فايق عبدالجليل ـــ يعودْ ولَكِنْ !!

[حنان محمد]

( الكلمة الأخيرة )


بكل هدوء .. وبكل محبة
اسمع الكلمة الأخيرة
ما ابيك
وان رجعت .. اترك الديرة
واسافر غير ديره
وبكل هدوء


عرفتك .. والنظر خداع
صدقتك وطاوعتك
سلمتك.. شعوري بساع
اثاري صح ii..
كل اللي سمعته وشاع
اسمع الكلمة الأخيرة
ما ابيك ..ما ابيك
وان رجعت اترك الديره
واسافر غير ديره
وبكل هدوء


كلمة .. وانتهى الموضوع
فكّر .. تنسى أو ترحل
شسوي .. وش حيلة المخدوع
يا اعيد الكرّه من أول
اثاري صح
كل اللي سمعته وشاع
اسمع الكلمة الأخيرة
ما أبيك .. ما أبيك
وبكل هدوء ...


( فايق عبدالجليل )

 

[حنان محمد]

( سالفة صمتي )


يلاحقني الورق
تأخذني هموم الوقت من وقتي
أسكت .. والسكوت أنتِ
أحاول والحلول أنتِ
شسولفلك .. وانتِ سالفة صمتي
بسمرت الشفايف
بين صمت وصمت
تحديت الزمن
حتى نساني الوقت
خطيتك على الاصرار
على التكرار
وشلتك في سكوت الحب
حبيبة آخر المشوار
حبي فوق تعريفي
حبي فوق تحريفك وتحريفي
وأنا ملزوم اتصبّر
نسيانك مهو بكيفي
وعيونك نجوم الليل
كل الليل في صيفي
أحارب عالم عيونك
أحارب ينكسر سيفي
أبحر فيك يا حلوه
تغرقني مجاديفي
أنا بصحرا سكوتي
انتحروحدي
أعاني الصمت
أعاني الخوف
أعاني وجدك ووجدي
بهاجر من جديد أبدي
بحارب بالجمر بردي
بصمم أوفي في وعدي
وأصمم أحكي ما عندي
ولما يرتفع صوتي
احس حتى الورق ضدي
أنا المقسوم للسكتة .. أنا المقسوم
أنا العايش .. أنا المعدوم
أنا غيمة مطر
وأنا العطش كل يوم
كنت آكل من أشعاري
كنت أشرب من أشعاري
وكنت أعزم على المقسوم
كنت أتعاطى هم الناس
كان ( بيتي ) بيوت الناس
وياما بدفتر بيوتي
طاردني السهر والنوم
وياما بليلي ضاع الليل
في سكة قمر مهموم
وياما بشعري وأشعاري
غفت ياما كثير نجوم
أمشي في شوارع ليل
غريب حتى عن ثيابي
غريب حتى عن احساسي
عن اعجابي
أضيع في غربة الألوان
أسير الصمت..وأعصابي
أضيع تحت المطر غابة
ارفضتني أصغر أعشابي
أضيع مثل الطفل في البّر
حزن الليل العابي
أمشي..أمشي.. طول الليل
الماضي يوقفني
الذكرى تصادفني
أمشي.. أمشي .. طول الليل
تتعب مني أتعابي
أمشي..أمشي.. طول الليل
يبكي دربي ..وترابي
أنا أول شجر
أغصانه ممنوعة
أنا أول شجر
يشرب من دموعه
يهاجر ظلي من تحتي
يترك صوتي حنجرتي
تصير السكتة مشروعة
وبين الهجرة والهجرة
يموت الحب من جوعه
وتبكي خطوة عيوني
تبكي .. تبكي مخدوعة
أحاول أمشي واتردد
جميع دروبي .. مقطوعة


( فايق عبدالجليل )

 

[حنان محمد]

نحب في كل الظروف
و أحلى شي في الحب بيته
و الل أحلى إحنا في بيته ضيوف
أنا حاربت بكلامي
حتى أنهيت التحاور بالسيوف
و أنا أعدمت المسافة
بين الإصبع و الحروف
انتِ قمرة تحب .. فاجأها الكسوف
و أنا عاشق غير حبك ما أشوف
نحب في كل الظروف
نموت في كل الظروف
مثل موت كتاب في أعلى الرفوف

 

[حنان محمد]

آخر زيارة...
حسيت في آخر زيارة
شي فعيونك مختلف
شي فحديثك مختلف
حتى سكوتك مختلف
صرت بشكوك
شفت الحقيقة في عيونك تعترف
موقف غريب
موقف ابد ماينوصف
وين الكلام..
وين الحرارة في السلام؟
كبير الفرق..
مابين أول لقى وآخر زيارة
ومحتار اش اقول...
ياحب خانتني العبارة
والحر تكفيه الأشارة

****************

كل شي حبيته ..
في بيتك نساني..
الهدوء .. الليل
الصمت .. الأغاني
حتى لون الورد..
والوجد ومكاني..
داهمتنى الغربة...
ليتني ماجيت..
ليتني رديت..
لساني ضيع غربتي....

وين الكلام..
وين الحرارة في السلام؟
كبير الفرق..
مابين أول لقى وآخر زيارة
ومحتار اش اقول...
ياحب خانتني العبارة
والحر تكفيه الأشارة

 

[حنان محمد]

(( الطفولة ))

يا ناس لا تهدمون السكه
والبيت القديم
يا يبه بيتنا حلو نحبه مديم
حرام الطين يصير مرمر
حرام الذكرى
تحت اللهيب تتكسر
حرام التريك
يصير نيون
حرام الشارع الهادي
يصير مجنون
يا ناس لاتهدمون السكة
هذي السكة من قلبي
والبيت القديم مسور بحبي
خلوا نتفه من قلبي
اصبّر فيها احساسي


بنام تحت ( العريش ) .. خلوني أنام
ماأبي فيلا وحديقة وسور
ماأبي نافورة غرقانه بزهور
ماأبي شرفه وكراسي
ماأبي دوشق سلب
ريش الطيور
أبي بيتي القديم
أبي بيت الطفوله
أبي الليوان
والباب الكسول
أحب بيتي صخر أو طين
أحبه مطرز بجندل
مثل أول ..
مثل أول
عشه صغيره وسط البيت
مبنية بحطب ومربطه بسيام
ومحكر فوق السطح
كله سحاحير وحمام
بأشوف الذكرى
خلوها على الغصن القوي تسهر
وتغازل قلبي وتغازل
مهما صرت أنا أكبر


سكتنا أصبحت شارع طويل
وعمارات ومباني
ودكاكين ومعارض
تعشق التبديل
وبيت السمره صار... دوار
مزروع بعشب وأزهار
صار دواره
مديم عيني عليها ادور
أبي رمله
بأشم الرمله
بأرسم فيها أشعاري
وين الرمله
حتى الرمله غطوها
وهدموا مخبز ..الخباز
وشالوا منجر النجار
ودكان الشايب الطيب
أبو سيار !!


فايق عبدالجليل

 

[حنان محمد]

شكثر حلوين ايام الهوى

والله شكثر حلوين مروا وحنا ما ندري

اذا مروا في هوانا من السنين عشرين

مروا واحنا وسط الحب وسط الشوق مشتاقين

نزرع في امانينا ونحس تونا تعارفنا

قبل ساعات معدودين


فايق عبدالجليل . . .

 

[حنان محمد]

(( انتظار ))

نام القمر
بعد السهر
والنجمه غطاها النهار
(( والميل )) من كثر المشي
داخ وتعب
والساعه ملت الانتظار
وانا على نفس الرصيف
يم عامود الاناره
اللي خيوط النور فيه تقطعت
انا في نفس المكان
كنت انتظر
في الشارع الخالي
اصبر في الصبر
النجمه غطاها النهار
والساعه ملت الانتظار
وانا على نفس الرصيف
اللي تواعدنا عليه
كنت انتظر !!

فايق عبدالجليل ..

 

[حنان محمد]

غيره ..

تغار ...
يا بو شفايف عسل
يا بوهمسات الامل
ياللي خطواتك غناوي
ياللي نظراتك حزاوي
ياللي احساسك وتر قيثاره
ياللي ماقدرت ...
اكتب عليك اشعار

***

يادمي
ياصبغة فرح مرت على همي
يا آخر عصافير الهوى ...
يا اول هوى صادق
ياللي عطفك يشابه حنان امي
يا دمي
حتى من ذكرياتي تغار ...
يادمي

***

احلى ساعه في عمري
تمر قربك
احلى فرحه ألمسها
لما توصف حبك
يا آخر حدود الحب
يا أحلى قدر مكتوب ... على جبيني
انت البياض والسواد
... اللي صبغ عيني


فايق عبدالجليل ..