اسف بحبكِ

[ايمَــان حجازي]

كل شئ
كان حلو بينا
فجأة أصبح ماضى فات

قولى لأ مش دى الحقيقه
دى مشاعر .. ذكريات
قول لو انتحر النهار
انه هيُطل بعلامه معجزة

إهدى كده
م القصه مش متأكده
من كل ضحكة ميته
طلعت كده
عشان تبان ف الكادر
ذكرى كويسه


هو انت ليه على طول كده
رصيد ناقص ف كل حضور
مبقتش تشبه السطور
اللى ف يوم كتبتها
مش كل موسي ف
الفراق بيكون نبي
ولا كل مريم ف اللقا
تصبح بتول

وليه طيب
رميت الماضى
م الشباك
عشان تبقى
اللى جاى كله

وليه طيب
تشوف العمر بيعدي
بدون اسباب
وكله سراب
وازاى تفسر خلق
ادم من تراب
وحوا من ضلعه
اللى غاب
مبقتش قادرة اصدقك

طيب سمعت
صوت الكمنجه
ف اللقا مطحون فراق
وعشان تكون السمفونيه ملهمه
واحنا بنرقص ف الطريق
خلى الطبيعه للطبيعه
والحدث للممكنات
ارسم خيال
اسكت وجاوب
او حتى قول
انك عشقت من سكات


ليه ابتسمت
عشان تدارى
حلمك المربوط ف نجمه
متداريه ف السحاب
وليه مسكت الدمعه بالعافيه
وضميتنى ف عز البرد
عملت حاجات لاول
مرة بعملها
وحاسدينى البشر
على ايه

بص .. الحكايا كلها
حاجات تبان من نفسها
جاوب كده
جرب تقول

اسف بحبك
وادينا فرصه نحب
بعض بفُرقه اجمل
اجمل من كده

طبق المبدأ كده
كل شى بيجيب تشابه
برضه بيجيب اختلاف