[صالح الحمود]

قصيدة الناس
.
.
الناس يـ ابْن الناس من دون اجتهاد وْثرثرة
مثْل : المعادن بالـثـّمن والمنفعـة والإشتباه
*
بعْض المواقف تمحض الرّجّال وتظهِر جوهره
وبعْض المواقف حالها حال الصّـدَأ تظهِر رداه
*
أمّا الرّدي : لو زان في عينك وسرّك مظهره
لابُدِّ ما يطـعـن خـويّـهْ وايتحكّى من قـفـاه
*
أمّا الوفي يبتل وفي صاحبْهِ يأمن خنجره
إنْ ما تجـمّـل وامدحِـهْ والاّ فـلا ينبش وراه
*
عزالله إنه مثل دهن العود لا طال خبره
كلْ ما تعتق زاد طيبه واتضح لك مستواه
*
يا حْمود سبح بـ اسم ربك واستعذبهْ واشكره
ما الناس واحد حتى تدري وش سلوكهْ بالحياة
*
يا صاحبي الناس شاشة والقناة مْشفّرة
ماهم على اشـكالهم لكن لنا فيهم ســمـاة

الناس لايمكن تبِيْن اخلاقهم بالمنظرة
لكن تبَيّن وقت ما ياصل غضبهم منتهاه

واطباعهم ما ترّسم بالمقلمة والمسطرة
لكنّها ترسم على وضح النّقاء صـبح وْمســاة
*
بالناس من يستر عيوبهْ بالدّهاء..والفشخرة
وبالناس من يفضح عيوبهْ بالحماقة..والدّناة
*
أحدٍ عديم اخلاق لكن بهْ دهاءٍ يستره
واحـدٍ عليه اخـلاق لكنْ غرّ ما يسـتر غبـاه
*
ديني ولا دين الغباء واهل العقول المقفرة
واللي يطـوّل هـرجـتِهْ من غير داعي وانـتـبـاه
*
واللي يردّد في كلامـهْ ما يغيض وْيحـقره
مثْل: انتبه..خلّك معي..مالك لوى.. آ .. آ ..تتاه
*
بعْض الآوادم لا بلش في كلمةٍ ما تحْضره
تلـقـاه يمغـط هرجـتِهْ بين البراطـم واللـهــاة
*
وان ما لقاها وابتلش ! ما فيه شيٍّ يخسره
إنْ ما بلع ريـقـه تنحنح واستمر على عـمــاه
*
وانْ أنسى لا أنسى طويل اللسان ابو مخ بْقرة
اللي يجادل بالمجالس وايتمادى في خـطـاه

ينقض ويفتل بالحكي من دون حجّة وثمرة
واليا حجَـرتهْ دوّر اقـرب منفـذٍ يهرب مـعــاه
*
بعض الآوادم لا فلجـتـهْ في كــلام ٍ يحْشره
ايسوّي نفسهْ ما سمِع !! وانْ قلت جاوب..قال: هـاه؟
*
اللهِ يا زين البشـر من دون قـرق..وْبربـرة
واللهِ يا شين الدّباشـة..والطّـفـاقـة..واللـغـاة
*
سـبحـانك اللهْ لا إله الاانـت ربٍ نذكــره
هذا الكـلام اللي عليه الشـعـر يبلـغ مقـتـضــاه


....