... و ... حروفي المقبورة

[أجراس]

السلام عليكم ورحمة الله


أوقاتكم جميعا عامرة بالرضا

لا أجيد صياغة ديباجة الحديث .. لكن هي شكرا لمن كان سببا في تواجدي هنا بينكم
ولي شرف ذاك التواجد

كل عام وأنتم إلى الله تعالى أقرب .. بلغنا الله وإياكم شهر الصوم
وجعلنا وأنتم فيه من الصائمين القائمين على الوجه الذي يحبه ربنا ويرضاه






وبعد ..

يا سادتي .. هذا الورق .. هذا القلم .. وانفاسي
لا جيت بانثر بعضها .. توقف بصدري غصّة

أنفاس تزفرني تحاول .. تستبيح افلاسي
وانفاس تشهقني تقل هذا الورق وش خصّه ؟!

هذي تبعثرني تحاول تستفز اجراسي
والثانية تجمع شتات اوجاعي وتمتصّه

وانا انا لين السما تمطر عليّ وسواسي
انفاس تنثرني وجع .. وانفاس تحكم رصّه

اشهق صباحاتي مواجع تستحل احساسي
وازفر مساءاتي مشاهد من تعب مقتصّة

واستوقف البسمة عتب مرسوم في كراسي
واستجدي لحزني عساه يفكني من نُصّه

وآفيق من بعضي وانا بعضي يرتب ياسي
ويصب في بحر انكساراتي بقايا قصّة

يحكي بأني رغم ضحكاتي وقوة باسي
في داخلي طفلة بتعتيم الأسى مختصة

ويسولف بهمي وتسمع ناس ماهي ناسي
يتجرأ .. ويصدر عن احساسي بيان .. ونصّه

تشبه مساءات الرضا لا عشعشت في راسي
فرحة بخاتم في صباح العيد طايح فصّه

ثم ..



لا تستفز حروفي اللي .. داخلي مقبورة
ياكم لها ماتت بصدري .. يوم غاب الساقي

ماعاد تقدر ترسم من الحكي .. بعض الصورة
شفها يترجم عجزها .. ( خالي وفاض اوراقي )

من خوفها لو جت تهمهم .. همهمت مذعورة
من فقرها لو هي حكت .. بتغيب قبل اشراقي

وانا اعيش بحال لا اصلح له .. ولا اتقن دوره
اضحك وزفرة خاطري .. تشعل فتيل احراقي

اجاهد ارسم في عيوني .. بسمتي المزرورة
واحاول ارشف في فمي .. دمعة تشب احداقي

وامشي واحاول اتقن بمشيي .. خطا السنيورة
واقبّل برجلي طريقي .. لجل يحمل ساقي

لين امتعاض الدرب يشكي .. من حنيني جوره
لين ارصفة صمت الاماني .. تستبيح اغراقي

واسبح وقهر الليل ينشر .. فوقنا ديجوره
واغوص في غبة أنين .. يضيق فيه خناقي

واصك عيني عن بقايا .. نظرتي المكسورة
واشبع بغصّات الامان .. المستحث شهاقي

واحذف من احلامي مساحة .. فجري الاسطورة
واتلحف الليل البهيم .. اللي يحب عناقي

واجلد من اوجاعي بقايا ..آهتي المبتورة
واعلن لمرقد راحتي .. هالحين وقت فراقي

واضحك أسى .. لجل الأسى .. بي يحترق جمهوره
وادفن عن الدنيا حروفي .. في جحيم اعماقي

واتبسم لحالي واقول .. الحال بي مستورة
لو صحت في نفسي .. على نفسي .. وش اللي باقي

ماعاد من باقي شعوري .. غير بعض شعوره
ماعاد من صمت المكان .. اللي سكن باماقي

إلا بقايا من حكاية .. جرح بي منثورة
لو جيت باغمّض احس .. تشد حبل وثاقي

والا الحروف اللي زمان بداخلي .. مقبورة
لو تستفز انفاسها .. جت لك بغير سياقي



كونوا بخير .. جميعا