شِعرٌ لـ كلّ حالة شِعر ( أوراق .. )

[عبدالعزيز رشيد]

(( اشياء أو أشلاء ))





أشياء أو أشلاء
سمّيني مثل مانتي تبيني
ممتلي من الألف للياء
أحزان وكدر
حلمي انتثر وانتي رحلتي ياقمر !!
ليتك قمر يرجع لنا نصف الشهر
فيني الكذب مثل الأمل \ كذبه وجت مثل الأمل !!!!!
لا ياوتين
الجرح لو جاوتيني من يداويني سوى موتي ؟!
انا جيتك
بميلادي كتمته وماقراني غير صدقك
طفْل يمشي موطنه وِحده
وياكم حبّ وَحده!!
طفْل ضايع غير صايع
من رماني مارميته غير أسأل ليه رماني ؟
انظلم .. ياماانظلم
كابر وكابر واتعبه كذب الكبِر
ماكان صادق
كم كذب يوم ابتسم !! .. والله كذب يوم ابتسم !!!!
.
.
مزمار أيّامي عزف حزني
...................والكلّ ساكت والرجاوي تغتشي
لين انتهى حزف الحزن منّي
.............شوفوا الغبن هالكلّ صفّق منتشي !!
..
..
قالت : انا حزني بلد
تسرح بها دموعي
ودمعي عاهد بحبّ البلد
والدمع فاضحني
ويدين الصدْق تمسحني
يدين الصدْق صارت هي يدينك !!
آااااااه من غيرك فضح حزني ؟
..
..

أنـــا

ورده ثناها الدمع ومالت
...................جيته يواسي الدمع ميلك !

أنـــا
وانتي .. أنا .. أنتي .. بعد مانتي حكيتيني وحكيتك
اثرنا
اثنين داخل همّنا !!!
قالت : أنا موعد وداعي بالربيع الجاي
جيت وقلت : أزهاره حزن وابلا فرح
وين الربيع الجاي ؟!!
يعني ايه بتروحين
يعني ايه بتغيبين
غيبي واوعدك
ايه اوعدك
مانساك مرّه
واذكرك بالخير بس..
ابغى تعرفين اني شظايا من ألم
أشياء من أحزان أشلاء من أحزان
سمّيني مثل مانتي تبيني
اوعدك بارمي الحزن لجل الفرح
وارسل رساله من شعر
أشياء أو أشلاء سمّيها مثل مانتي تبين !!!!

 

[عبدالعزيز رشيد]

صوت اتى من نوافذ الأجداث
كأنه كان يقول :

أصحى بهالدنيا وانا كنّي غريب
.................. واستجمع ابصاري واناظر ذا وذا


واللي اشوفه بالبصر شكله عجيب
................. وين الصفى يادنيتي ؟ كنتي شذى


صرتي بياضٍ لوّثه لـون ٍ رهيب
...................من كثرة الايدي وهي تعطي الأذى


يادنيتي صرنا بقيعانك سريب
...........حذيانها تحاذي الردى ياهو (( حذى )) !


وهنـاك مظلوم وحسيرٍ له نحيب
......................يصرخ ينادي ليش هالدنيا كذا..؟!


من يسمع الصرخه وهو في هالرحيب ؟
.....................محدن بهالدنيا ســمع نوحه لذا :


باستجمع سكاتي وكون اوّل مجيب
....................ماعادبه صمتي مثالٍ يحتذى !!!


وان قلت له برصاصة الرحمه تطيب
......................تسمع جوابه بالعنى ياحبّذى ..!


لين انتبه لي وقال لحظه يالحبيـب
..................إلا اذا الدنيا ركدت!! .. إلا .. ! إذا ..!




" الا اذا "
.
.
.

"الا اذا "
.
.
.
"الا اذا "
.
.

 

[عبدالعزيز رشيد]

هذا الحبر يغفى على صدر الورق
__________واحلام مرسومه على الصفحة بريق
والمشكله لي جا الحبر بعض الأرق
______________تلقى قصيده مالها حلم وطريق


شاعر توسّد هالكتابه
هيّأ خياله بالرتابه
ليته لقى غير الكآبه !


عبدالعزيز رشيد
ياعبدالعزيز رشيد لك عامين
تِذْكرْ ؟
شف تذكّر كنّها اليومين !!

 

[عبدالعزيز رشيد]

تمثال واقف
من رخام املس
على كتفه حمامه طارت وخلّت خدوشٍ ناعمه
من عين هالتمثال سالت دمعتين وخدشْ !

بـ جناح لـ روح

 

[عبدالعزيز رشيد]

خاصمتني
مادرت بانّي طريح
كلمتني
قلت : انا صوتي جريح
لوّحت لي
قلت : فـ يديني نزيف

ثم رمتني
قلت : ياأحلى نزيف!

هي حبيبه
كنها القمرا عجيبه
كم غفت وقت الصباح
والقهر ماغيرنا حنّا نكمّل هالسهر

 

[عبدالعزيز رشيد]

ليست إلا أصداء استجابت لـ بيتٍ ليس لي في هذا النصّ





حادي على اثر شوقه صاح
_______________نادى وصاحت مراقيبه
( ياحنيف انا لي وليفٍ راح
______________وش حيلتك في مواجيبه )*
ياحنيف انا عفت هالممراح
________________عيّا يكفّي عذاريبه
صوتي نزفني بدون جراح
_______________حتّى طبيبي نزف ريبه !
وجهي سما ونجم دمعي لاح
_____________من يمسحه او يداريبه ؟!
في داخلي ضيق ماينزاح
_________________الله كريمٍ يودّي به
الحين يوم انكسر مصباح
_____________قلبي يبي يرجع بـ طيبه
مامداك ياهيه ياصيّاح
______________وادي المحبّه عوى ذيبه
مابين ودّي وشيٍ راح
_________________قلبي تزايد مطاليبه

 

[عبدالعزيز رشيد]

.
.
كرز مقضومه بـ كلمة " أحبّك " !
سالت بكلمة :
انا والله بعد مثلك احبّك !!

بـ جناح لـ روح

 

[عبدالعزيز رشيد]

خوفي انا
يقرا ويتهجّا
وانا
جالس
على قيد الأمل
والخوف
قاري ماتركني استريح