مفردات الوداع

[عبود القحطاني]

‎أنا الصويب المحتمي في جنابك
الجرح ينزف والسماء نَوْ وغيوم

يا مزبن اللي في هواه التجابك
من دونه أمواجٍ وفي مقدمه قوم

ما تدري؛ إنّي بعد طّول غيابك
تزاحمت في داخلي دولة هموم

همّ الفراق وهمّ مقوى عذابك
وهمٍّ خذا من مقلتي لذة النوم

قافي يونّ ومفرداتي تشابك
ودي أكنّ اعلوم وابين اعلوم

يا كثر ما قلبي هقى واهتقابك
ويتّله الواقع على صدر محروم

عندي سؤال، ودي أسمع جوابك
بالمختصر، ووعدك ما يلحقك لوم

الحب باقي بيننا ما انتهابك
وألا نهاية حبنا شي محتوم