وجه القمر

[أحمد المالكي]

صباحكم على ماتحبون ،،

اما بعد ...


على وجه القمر بكتب قصيده وانثر الكلمات ...
وحبري من سواد الليل واوصافك معانيها ...

ابكتبها قصيده لك وابرسلها مع النجمات ...
واوصّي الطير يقراها قصيده لك يغنيها ...

هدية شاعر ٍ مايملك الا الشعر والابيات ...
وهب كل البيوت لضحكتك ياليت ترضيها ...

اذا ضحكت احس الكون معها يرسل الضحكات ...
واحس ان الفرح يبحر ويرجع في موانيها ...

تسولف تنطلق من حنجرتها اعذب النغمات ...
وودي لو اعيش العمر بس اسمع حكاويها ...

اموت بعينها النجلا ورمش العين له عادات ...
يجرّح روح عاشقها وفي لحظه يداويها ...

انا اعشقها وهي مثلي ولكن عشقها بسكات ...
خجوله والخجل تاج الحسن وارق مافيها ...

اميره تاجها حبي وشوقي بتاجها ماسات ...
وانا شعب المحبه فدوة ٍ لتراب اراضيها ...

عليها الحب اعلنته ورفعت بقلبي الرايات ...
وودي انهزم وابقى اسير ٍ بين اياديها ...

الا ياليل وين الي بشوفه طويل الغيبات ...
وانا اشهد شوفته كل الغنايم ماتساويها ...

الا ياليل وين الي ينسي صوتي الآهات ...
وصارت آهتي اسمه تحلي صوت مغليها ...

اسميها دفا عمري وعطري واعذب البسمات ...
وهمس الليل واحلامي الا ياكثر اساميها ...

وبآخر هالقصيده لك تحيه من صميم الذات ...
وشوق ٍ لف هالدنيا من اولها لتاليها ...

قصيده ما اعتقد وفت ولا اظن وفت الكلمات ...
قصيده اكتساها الخوف في حضرة معاليها ...