(( باع و شبر ))

[رضا الهاشمي]

للصبر مسلك مشى به دمع عين الغريب
اللي يشوف الظلام ف كل باع و شبر

يا ما أصبر العاشق اللي ما لفاه الحبيب
اللي يشوف العنا ف بعاد خله قبر

غابت وانا في شبابي ما هقيت المشيب
يخلي القلب ياخذ في التجافي أبر

وا ويل حالي أدور في جفاها طبيب
يجبر كسر قلب ما ظني يفيده جبر

آية من الحسن مدهال الجمال الرهيب
من حسنها تاخذ الغادات درس و عبر

أشتاق وألتاع وآشوف المواصل قريب
لو إنه أبعد من الدمام ولا الخبر

لي جننت خافقي ذاك الحكيم اللبيب
ولي خلت القلب في أرض الشقا ينثبر

يضيق في بعدها صدر الفضاء الرحيب
و يصير وجه الليالي عقب صدها غبر

ما تسمع لخطوها ولا مشيها دبيب
خيلن لكن جلدها من خز لا من وبر

في وصفها كل شاعر في الغرام و أديب
يحتار و ايجف من زود الوصوف الحبر

آنا سالت السميع اللي الدعا يستجيب
واللي ليا حط عبده في البلا يختبر

يا رب قلبي من الأشواق دمعه سكيب
من صد خل ف هواه القلب هذا انجبر

ليته يروف بشرايين الفواد و يثيب
وايخل عنه غرور النفس ولا الكبر

بريت به مثل بر الوالدين العجيب
و آنا لو إن كان غيره شخص ما كنت أبر

يالله عسى الشمس تشرق عقب ذاك المغيب
و يسمع خفوقي من أطلال المفارق خبر

رضا الهاشمي