الرجل إذا تولى منصب القضاء أصبح القاضي .... أما المرأه فتصبح ( القاضيه )

الرجل إذا كان كلامه صحيح يقال مصيب .... أما المرأه ( مصيبه )

الرجل عندما يكون في منصب نائب .... تكون المرأه ( النائبه )

الرجل عندما يكون مولع بهوايه يقال عنه الهاوي .... أما المرأه فيقال عنها ( الهاويه )

وهكذا أصبحت المرأه ( أم الكوارث )



بصراحه الكلام يوجع ... معليش ليديز لا يهمونكم الجنتل من ... قسم بالله حياتهم من غيركم كأنها حفلة خبيتي باستراحات غرب الرياض بدون أورق



برايفت :

بـ ( شوكلاته من باتشي ) يحسم الجدل بين المرأه و الرجل

ما أدري عن أي كارثه يتكلمون

 

[علي المحمد]

عندما تمتطي صهوة سيارتك الأمريكيه

هارباً من حرب الشوارع وفنون القتال داخل المنزل

لتنجو بنفسك من قذائف برنقلز وعلب المكياج وقوارير طلاء الاظافر وقطع الشوكلاته والشباصات الحديديه وهي تمر من جنب انفك وبالقرب من جمجمتك

لتظطر الى الامتداد على الارض وتنفذ عملية زحف تكتيكي حتى تصل لباب المنزل الخارجي خوفاً على عينيك وعلى رأسك وعلى ماتبقى من جسدك النحيل المنهك

نتيجةً لإختلاف في وجهات النظر بين شقيقاتك بسبب متابعة مسلل على قناة mbc وآخر على قناة أبو ظبي في نفس التوقيت

وعندما تتفحص قدميك تجد انك خارجاً من المنزل بحذاء الرياضه في قدمك اليمنى وبحذاء الثوب في الأخرى

لا تفكر بالعوده للبيت في ظل هذه الأجواء المتوتره

فكل ماعليك هو التوجه الى أقرب سيارة آيس كريم ... واستمتع بطعم الفانيليا الملقاه فوق قمع البسكويت

الدنيا حلوه ... حتى لو تنصقع بعلبة برنقلز على راسك وأنت مالك ذنب

 

[علي المحمد]

تطلع من دوامك تعبان و ذابحك الملل والروتين اليومي الممل

وانت بطريقك لبيتك مافيه احد بالشارع إلا تلاسنت معاه بسبب دلاختك بالقياده او بسبب تهور الآخرين و رعونتهم بالقياده

عادي كلنا سعوديين وفاهمين بعض ... ( وسع صدرك ) اول ماتوصل البيت خذلك دش بارد مع هد اند شولدرز

واطرب اللي بالبيت وانت تغني تحت الدش ... ( شبيه الريح وش باقي من الآلام والتجريح )

راح تسمع أحلى كورال من المدام وهي تردد وراك : وش باقي من الأوهام ... وش باقي من الأحلام ... بسرعه نبي الحمام

خلك ذوق وجفف راسك وجسمك وإطلع بسرعه وعط فرصه لغيرك يغني وينطرب قصدي يتحمم و يعبر عن شعوره

بعدها خذ لك بختين من احلى عطر عندك واقرا الجريده لحد مايجهز الغداء

واذا تغديت وشربت لك كاس لبن وحسيت انك متبنج ... لو سمحت لا تنام جنب السفره وانت رافع ايدك فوق كأنك مصارع مدبوغ ومتفقع وجهه لين ماعاد قدر يتحرك

كلها كم خطوه وانت عند المغاسل غسل ايدينك وفرش اسنانك وتوجه لفراشك

صدقني كذا بتكسب احترام المدام ... وإلا الله لايهينك لا تزعل اذا رمت عليك الوساده والشرشف و قالت لك روح نام بالمقلط

 

[علي المحمد]

يابنات إلعبو حديد ... لازم كل وحده فيكم يكون عندها عضلات بالذات المتزوجات
صدقيني زوجك كذا ماراح يتجرأ يتزوج عليك ... ولاراح يتجرأ يجرح مشاعرك ... ولا راح يتجرأ يهضم حقوقك
لازم يكون فيه تكافؤ بالقوه ... طبعا هذي طريقة حل غير مجربه ونتائجها قد تكون وخيمه لأحد الطرفين ( إما بدخول السجن / أو العنايه المركزه )
طيب وش الحل برايك !!!
تخيلو معاي وحده مهتمه ببيتها وبزوجها وقايمه بكل واجباتها وتتعطر بأحلى العطورات وتلبس احلى الماركات بس زوجها مو مهتم فيها
و مايمر اسبوع بدون مشاكل وضرب وتهديد بالطلاق .
مسكينه ياحواء عشان عيالك تتحملين وتصبرين
لو انا مكانك ما اتعطر بعطورات ديور وشانيل أتعطر بعطورات ( عبدالصمد القرشي والعربيه للعود ) وأخليه يحس انه متزوج كاتب عدل
لو انا مكانك أروح لمحلات فوت لوكر والا الفالح للرياضه وأشتري طقم انتر ميلان الايطالي وبوت رياضي ماركة أديداس واطلع العب مع عيال الحاره بالشارع
واذا انتي تهمك سمعته وراحمته ... العبي كوره بحوش البيت وكسري اللمبات ومافيه مانع تمزعين الكوره ببطنه اول ما يدخل للبيت من باب الشارع
لا تطبخين له ... إلبسي قمصان تحوم الكبد ... مكيفات البيت والانوار والمراوح خليها تشتغل اربع وعشرين ساعه حتى الدفايات لو انتي بفصل الصيف شغليها
امصعي قلبه بالفواتير ( فيها شي يعني لو زوجك المحترم جته جلطه خفيفه ) أبداً لا تاخذك فيه رحمه
جيبي كل القدرو اللي عندك بالمطبخ وعبيها مويه وحطيها فوق الفرن وخليها تغلي بس كذا لعانه
خلصي اصطوانات الغاز وخليه رايح جاي كل اسبوع يدربي الاصطوانات عشان يوديها لمحل الغاز يعبيها
اذا نام زوجك اسرقي جواله ولا اوصيك بالـ SMS على قنوات وناسه وستار اكاديمي وشاعر المليون منها تتونسين ومنها تأدبينه بفاتوره محترمه للجوال
خليه على الحديده ... خليه يعرف قيمة اهتمامك فيه وبالبيت
كذا انتي إما بتحصلين على ورقة طلاقك وانتي راسك مرفوع وماخذه حقك من زوجك ... او بتعدلين من سلوكه ويرجع لك زوج شهر العسل
هاف أنايس لايف مارد ليديز ... أند آي ثنك ... اي ويل سي يو إن ذا هوسبتل

 

[علي المحمد]

امس كنا نحكي انا واثنين من الشباب عن موضوع الزواج

هذا الموضوع اللي حارث عقول البنات حرث من كثر ما طقت كبودهم من القعده بالبيت ... و اللي ما جابو له الشباب خبر لأسباب متعدده

فاتفقنا ان البنت من اول ما تبلغ وتبدا تحط الروج من ورى أمها ... تبدأ تمر بمرحلة الفصلات والفهاوه والشرود الذهني

تنتظر فارس احلامها اللي مستقبلا راح يكون زوج واخ وصديق وسواق وبودي قارد

وكل تفكيرها انه راح يمشيها ويدلعها ويغير عليها أجواء الكبت والإضطهاد اللي تعيشه بالبيت لان اخوها متمرد و ياخذ منها بخشيش للمشاوير

وهي مسكينه على باب الله مالها الا مكافأة الجامعه ... و يكره برشلونه فريقها المفضل

واذا قالت له طفشانه ابيك تمشيني اخذ بها لفه بطريق الملك عبدالله وطول الطريق غطي وجهك قصري على صوت المسجل لا تفضحيننا ترى برجعك للبيت

( لو أنا منك ياحلوه انزل عند الاشاره واشوف اقرب ليموزين و اسحب سواق الليموزين من شعره برى السياره و استمتع بالقياده وما اركب الا شباب اوصلهم مشاوير

بس قبل هذا لازم تهربين من اخوك قبل هروبك من الدوريات اللي جايهم بلاغ عن الليموزين المسروق لانه لو قدر يلحقك بسيارته وطحتي في يدينه بيكون اليوم الاخير بحياتك

السجن ارحم شوي على الاقل تغيرين جو وتتعرفين على بنات ملكعات ومنها تتعلمين بلوت )

الله يصبركم يا بنات على بلواكم اجل تنتظرون عرسان

ما عاد فيه رجال للزواج الحين اللي طفران واللي يبي يأخر موضوع الزواج على قولته يبي يكون نفسه و ..... الخ

وين أيام أجدادنا قاهرين العنوسه

كل واحد راص له اربع حريم ... وحده تهمزه ... و وحده تقهويه ... واللي تهف عليه بالمهفه ... والرابعه تطرب مخه بموال حجازي ترتخي معاه كل مشاعر الاستبداد

ويبدا هالشايب بالفهاوه ويفكر يطلق وحده ويتزوج الخامسه

ههههههههههههههههههه والله الشيبان الاولين مفترين ولاقينها

لان البنت أول تتزوج وهي صغيره كل همها تلقى أحد يلعب معها غميما أو سبع الحجر

ومن هنا يبدا الاستغلال عند شيبان الاولين ... يلعب معها اول يومين ... وما تدري المسكينه الا وبطنها منتفخ

وبالرغم من فارق السن الا ان البنت تتأقلم وينشأ مع الوقت حب يسمونه ( حب العشره )

كل اللي بقوله الله يفرج هم كل عزوبي وعزوبيه

برايفت :

http://www.6rb.com/php/download.php?mp3=www.6rb.com_43743.mp3