عسى آخر العلّات

[رضا الهاشمي]

كتبت هذه القصيدة إلى زوجتي الحبيبة ام سلطان بعد أن شفاها الله من سقم ألم بها ولله الشكر والحمد والمنة.




عسى ما يجي قلبك عنا يا الغلا واسقوم

عقب ما مرضتي يا عسى آخر العلات




مرضتي ولي صار المرض عظمة ف بلعوم

الى من بلعت الحزن استشعر الضيقات




عسى هالمرض غيمة اعبرت تاليتها اغيوم

هنا والسعادة غيث يمطر على الضحكات




مثل ما عرفتك يا ام سلطان نور اعزوم

ينور ظلام الياس وايبدد العتمات




خلاص استريحي لا تسوين شي مفهوم

ترى كل خلق الله يجيبون خدامات




وانا بستوي خدام اكل وغسيل اهدوم

برتب سرير الحب وآناجي امخدات




عليها ذرفت ادموع وآهات قلبي يوم

مرضتي وناجيت العنا والبكا أصوات




تعذبتي ما يخطر على بال عينك نوم

وانا كيف انام وجفن عيني معاك ايبات




حياتي فلا اتحاتين سلطان او مريوم

عيوني لهم ارض وسماوات و امحيطات




عواصف شقا عدت وبعد العواصف دوم

يسود الهدو واينف غيث ن من الغيمات




عسى حاسدينا والعواذل و هالي الشوم

يعانون من فرقة وراها ألم واشتات




وانا يا حياتي طلعتك بالسلامه اليوم

تساوي الحياه اللي ايتمنونها الأموات




بزين جدار الشمس بنفخ حلا مرسوم

وعلى رجعتك بنثر من الحب لك باقات




عساك بسلامة وعافية وتسمعين اعلوم

تسرك وحزنك صدقيني حياتي مات