~ " وحدي .. و غديت أنت / الـ زحام ! "

[مناحي النفيعي]

"

العمر ذا .. شرفة حزينة .

يطير منها أربع و عشرين عصفور ..

عصفور مكسور .. عصفور حزين

عصفور مبلول .. مبلول و جْناحه

غرقان فـ الحنين ..

و الحزن صيّاد السنين ... اللي تطير ..

وما توقّع في الشجر .. ولا توقّع في الشعور ..

يا هارب الليلة من قيود الكلام ..

بعض الدروب .. وَهَم السراب ..

وجه ٍ بعيييييييييد ... خلْف الضباب ..

ما يشبه لوجهك .. ولا يشبه لماضيك

لا تاخذ سنيني معك .. للتيه ..

لا تاخذ اللي باقي ٍ من الوجيه .. عن الوجيه ..

روحي عتيقة بحزنها .. مثل ما كلّ الناس

يمشون في الزمن .. !

 

[مناحي النفيعي]

"

ليه غبت و تركت القلب حفنة عتاب

..................... كلّما نسنس النسيان دثّرتها

مثْل منديل من سافر بـ مركب غياب !

..................... و مثْل عصفورة ٍ فالريح طيّرتها

وين غبت و سجنت الشعر خلف الكتاب

..................... و السطور بـ يدين الصمت كسّرتها

أنت قلبك هجوسه مثل عود الثقاب

................... يا سرِع ما بشمع الليل ذيّرتها

أنت قلبك طفل مفقود ليلة ضباب

................... جرّته فـ الجروح الخضر جيّرتها !

أنت يا من زرعت الروح وردة عذاب

................... وردتِك من شهر أبريل ما زرتها

عنك ياما سألت الأرض دمعة سراب

................... وكلّما هلّ كِذْبَة عنك .. سافرتها !

 

[مناحي النفيعي]

"





قرطاس صوتي .. بعرض الريح شقَّقته
............. قمّ و إلحق أسراب صوت ٍ يشبه المستحيل

بارد ... كأني من النسيان كوّنته
............. حزين .. كنّه قصب سكّر و ظلّ ٍ نحيل

قم ما بقى حرف يوجعني ولا قلته
............. ولا بقى في نخل عمري لـ ضحكي مقيل

أنا .. أنا بيت شعْر بيدك كسّرته
............. ليلة بها كلّ بيت ٍ فيك يردى قتيل

أنا ... أنا نورس أبيض فيك طيّرته
............. لا تتركه و البحر مالح و دمّه ثقيل !

صاحبك مكسورة ٍ درفة مخيّلته
............. و يطير من شرفته مليون خاطر هزيل !

صاحبك الأقلام بالنسيان لوّنته
............. يموت في عزلته موتة طوال النخيل !

صاحبك الأيام فالاوجاع صالبته !
............. و يمرّه العمر للتغريب عابر سبيل

 

[مناحي النفيعي]

السلام عليكم و رحمة الله و بركاته،

أفتقد هذا المكان .. كثيراً.
بين الحين و الآخر آتي لأزور نفسي .. وأقف على أطلال إحساسي ونزفي.
ودائماً ما أجد زوار لهذه الصفحة في أسفل المتصفح.
كم أنتم أوفياء لمناحي الذي أخذته سنوات السفر و الدراسة و العمل.

بدأت أتفاعل في تويتر بعد توقف طويل، أهلا بكم في حسابي

Tlween




كل الحبّ.

 

[مناحي النفيعي]

يا ذيب بالي مخاليبك في صدري هنا
وأسمع قنيبك ورا جبال الورق يا عريب

الصوت ما وصلهم .. و النور ما وصلنا
مدري نسونا رضا .. مدري نسونا نصيب

أنا أنا رحت لكن جيت ماني بأنا
جيت أختصر بي مسافات التواجد و أغيب

أنا سكنت الكلام اللي يكابر بنا
والحزن طفلٍ ربى فيني وعيا يشيب

أكتب تجاعيد حزنه في القصايد غنا
و أسمع خطى ركضه بقاع الحنايا نحيب

أحيان (تسقط جهاتي من جهاتي) عنا
وأنا أتماسك قبل لا أطيح و أقول عيب

ما خلقت للخوف و التغريب ماهو لنا
لو غيبونا غيابات الظلام الرهيب

وحيد أنا بين جدراني كتبت السنا
ولا يمكن أطلع في ليلٍ فيه أسافر غريب