مشل وطفله والحزن والهم

ماجد العايذي · 10-21-2008, 11:49 AM

قد يكون القصيد ابلغ من الكلام والوصف

ولكن

يبقى الالم أكبر

ارجو ان تستمتعوا بقراءة الالم او الامل ان صح التعبير

ولكم حبي

[poem="font="tahoma,6,orangered,bold,italic" bkcolor="black" bkimage="./images/backgrounds/95.gif" border="solid,10,red" type=2 line=1 align=center use=ex num="0,black""]

واقلبـي اللـي كـل هـم لجابـه=متحمل فـي دنيتـه كـل ممـرور
متحمـل جـور الزمـان وعذابـه=ومصايب الدنيا بعـد ماخـذه دور
آمنـت بـك يـاواحـد يلتجـابـه=منك العفو نرجيه والذنـب مغفـور
يارب أنا عبد شقـى الهـم صابـه=في وسط قلبي وأودع القلب مخطور
لاهوب جـرح وإيتـداوى صوابـه=ولاهوب كسـر ويتجبـر ومقـدور
وحيد في غرفـه ووقتـي تشابـه=كل ساعة فيها تساوي لها شهـور
أسلاك قيدي وإكسجينـي عصابـه=وعيني تجول بظلمة مابهـا نـور
ماغير صـوت الأجهـزه كالذيابـه=وإليا نزل ضغطي تعاوت على الفور
وماكنه الأ الموت عمـري زهابـه=وكني قضيب عداي والدم مهـدور
أضحك ليا جوني ربـوع وقرابـه=وقت الزياره وأترك الهـم مستـور
ولا همني بالراس لأعلـن غيابـه=ياكود ورعـان صغيريـن وبـزور
مشل وطفلـه يـا إلاهـي غلابـه=توهم صغار ولابهم حمـل للجـور
يطرون كـلٍ ملتهـي فـي العابـه=وطفله تلاغيني وكنها من الحـور
مشل وسيفه قاضبه مـن نصابـه=وأشيلله عرضه ويضحك ومسرور
وليـا ضحكـت لطيفهـم ياهلابـه=معها تجيني غصة تمسـك الـزور
وأضيع بالهوجـاس كنـي بغابـه=وأنا أدري أن الوقت مظلم وديجور
أمشي طريق كـم غيـري مشابـه=همي كبير وفوقـه العمـر منـذور
يالله ياللـي مايضيـع الرجـابـه=تحفظ عيالي لايجي فيهـم قصـور
لين الجهاز يصيح (ياهي طلابـه)=ممرضـه منـاك وإهنيـه دكتـور
وقامت تناهشني الأبر والبـلا بـه=الضغط هابط وأودع القلب بحـدور
الله يعيـن القلـب ممـا لجـابـه=دامه سكن به هم والغم لـه سـور
يالله أنـا طالبـك تحسـن مآبـه=ويالله عساه الذنب ممحي ومغفـور

[/poem]

ماجد بن محمد العايذي

جُمان · 10-21-2008, 01:48 PM

نصُّك يا ماجد يسيلُ ألماً
أسأل الله أن يشفيك و يرفع عنك ما أهمك ويحفظ لكَ ذُرِّيتك

.

.

محمد الضويحي · 10-21-2008, 02:09 PM

ابومشل : يا هلا وغلا فيك أبعاد كلها تحتفي بك يا رجل

ونص موخز لحد الغياب .. ذلك هو قلب الأب الذي كتب معاناته داخل المشفى
كم هي صور متحركة أمام العين والقلب تحركت المشاعر لأن كل بيت يحكي
واقعاً لا خيالاً وهنا أجد الفرق الحقيقي في كونها كتبت في لحظة تنفس يتصاعد
من صدرك المثقل بالألم الحسي والمعنوي .... حفظكم الله لمشل وأخته وابقاك

محبك : محمد