[ برد الكلام ]

[ناصر حطاب الدهمشي]

السلام عليكم ورحمة الله وبركاته


[ برد الكلام ]

عطني كلاااااااااام آردِّ به ..
عطني جنااااااااح آهدِّ به ..
هذا الشعر يا صاحبي مثل السما
ما يقبل انصاف الحلول
يـ انطير به , يـ انطير به
وإلَّا نمووووت
في قاع ٍ أرهقها السكوووت
أبعادها رمل وظما , يسكن بها شايب عما
اسمه رحيل , قُوْتِه من ارواح العباد
حتى الدُما وهي الدُما لا مَـرِّتـِه
يقعد يهزّ أعناقهن الييييييين ايْطـيِّـح لقمته
واليا قضى مدّ الحداد ..!!
أدري أخذتك للبعيد وْلا فهمت ..
خلَّك قريب لا تنشغل به طالبك
تو ما غَمَرْتَك بالمداد ..
أنا عزفت امْن الشعر ما يهزّ ناي العازفين
أنا ملكت قلوب ناس ٍ كلبوهم متعبين
أنا الغريب
أنا الغريب
أنا الغريب اللي لقوه ..واقف على أطراف الحزن
يرسم ريوف
أنا النحيل اللي تشوف ..!!
شلت العمر من اوَّل الحريَّة لْـحلق السجن
لين القبر لييييين القبر شلته وانا زي ما تشوف
لا متن لي ولا كفوف .. إلَّا الحبر .. اييييه الحبر
حبر ٍ مثل فرقا هَلَي ..
لونه هلاااااك ..اسْميتِه المعكاز ..
وَحْدِه من يْنادم عناي ابْكربتي , وَحْدِه من اتعكَّز عليه ابْغربتي..
بالله لا تنقد علي ..أنا بديت انحاااااااز
لَـ انفاس الورق ..
واكثر بديت أعتاااااااز
ليدين الغرق ..
خلَّك معي لا تبتعد
محتاج لك كثَر مـَ فقدي للحبايب حافني
ومحتاج تسمعني كثر ما شافني وقتي أطييييييح وطافني
مليانه اضلوعي كلام , مليانه اعيوني حمام ..هديله ابيض يشبهه
ودِّي أطيِّـرْه ابسماك
لين اسكنك .. حالة تعب
واقعد أصيح بْداخلك
يا آدمي ياااا آدمي فيني نهاية آدمي..
تـبْـغاااااك
من وين اخلِّـيها تجيك ؟
من حيرتي , من غيرتي , من ديرتي ! أو من هناااااك
الله يرضى لي عليك
الله يرضى لي عليك
الله يرضى لي عليك
أنا بديت ارجف شعر .. قم غطّني
قم غطَّني يا صاحبي
برد الكلام
.
.
ناصر الدهمشي