الناس: يابْن الناس من دون اجتهاد..وْثرثره
---------------- مثْل : المعادن..بالـثـّمن..والمنفعـهْ..والإشتباه
بعْض المواقف تمحض الرّجّال وتظهِر جوهره
------------------ وبعْض المواقف حالها حال الصّـدَأ تظهِر رداه
أمّا الرّدي : لو زان في عينك وسرّك مظهره
------------------ لابُدِّ ما يطـعـن خـويّـهْ وايتحكّى من قـفـاه
أمّا الوفي : يبتل وفي..صاحبْهِ يأمن خنجره
------------------ إنْ ما تجـمّـل وامدحِـهْ والاّ فـلا ينبش وراه
عزّالله انّه مثْل دهن العود لا طال خْبرِه
------------------ كلْ ما تعـتّـق زاد طيبهْ واتّضحـلك مســتواه
ياحْمود سبح بسم ربك واستعذبهْ واشكره
------------------ ما الناس واحد حتى تدري وش سلوكهْ بالحياه
يا صاحبي الناس شاشهْ والقناه مْشفّره
------------------ ماهم على اشـكالهم لكن لنا فيهم ســمـاه
الناس لا يمكن تبيْن اخلاقهم بالمنظره
------------------ لكن تبيّن وقت ما ياصــل غضبهم منتهـاه
وعـْيـوبهم ما تنرسم بالمقلمهْ والمسطره
------------------ لكنّها ترسم على وضح النّقا صـبح وْمســاه
بالناس من يستر عيوبهْ بالدّها..والمبخره
------------------ وبالناس من يفضح عيوبهْ بالحماقه..والدّناه
أحدٍ عديم اخلاق لكن بهْ دهاءٍ يستره
------------------ واحـدٍ عليه اخـلاق لكن عـنـز ما يسـتر غبـاه
ديني ولا دين الغبا..واهل العقول المقفره
------------------ واللي يطـوّل هـرجـتِهْ من غير داعي وانـتـبـاه
واللي يردّد في كلامـهْ ما يغيض وْيحـقره
------------------ مثْل: انتبه..خلّك معي..مالك لوى.. آ .. آ ..تتاه
بعْض الآوادم لا بلش في كلمةٍ ما تحضره
------------------ تلـقـاه يمغـط هرجـتِهْ بين البراطـم واللـهــاه
وان ما لقاها وانبهَت!! ما فيه شيٍّ يخسره
-------------------- إنْ ما بلع ريـقـه تنحنح واستمر على عـمــاه
وانْ أنسى لا أنسى السّليط اللي يجادل كالمره (1)
------------------ واليا حجَـرتهْ دوّر اقـرب منفـذٍ يفـلـخ مـعــاه
بعض الآوادم لا فلجـتـهْ في كــلام ٍ يحشره
------------------ ايسوّي نفسهْ ما سمِع !! وانْ قلت جاوب..قال:هـاه؟
اللهِ يا زين البشـر من دون قـرق..وْبربـره
--------------------- واللهِ يا شين الدّباشـهْ..والطّـفـاقـهْ..واللـغـاه
سـبحـانك اللهْ لا إله الاانـت ربٍ نذكــره
--------------------- هذا الكـلام اللي عليه الشـعـر يبلـغ مقـتـضــاه
______
____
__
(1)
عذرا
ما اقصده هنا بالمرأة
هي المرأة الجاهل الثرثارة صاحبة الصوت العالي والفكر الواطي